San Juan 6:44-69

⁴⁴Por ni tu cho chilody kiid lon deelñee kiidnidy Tat Tios nii pxaal naa xaa. Aan naa kuuñ kpañ kchë meñ nii kiid lon tsi lëë tse go tsigal.

⁴⁵Leñ kchë libre nii pkëë profet xñee sinrii: “Lëë Tat Tios kuuñ kseedy kchësy meñ.” Por ngo nii kchësy meñ nii xkëëtyag xtiits Tat Tios, ni xseedy nii xñee xaa, chiid lon.

⁴⁶’Xñedyaa nii nol tu xaa nii kayan Tat Tios. Xaktyee xaa nii pchoo lo Dios kayanle Tat Tios.

⁴⁷Nli xñen nii kchësy meñ nii kniladzy xtitsaa jkaa kyalmbañ nii nitylody.

⁴⁸Naa nak kyaxtily nii xnee kyalmbañ.

⁴⁹Nikxe taw pxusykoltoo do kyaxtily nii lë maná tañ, lëë xaa kuty.

⁵⁰Per lëë naa kyaxtily nii byety kpaa xnen. Chejty kchë meñ nii chaw kyaxtily go.

⁵¹Naa nak kyaxtily nii byety kpaa par ktedyaa kyalmbañ lo meñ, aan kejty kchësy meñ nii chaw kyaxtily re. Misme xcuerpaa nak kyaxtily nii ktedyaa. Lëëw ktedyaa parñee kpañ kchë meñ nii nche lo kislyu.

⁵²Tsigo lëë meñ Israel bislo ptilytiits ksa xcombañer, xñee: —¿Xa kchilo dyon kneetsy xaa re xcuerp tyaaw no?

⁵³Lëë Jesús chëb: —Nli xñen nii deelñee kawdy to xcuerp mguiy nii pxaal Dios ni kidy to xcheñ xaa, kpañdy to.

⁵⁴Kchësy meñ nii chaw xcuerpaa ni chi tu cheñaa, xkaa kyalmbañ nii xnitylody, aan naa kuuñ kpañ meñ go tsi lëë tse go tsigal.

⁵⁵Por nii xtyaaw nak xcuerpaa, ni nii xtyoow nak tu cheñaa.

⁵⁶Kchësy meñ nii chaw xcuerpaa ni chi tu cheñaa nakni naa, ni nakni gaan meñ go.

⁵⁷Lëë Tat Tios nii pxaal naa xnee kyalmbañ, aan por kyalmbañ go lëë meñ mbañ. Singo gak kchë meñ nii kaw naa jkaa kyalmbañ.

⁵⁸Kyaxtily nii byety kpaa xnen. Naktyo sinak maná nii taw pxusykoltoo do ni nikxe gaa taw xaaw, lëë xaa kuty. Per lëë meñ nii kaw kyaxtily nii byety kpaa kejty meñ go.

⁵⁹Leñ ktoo nii sob leñ kyedzy Capernaum bluuy Jesús kchë nrii.

⁶⁰Tsiñee lëë kchë meñ nii nak xpëëdscuel xaa biñ ngo, ndaly xaa bislo xñee: —Tir ngan kchë nii xñee xaa. ¿Cho lë nii kuuñtsyeyo?

⁶¹Tsi lëë Jesús byeñ kchë nii nonee tsilaan meñ go, lëë xaa chëb: —¿Pe xyeedy kik to biñ do kchë nii kwnen?

⁶²¿Pe nyuñ do deelñee nyan do nii lëë mguiy nii pxaal Dios xyëp kpaa par kyey xaa laañee sob xaa klo?

⁶³Lëë Kyalbini xnee kyalmbañ. Pa xkiiñdy cuerp. Kchë tiits nii xñen lo do xñee xa nak kyalmbañ nii xnee kyalbini.

⁶⁴Per no do nii xnilasty nii xñen. Singo chëb Jesús porñee nanle xaa cho xnilasty ni nanle xaa cho kak niladzy xaa.

⁶⁵Ni chëb xaa: —Por ngo nii lëën niyle lo do nii ni tu cho chilody kiid lon deelñee kiidnidy Tat Tios xaa.

⁶⁶Destye tse go ndaly xpëëdscuel Jesús pchooxso kwënaltre xaa Jesús.

⁶⁷Tsigo lëë Jesús chëb lo ksa tsiipchop xpëëdscuel: —¿Pe wi do chakladzy kchooxso?

⁶⁸Lëë Simoñ Pedre kwëb chëb: —Xey, ¿cho lo kyo noo? Lii nak xaa nii xñee tiits nii xnee kyalmbañ nii xnitylody.

⁶⁹Ni ndonle noo ni xniladzy noo nii lii nak Xiñ Ntson Dios.