San Juan 6:30-43

³⁰Mänitä Jesús miäyajtǿøw̱ägumbä: ―Tii hijxtahṉd hoy‑yagjuǿøñäbä myajcähxøꞌøgaam̱by neby højts miic̈h jaꞌa mmädiaꞌagy jaduhṉ nmäbǿjcät coo miic̈h jaꞌa Dios tøø xquiex̱y.

³¹Jaꞌa hajxy hijty nhaphájtäm ndeedyhájtäm jaꞌa jecypiä, jim̱ä maná hajxy quiaayy maa hänajty pøṉ quiaꞌa tsänaꞌayän. Moisés jaꞌa maná yajwaꞌañguioj. Jaꞌa maná, nebiä tsajcaaguiän jeꞌe. Jiiby jaduhṉ myiṉ̃ cujaay maa jaꞌa Diosmädiaꞌaguiän: “Yajcaayyä jäyaꞌayhajxy jaꞌa tsajcaagyhajpä jaꞌa tsajpootyptsohm̱bä. Dios jaduhṉ quejx.”

³²Mänitä Jesús yhadsooyy: ―Chaads mijts tehm̱ tiøyhajt nnämáꞌawät: Caha Mioisésä mijts jaꞌa tsajcaagy xyajnäguejx jaꞌa tsajpootyptsohm̱bä. Dios, jeꞌeds hajxy jeꞌe xyajnäguejx. Jeꞌeds hajxy jeꞌe xquiuhdujtmoꞌowaam̱b coo hajxy jim̱ mdägǿꞌøwät tsajpootyp.

³³Jaꞌa Dios tøø quiéx̱iäbä, jim̱ tsajpootyp jeꞌe tøø chooñ. Paady jeꞌe yaa tøø quiädaꞌagy nejy mijts xquiuhdujtmóꞌowät coo hajxy mjugyhádat nebiä Dios jiugyhatiän.

³⁴Mänitä Jesús ñämaayyä: ―Højts yøꞌø tsajcaagy móoyyäc cøjxtaꞌaxiøøbä, jaꞌa tsajpootyptsohm̱bä. Paady hajxy jaduhṉ miänaaṉ̃ coo hajxy quiaꞌa wiinjuøøyy coo Jesús jaduhṉ ñiñänøøm̱a hamdsoo coo jeꞌe tøø quiexyii jaꞌa Dios.

³⁵Mänitä Jesús miänaaṉ̃: ―Høøc̈h jeꞌe, jaꞌa Dios tøø quiéx̱iäbä. Cuhdujtyéjpøch coo hajxy jim̱ tiägǿꞌøwät tsajpootyp pønjátyhøch jaꞌa nmädiaꞌagy xmiäbǿjcäp. Cøjxtaꞌaxiøø hajxy jim̱ yhídät.

³⁶Pero mijts, cábøch jaꞌa nmädiaꞌagy hajxy tøø xmiäbøjcä, hoy hajxy tøø mja hix̱y cooc̈hä hoy‑yagjuǿøñäbä tøø nja yajcähxøꞌøgy.

³⁷Pønjátyhøch jaꞌa nDeedy jaduhṉ xyajcøꞌøwaaṉøøby, jeꞌec̈hä nmädiaꞌagy xmiäbøgáaṉäp. Nguhbøgáam̱biøch hajxy jeꞌe.

³⁸Páadyhøch tøø ndsooñ tsajpootyp cooc̈h ngudiúnät nébiøch nDeedy xyhaneꞌemiän, jaꞌac̈h tøø xquiéx̱iäbä. Cábøch jaꞌa nhamdsoo wiinmahñdy nyaghidaꞌañ.

³⁹Cábøc̈hä nDeedy miänaꞌañ coo hajxy haxøøgtuum quiáꞌawät, jaꞌac̈h hajxy tøø xyajcøꞌøwaaṉǿꞌøyäbä, coo jaꞌa xøø jumøjt jaduhṉ yhabéjnät. Pero jaduhṉ miänaꞌañ cooc̈h hajxy nyajnǿcxät tsajpootyp.

⁴⁰Jadúhṉhøch jaꞌa nDeedy miänaꞌañ coo hajxy cøjxtaꞌaxiøø jiugyhádat neby jaayaꞌay jiugyhatiän, pønjaty jaduhṉ najuøøby cooc̈hä Dios xyHuunghaty, pønjátyhøch jaꞌa nmädiaꞌagy xmiäbǿjcäp. Jeꞌec̈h hajxy jim̱ nyajnøcxaam̱by tsajpootyp coo jaꞌa xøø jumøjt yhabéjnät.

⁴¹Coo Jesús miädiaacpädøøyy, mänit tiägøøyyä wiingapxpéjtäbä jaꞌa judíoshajxy. Paadiä wyiingapxpejtä coo hänajty tøø miänaꞌañ coo jim̱ chooñ tsajpootyp.

⁴²Jaduhṉ hajxy ñiñämaayyä: ―Jesús yøꞌøyaꞌay xiøhaty; José yhuung yøꞌø. Nhix̱yhájtäm jaꞌa tiaj tieedy yøꞌø. Høhṉdaacp yøꞌøduhṉ cooc tyijy jim̱ tøø chooñ tsajpootyp.

⁴³Mänitä Jesús jaꞌa judíos yhojy: ―Caꞌa hajxy mgapxtägooñä.