San Juan 6:32-55

³²Ju' tzunj e xi' tkba'n Jesús cyexin: —Jaxxix cxe'l nkba'na cyey, yaa'n ja Moisés e tzaj k'onte waabj te twitz cya'j cyexin, sino ja te Nmana. Bix tzinx tk'o'nxin ja'lewe, pero jaj waabj ntk'o'n cychunk'lala mlay baj,

³³cuma tej waabj tzin tk'o'n Dios ntzaj tuj cya'j, bix c'ajbel tu'n tk'onte chunk'lal te junx maj cye xjal—tz̈i Jesús.

³⁴Tej cybinte ke xjal kej tyolxin lu, e xi' cykba'nxin texin: —Taat, k'ontzne ja jawnex waabj lu keya jaca k'ij—tz̈ikexin.

³⁵Bix e xi' tkba'n Jesús cyexin: —Inayenja jwaabj tzin tk'o'n chunk'lal te junx maj. Alcye kej xjal chi tzaal wuyena, mintii'tl tak' weyaj cye, bix jax alcye kej xjal chi ocslal wi'ja, ya mintii'tl ccyajbe'.

³⁶Jatzen cyey, nim maj ma txi' nk'o'na nxnak'tzbila cyey, bix amale matet cyila wipemala, pero min chi ocslana wi'ja.

³⁷Tuj nk'aba ma tak'a Nmana cykil kej xjal at tu'n cyclet. Bix mi nuket jun xjal, oj tul wuyena tu'n tclet, q'uelelet nxoo'na.

³⁸Mlay che'x nxoo'na, cuma ma chin cu'tza tuj cya'j yaa'n tu'n nbinchana weya wajbil, sino tu'n nbinchana tajbil Nmana ma tzaj tsma'n inayena.

³⁹Jtajbil Nmana ma tzaj tsma'n inayena, jaj tu'n mi'n cyaj mi nuket jun xjal tuj cyamecy kej xjal ma tzaj tk'o'nxin tuj nk'aba tu'n cyclet. Taj Nmana tu'n cyjaw itz'j cykilca tuj cyamecy wu'na juntl maj tuj manc'bil k'ij.

⁴⁰Jtaj Nmana, jaj tu'n tten cychunk'lal te junx maj jaca juun xjal ma tz'el tniy' ti'j alcye kena bix ma tz'ocslan wi'ja. Kej xjal nbint cyu'n ju'wa, inayena cjawetz itz'jsa'ncye tuj cyamecy tuj manc'bil k'ij—tz̈i Jesús cye kej judío nchi k'ojl ti'jxin.

⁴¹Tejtzen cybinte ke judío tyol Jesús, el ka' tyolxin tuj cywitzxin, cuma otk txi' tkba'nxin: “Inayena jwaabj e cu'tz tuj cya'j.”

⁴²E xi' cykba'nxin cyxolxxin: —¿Yaa'mpatzen jaj xjal lu nuk Jesús, tcwal jxin José? Ktzki'n twitz tmanxin bix twitz ttxuxin María. ¿Titzen tten nxi' tkba'nxin ka e cu'tzxin tuj cya'j?—tz̈ikexin.

⁴³Bix e xi' tkba'n Jesús cyexin: —¿Tikentzen nchi jaw yolena wi'ja cyxolxa ju'wa?

⁴⁴Jaxte ma tzaj tsma'n Nmana inayena. Yaa'n tu'nj nchi yolena ju'wa chi ocslala wi'ja, sino tu'nj oj ttzaj tk'o'n Nmana jun tajbil tuj cyanema tu'n cyocslana wi'ja. Bix tuj manc'bil k'ij cjawetz witz'jsa'na tuj cyamecy kej xjal ma chi ocslan wi'ja.

⁴⁵Jaxte at xjal chi ocslal wi'ja, cuma tuj tyol Dios e cykba tyolel Dios cyjulu: “C'oquel tk'o'n Dios cye xjal, tu'n tel cyniy' ti'j,” tz̈i tyol Dios. Kej xjal cybi' jtzin tkba'n Nmana bix chi ocslal ti'j tyol, jax chi ocslal wi'ja.

⁴⁶Min tzin nkba'na o til jun xjal twitz Nmana, cuma mi nuk jun xjal o til twitzxin. Nuk jaj xjal sma'n tu'n Dios o til twitzxin, inayen tzuna.

⁴⁷Jaxxix cxe'l nkba'na cyey, alcyej xjal ma tz'ocslan wi'ja, at tchunk'lal te junx maj.

⁴⁸Inayenja jwaabj tzin tk'o'n chunk'lal te junx maj.

⁴⁹Yal tej waabj e cu'tz twitz cya'j, e xi' cywaa'n ke cyxe'chela, pero e cyimke.

⁵⁰Pero jwaabj nchin yolen weya ti'j, e cu'tz tuj cya'j, bix oj twaa'n jun xjal ti'j, mi'n cyim.

⁵¹Bix ja waabj i'tz lu e cu'tz tuj cya'j bix ntk'o'n chunk'lal cye xjal, inayen tzuna. Alcyej xjal cwaa'l ti'j jwaabj lu, attzen tchunk'lal te junx maj. Bix jwaabj cxe'l nk'o'na tu'n tten cychunk'lal xjal, jatzen nxumlalja—tz̈i Jesús cye judío.

⁵²Tejtzen cybinte judío tyol Jesús ti'j t-xumlal, ak'kexin k'ojlel cyxolxxin ti'j ti japenina ja yol lu. E baj cykanenxin: —¿Ti tten tu'n ttzaj tk'o'n jxin lu t-xumlal ke, tu'n t-xi' kchyo'n?—tz̈ikexin.

⁵³Ju' tzunj, e xi' tkba'n Jesús cyexin: —Jaxxix cxe'l nkba'na cyey, ka min ma txi' cywaa'na nchu'la, bix ka min ma txi' cyc'a'na ntz̈q'uela, mlay ten cychunk'lala, cuma inayena jxjal sma'n tu'n Dios tu'n nk'onteya cychunk'lal xjal.

⁵⁴Alcyej xjal cxe'l twaa'n nchu'la bix cxe'l tc'a'n ntz̈q'uela, attzen tchunk'lal te junx maj, bix cjawel witz'jsa'na tuj cyamecy tuj manc'bil k'ij.

⁵⁵Ntk'o'n chunk'lal, cuma jwaabj jaxxix ja nchu'la bix ntz̈q'uela.