San Juan 6:20-68

²⁰Per rëbaman loj reeman: ―¡Najn, ad rdxebidi!

²¹Dxel guyën reeman niuman loj barcw guin, per hor guin gajc bidxin reeman lod zë reeman.

²²Chi bareguiaal, bén rigaꞌ ree stiblad roꞌ nijs guin, ragbee reeman guial tijbzi barcw guzu yagaj, abiꞌ gogbee reeman, lojn zë ree xbejn Jesús per ad nët laaman.

²³Loj hor zii bidxin ree barcw ren za guiedx Tiberias, gajxh lod gudaw reeman guiadxtil chi gulox badëëd Jesús quixtëë loj Dios.

²⁴Chi baguiaa reeman achutri Jesús zaꞌ yagaj niꞌqui ree xbejnman, dxel wëꞌp reeman loj ree barcw guin, zë reeman Capernaum zigdiil reeman laaman.

²⁵Chi bidxin reeman Capernaum, badxejl reeman Jesús, abiꞌ gunabdiidx reeman lojman, rëb reeman: ―Mextr, ¿goc biꞌtil guie?

²⁶Badxiꞌ Jesúsan rëbaman: ―Ragbeechaawan, raguiilidi naj guial gudawidi xt bigdxinladxidi, ad guial baguiaatidi milagr ree ni rünan.

²⁷Ad chuꞌdi xgab guialraw rara, gol guyu xgab guialraw runee guialnaban tiblayaa con Dios. Din laan na̱j ni runee Bén guxhaal Dios loj guidxliuj guial ma bacaabee Dios laaman.

²⁸Dxel gunabdiidx reeman lojman rëb reeman: ―¿Xhie rayal yaguieenan din chileꞌ yaguieenan ni rën Dios?

²⁹Badxiꞌ Jesús laan rëbaman: ―Ni rën Dios güündi na̱j guial chililadxidi bén guxhaalaman loj guidxliuj.

³⁰Dxel rëb reeman lojman: ―¿Xhie gulüül dunujn din yaliduladxan lüj? ¿Xhietëë ree milagr rüjnl?

³¹Dux béngulal ree gudaw reeman mana chi guzu reeman niz loj yujbidx, ziꞌc rëb loj xtiidx Dios: “Badëëman guiadxtil biajb xanyabaa loj reeman gudaw reeman.”

³²Badxiꞌ Jesús laan rëbaman: ―Naj rni lojdi: Ad Moisejst badëëd guiadxtil guin, da Dadan na̱j bén runee quijb guiadxtil za xanyabaa.

³³Guiadxtil runee Dios, laan biꞌt diizd xanyabaa abiꞌ runeen guialnaban loj bénguidxliuj.

³⁴Abiꞌ rëb reeman lojman: ―Dad, banee guiadxtil guin du lojn zianczi.

³⁵Rëb Jesús loj reeman: ―Naj na̱j guiadxtil runee guialnaban guin. Bén guiꞌt lon, ad yuꞌt dxej guiliaanman, ziangajc bén chililadx naj, ad yuꞌt dxej cheꞌcaman nijs.

³⁶Per ziꞌc rnin lojdi, majsi ma baguiaadi naj, ad rliladxtidi naj.

³⁷Gra ree bén ma banee da Dadan lon, guiꞌt reeman lon, abiꞌ bén guiꞌt lon, ad zasiejctan laaman.

³⁸Din naj zial diizd xanyabaa, zidgaguienan ziꞌc rën da Dadan bén guxhaal naj, ad par güntan ziꞌc rënan.

³⁹Da Dadan bén guxhaal naj, ni rënman na̱j guial gra ree bén baneeman lon niꞌqui tijb reeman ad zunijttan, rënman yasbanan laa reeman chi nit guidxliuj.

⁴⁰Din rënman guial gra ree bén yayagbee Xiꞌnman chililadx tëë reeman laaman, gap reeman guialnaban tiblayaa con laaman, guiáad naj yasban laa reeman chi nit guidxliuj.

⁴¹Dxel guzuloj ree bén Israel caneeguijdx reeman Jesús, guial rëbaman: “Naj na̱j guiadxtil ni biguiajt diizd xanyabaa.”

⁴²Abiꞌ rëb reeman: ―¿Nid laaxan na̱j Jesús ya, xiꞌn Xiëb? Dunuj ree naguieenbee xdadix con xniaax. Yan, ¿chexc zeel nax xanyabaa biguiajtix?

⁴³Dxel rëb Jesús: ―Gol bacwëëz rnieeguijdxidi naj loj lasaꞌdi.

⁴⁴Dios na̱j bén guxhaal naj. Achut zileꞌ guiꞌt lon bal id zëëdaman por da Dadan, abiꞌ naj yasban laaman chi nit guidxliuj.

⁴⁵Loj ree libr ni bacaa ree bén badëë xtiidx Dios loj ree bejn, rëb: “Dios gulüü gra ree bejn.” Zeel gra ree bén rucaagdiajg xtiidxaman, rusiid tëë reeman ni rulüüman laa reeman, laa reeman zëëd lon.

⁴⁶’Achutczi waguiaa da Dadan Dios, tijbzi bén guxhaalaman loj guidxliuj ma baguiaa laaman.

⁴⁷Diidxliczi rnin, bén rliladx naj rajpaman guialnaban tiblayaa con Dios.

⁴⁸Naj na̱j guiadxtil ni runee guialnaban.

⁴⁹Xbéngulalidi gudaw mana loj yujbidx, per niꞌczi zian güjt gajc reeman.

⁵⁰Per naj canin lojdi xcwent guiadxtil za xanyabaa, bén gaw laan gapaman guialnaban tiblayaa con Dios.

⁵¹Naj na̱j guiadxtil naban ni biyajb diizd xanyabaa. Bén gaw guiadxtil guie zajpaman guialnaban tiblayaa con Dios. Guiadxtil ni rudëdan, laan na̱j quijb da cuerpan, gudëdanan din gap ree bénguidxliuj guialnaban.

⁵²Dxel guzuloj ree bén Israel guin cadildiidx reeman, rëb reeman: ―¿Xhienaag gunee xin guin xcuerpix yadaaw ree?

⁵³Abiꞌ rëb Jesús loj reeman: ―Naj rni lëjt, bal id zajwidi xcuerp Bén guxhaal Dios, bal id zëꞌ tëëdi xrejnman, ad zajptidi guialnaban.

⁵⁴Per bén gaw da cuerpan guiëꞌ tëëman da rejnan, zajpaman guialnaban tiblayaa con Dios, abiꞌ naj yasban laaman chi nit guidxliuj.

⁵⁵Din da cuerpan na̱j quijb guialraw, guiáad da rejnan na̱j quijb ni guiëꞌ bejn.

⁵⁶Abiꞌ bén raw da cuerpan rëꞌ tëëman da rejnan, laaman nabannë naj, guiáad naj nabannëꞌ laaman.

⁵⁷Da Dadan bén guxhaal naj, rajpaman guialnaban, abiꞌ naj nabanan por laaman. Ziangajc bén gaw da cuerpan, zajpaman guialnaban tiblayaa con Dios por naj.

⁵⁸Naj cani xcwent guiadxtil ni biguiajt xanyabaa. Abiꞌ guiadxtil guie ad najtan ziꞌc na̱j mana ni gudaw xbéngulalidi, din laa reeman majsi gudaw reeman mana guin, per güjt gajc reeman. Guiáad bén gaw guiadxtil guie zajpaman guialnaban tiblayaa con Dios.

⁵⁹Zian balüü Jesús bejn ree lën yadoo Capernaum.

⁶⁰Chi gulox bacaagdiajg reeman ni balüü Jesús laa reeman, zien ree bén zinal laaman rëb: ―Nawëëg daꞌt na̱j yayigniaꞌ ree ni naman. ¿Chu zajc guidxgaꞌ laaman?

⁶¹Chi gogbee Jesús ni canee reeman, gunabdiidxaman loj reeman, rëbaman: ―¿Rüjnnaa ni rnin lëjt ya?

⁶²¿Xhieza güündi bal guguiaadi Bén guxhaal Dios yayëꞌpaman lod guzuman gocli?

⁶³Tijbzi por xSprijt Dios rajp bejn guialnaban tiblayaa, bejn ad zileꞌt güün laazaman xhienin. Abiꞌ naj por xSprijt Dios zëëd ree diidx ni gunen lojdi, por ree diidx guin rajp bejn guialnaban.

⁶⁴Per lëjt yuꞌdi ad waliladxt. Rëb Jesús zian guial ragbeechaawaman diizd yaloj chu ree ad rliladxt laaman chu tëë yayü laaman.

⁶⁵Rëb tëëman loj reeman: ―Zeel ma rnin lojdi guial achut zileꞌ guiꞌt lon bal id zëëdaman por da Dadan Dios.

⁶⁶Diizd nadxel, zien ree bén zinal Jesús guroꞌnladx laaman, abiꞌ ad guzanëtri reeman laaman.

⁶⁷Dxel rëb Jesús loj guidxiptioꞌp ree xbejnman: ―¿Në lëjt rën yaguiaj ya?

⁶⁸Per badxiꞌ Simón Bëd laan, rëbaman: ―Dad, ¿chu loj yoꞌn? Awa xtiidxil zidnë guialnaban tiblayaa con Dios.