San Juan 6:22-29

²²Na ornu bzaꞌ yu tuubaꞌ dzi, orzeꞌ de mbecy nu byeeñ tub laꞌ gaꞌ dzu ruꞌ nisyudoo brugyiꞌ rnii too dey. Gud lagy dey nu za ga de yu nu rsyaꞌ lo Jesuuz nañ tub zi barc nu zu lugaar zeꞌ. Nunu gud lagy dey nu de yu zeꞌ wancha nu dey Jesuuz.

²³Zeꞌ lat zeꞌ bri reñaꞌ barc. Barc zeꞌ bruuñ gyedz Tiberias. Briñ gaab ga lugaar zeꞌ nu bdow dey gyishtily despuees ornu Shuaan na Jesuuz briic mi gras ni Ñgyoozh.

²⁴Na ornu de mbecy zigy zeꞌ bzaac dey nu sac Jesuuz lugaar zeꞌ gal nu de yu nu rsyaꞌ lom, orzeꞌ niꞌ ziꞌl de mbecy zeꞌ guꞌ dey nañ barc. Orzeꞌ za dey za yub yum par Capernaum.

²⁵Na ornu bri de mbecy zigy zeꞌ tub laꞌ gaꞌ ruꞌ nisyudoo, orzeꞌ bdzeel dey Jesuuz. Orzeꞌ na dey rab yum: ―Masht, ¿gul brir lugaar ii? ―na dey.

²⁶Orzeꞌ na Jesuuz rab mi dey: ―Ya̱ rishli rne̱e̱ lo der nu de ru ryub der ya̱ par nu nac nu brica̱ nu bdow der nu byel la nir. Walab par nu bet lag der cuen de nusuriidz nu bicya̱.

²⁷Cueꞌ gyicy der riiñ par de coz nu gow der gyishlombecy ii, gun ndeꞌ wazu tuuñ ñi; sinu bicy der riiñ par de coz nu gow der nu gyicy ñi nu cui mbañ der tub la. Ndeꞌ coz nu gric ya̱, biñ nu byac mbecy. Gun de nusuriidz nu ricya̱, ndeꞌ tub sey nu briic Ñgyoozh ne̱ par nu gabe nu laab ñi de riidz nu rne̱e̱ ―nam.

²⁸Orzeꞌ na dey rab yum: ―¿Ca na coz nu rlagy ñi nu gyicy de̱ par nu gyicy de̱ coz nu rlagy Ñgyoozh? ―na dey.

²⁹Orzeꞌ na gaꞌ Jesuuz rab mi dey: ―Coz nu rlagy Ñgyoozh nu gyicy der, ndeꞌ nu gyicy cup der consuel lo ya̱, biñ nu bzuu nez mi ―na Jesuuz.