SAN JUAN 6:28-45

²⁸Mnichaꞌ neꞌ ꞌin Jesús bra kanꞌ: ―¿Ni ñaꞌan kuꞌni ba sikwa a?, chaꞌ ka kuꞌni ba tñan nu nchka tiꞌ Ndiose chaꞌ kuꞌni ba.

²⁹―Nde lka tñan nu nchka tiꞌ Ndiose chaꞌ kuꞌni wan ―ndukwin Jesús―. Xñi wan chaꞌ ꞌñaǎn, chaꞌ wa msuꞌwa Ni ꞌñaǎn ndijyaǎn lo chalyuu.

³⁰Bra ti mnichaꞌ neꞌ ꞌin Jesús xiyaꞌ: ―¿Ni sa ñaꞌan kuꞌnii sikwa a? ¿Ni sa ñaꞌan chaꞌ tnun kuꞌnii chaꞌ ñaꞌan kwiꞌya ba chinꞌ ꞌin ran, chaꞌ xñi ba chaꞌ ꞌiin chunꞌ ndiꞌin la? ―ndukwin neꞌ ꞌin Jesús―.

³¹Wa mda Ndiose nan ku ayman ꞌñaan xa wa mdaꞌan yuꞌwi ti neꞌ lo ntenꞌ wtyi nu ngwa sꞌni. Nde ndiya chaꞌ nu ndukwa lo kityi kula kanꞌ: “Wa mda Ndiose nan yku neꞌ, ska nan nu mdoꞌo seꞌen ndiꞌin Ni nde niꞌ kwan, ngwiꞌya ran lyuu.”

³²Ti ngwaꞌu la Jesús ꞌin neꞌ bra kanꞌ: ―Chañi ꞌa chaꞌ nu nchkwiǐnꞌ loꞌo wan ni: Stiǐn Ndiose lka nu ta chaꞌ nu chañi kuꞌni chaꞌ kalaꞌ tiꞌ wan kanꞌ, ti kwiꞌ chaꞌ kanꞌ lka nu ndyoꞌo seꞌen ndiꞌin Ni; ja lka ran ti kwiꞌ chaꞌ nu mda ayman Moisés, nu yku neꞌ nu ngwa sꞌni ―ndukwin―.

³³Ta Stiǐn ska lo chaꞌ nu kiꞌya niꞌ kasiya ꞌwan, nu chañi kuꞌni chaꞌ kalaꞌ tiꞌ wan xa wa mjwi chaꞌ kanꞌ ꞌwan, sa ñaꞌan lka bra nu nchkuan tyaja. Ndyoꞌo chaꞌ suꞌwe kanꞌ seꞌen ndiꞌin Ndiose nde niꞌ kwan, ndijyan ran lo chalyuu, nda ran chalyuu nu ja tsaa tii ꞌa ꞌin nten nu xñi chaꞌ ꞌñaǎn.

³⁴―Yu kula ―ndukwin neꞌ ꞌin Jesús―, taa lyaa chaꞌ suꞌwe kanꞌ ku ba, chaꞌ ku ba ꞌin ran nchga tsan bra kanꞌ.

³⁵―Sa ñaꞌan ngiꞌni tyaja bra nu mdyii ykuan ꞌin ran, ngwañaꞌan kuꞌniǐn loꞌo nten, xa nu xñi neꞌ chaꞌ ꞌñaǎn ―ndukwin Jesús bra kanꞌ―. Taǎn ska chalyuu ꞌin neꞌ kanꞌ seꞌen nu kalaꞌ tiꞌ neꞌ ―ndukwin Jesús―. Loꞌo nchga nten nu xuꞌwi chaꞌ ꞌin neꞌ loꞌoǔn, ja jñan la neꞌ xka lo nan ku neꞌ; bra nu xñi neꞌ chaꞌ ꞌñaǎn, ja kityi ꞌa tiꞌ neꞌ bra kanꞌ ―ndukwin―.

³⁶ꞌWan ni, chañi chaꞌ nu niǐn ꞌwan nu ngwa xkanꞌ chaꞌ ja ndyaa ñaꞌan tiꞌ wan ꞌñaǎn, ni siya wa naꞌan wan ꞌñaǎn ―ndukwin Jesús―.

³⁷Nchga nten nu wa nda Stiǐn chaꞌ ka ꞌñaǎn, neꞌ nu msñi chaꞌ ꞌñaǎn, ka neꞌ kanꞌ nten ꞌñaǎn bra kanꞌ, loꞌo ja kuloǔn ꞌin neꞌ chaꞌ tyaa neꞌ xka seꞌen.

³⁸Wa mdoꞌoǔn seꞌen ndiꞌin Stiǐn Ndiose, mdiyaǎn lo chalyuu chaꞌ kuꞌniǐn tñan nu ngulo Stiǐn ꞌñaǎn; ja ndijyaǎn chaꞌ kuꞌniǐn sa ñaꞌan nu nchka tiǎnꞌ kuꞌniǐn tiǎn ―ndukwin Jesús―.

³⁹Nchka tiꞌ Stiǐn chaꞌ ja ska nten kanaꞌ, xa wa msñi neꞌ chaꞌ ꞌñaǎn. Kwiꞌ kuꞌniǐn chaꞌ tyuꞌu neꞌ kanꞌ xiyaꞌ xa wa tyii ti chalyuu ―ndukwin―.

⁴⁰Loꞌo Stiǐn Ndiose nu ngwaꞌan tñan ꞌñaǎn ndijyaǎn, nde lka tñan nu nchka tiꞌ Ni chaꞌ ka: Nchka tiꞌ Ni chaꞌ ja tsaa tii ꞌa chalyuu kwi nu wa nda Ni ꞌin nten, nchga neꞌ nu tsaa ñaꞌan tiꞌ ꞌñaǎn chaꞌ lkaǎn Sñiꞌ Ni, nchga neꞌ nu xñi chaꞌ ꞌñaǎn. Kwiꞌ ngwañaꞌan, chañi chaꞌ kuꞌniǐn chaꞌ tyuꞌu neꞌ xiyaꞌ xa wa tyii ti chalyuu.

⁴¹Loꞌo ja ndiya ꞌa tiꞌ neꞌ judío chaꞌ re nu ykwiꞌ Jesús: “Sa ñaꞌan nu ngiꞌni tyaja, ngwañaꞌan kuꞌniǐn loꞌo nten; ka kalaꞌ tiꞌ neꞌ niꞌ kasiya ꞌin neꞌ xa nu xñi neꞌ chaꞌ ꞌñaǎn. Skaǎn tiǎn nu mdoꞌoǔn seꞌen ndiꞌin Ndiose, skaǎn tiǎn ka kuꞌniǐn chaꞌ kalaꞌ tiꞌ nten” ndukwin Jesús. Lye ꞌa ykwiꞌ neꞌ judío loꞌo taꞌa neꞌ chaꞌ ja suꞌwe chaꞌ kanꞌ:

⁴²―¿Ta siꞌi Jesús sñiꞌ Se lka nu kwa a? ―ndukwin neꞌ―. Wa nsuꞌwi lyoan ꞌin sti yu loꞌo jyaꞌan yu. ¿Ni sa ñaꞌan lka chaꞌ nu nchkwiꞌ yu kwa chaꞌ wa mdoꞌo yu seꞌen ndiꞌin Ndiose?

⁴³Kanꞌ chaꞌ ykwiꞌ Jesús chaꞌ re: ―Ja chkwiꞌ wan chaꞌ kuxi loꞌo taꞌa wan ꞌin chaꞌ nu ykwiǐnꞌ loꞌo wan tsan ―ndukwin yu―.

⁴⁴Ja tukwin ka nten ꞌñaǎn nu ja loꞌo Stiǐn Ndiose kuꞌni chaꞌ ka neꞌ ngwañaꞌan. Loꞌo naꞌ lkaǎn nu kuꞌniǐn chaꞌ tyuꞌu neꞌ kanꞌ xiyaꞌ xa wa tyii ti chalyuu ―ndukwin Jesús―.

⁴⁵Nde ndiya ska chaꞌ nu ngwaꞌan ska ayman lo kityi nu ngwa sꞌni: “Ndiose lka nu kwaꞌu chaꞌ nu ñi ꞌin nten” ndukwin kityi kanꞌ. Kanꞌ chaꞌ nten ꞌñaǎn ka nchga nten nu kunan chaꞌ nu nchkwiꞌ Stiǐn Ndiose, nchga nten nu kuꞌni xaꞌan chaꞌ nu kwaꞌu Ni ꞌin neꞌ.