San Juan 6:32-55

³²Jesús okinmili: —De milajka, de milajka nomechilia: Moisés amo onomechmák n paj non owaltemok de ilwikak, yej Notajtsi Dios Akin nomechmaka n de milajka paj de ilwikak.

³³Porke n paj non Dios kitemaka ye non waltemoa de ilwikak iwa kinmaka yolílistli n tlaltikpaktlakah.

³⁴Ijkuakó okilijkeh: —Tejwatsi, techmaka sanwel non paj.

³⁵Jesús okinmili: —Non paj ye Ne, akin niktemaka yolílistli. Akin wits nonawak mach ok ayik xitlatlas, iwa akin nechneltoka ayik amikis.

³⁶Pero ijkó kemi yonomechili, maya yononnechitakeh amo nonnechneltokah.

³⁷Nochi tlan Notajtsi nechmaka wits nonawak, iwa akimeh witseh nonawak, Ne nikinselis.

³⁸Porke Ne amo oniwaltemok de ilwikak para nikchiwas tlan Ne nechpaktia, yej para nikchiwas tlan kipaktia Akin onechaltítlanki.

³⁹Iwa Notajtsi Akin onechaltítlanki, amo kineki manikpolo nion se de nochteh akimeh onechinmák, yej kineki manikinyoliti itech nekateh iksemi tonatijmeh.

⁴⁰Porke tlan Notajtsi Dios kineki Ye ni: nochteh akimeh kitaskeh Ikone Dios iwa kineltokah, maya mamikikah moyolitiskeh porke Ne nikinyolitis itech n iksemi tonati.

⁴¹Ijkuakó n judíojteh opé moichtakatlapowiah de Jesús porke okijto: “Ne nipaj non owaltemok de ilwikak.”

⁴²Iwa okijtoayah: —¿Amo ye nin Jesús, ipiltsi n José? Tejwah tikinmixmatih ipapá iwa imamá. ¿Kenijki kijtoa owaltemok de ilwikak?

⁴³Jesús okinmili: —Ayakmó ximokualankatlapowikah.

⁴⁴Amaka weletis wits nonawak, tla amo kinotsa Notajtsi Akin onechaltítlanki, iwa Ne nikyolitis itech n iksemi tonati.

⁴⁵Itech intlajkuilol n profetas ijkuilitok: “Dios kinmachtis nochteh.” Yika, nochteh akimeh kikakih Notajtsi iwa kajsikamatih tlan kinmachtia, witseh nonawak.

⁴⁶'Amaka yokitak Notajtsi, sanwel Ne Akin niwalewatok de Dios, Ne yonikitak.

⁴⁷De milajka, de milajka nomechilia: Akin Ne nechneltoka kipia yolílistli non ayik tlami.

⁴⁸Ne ni paj non kitemaka yolílistli.

⁴⁹Nomowejkatatawah kan tlaltejtéyinki okikuajkeh n paj non itoka maná, iwa maya okikuajkeh non paj omikeh.

⁵⁰Pero Ye nin paj non waltemoa de ilwikak, akin kikuas non paj, ayik mikis.

⁵¹Ne nonewia non paj yolitok non owaltemok de ilwikak. Tla aka kikua non paj, nochipa yolitos. Nokuerpo ye non paj non niktemaka para mayolitokah nochipa n tlaltikpaktlakah.

⁵²Ijkuakó n judíojteh opé motlatlajtolkopah iwa okimoliayah: —¿Kenomi weletis techmakas matikkuakah ikuerpo?

⁵³Jesús okinmili: —De milajka, de milajka nomechilia: Tla nomejwah amo nonkikuaskeh nokuerpo, Ne non onimochi ni tlakatl, iwa tla amo nonkoniskeh noesso, amo kipiah yolílistli.

⁵⁴Akin kikua nokuerpo iwa koni noesso kipias yolílistli non ayik tlamis, iwa Ne nikyolitis itech iksemi tonati.

⁵⁵Porke nokuerpo de milajka tlákuali, iwa noesso de milajka tlaonílistli.