San Juan 6:2-22

²Iwa miakeh tlakah oyayah iwan Jesús, porke okinmitayah n milagros non Ye okinchiwaya keman okimpajtiaya n kokoxkeh.

³Otlanki Jesús otlejkok itech se tepetl iwa ompa omotlali iwan itlamachtijkawah.

⁴Ijkuakó yowalajsia n paskua, inmilwiu n judíojteh.

⁵Ijkuak Jesús oontláchixki iwa okitak miakeh tlakah omoololojtokah, okili n Felipe: —¿Kani tikkoatiweh paj para tikintlakualtiskeh ninteh tlakah?

⁶Ijkó okili n Felipe san para kitas tlan kijtos, porke Jesús yokimatia tlan kichiwaskia.

⁷Ijkuakó Felipe okinankili: —¡Ome siento denariojtomi paj, amo kajxilis tikinmajmakaskeh ajachitsi!

⁸Andrés ikni n Simón Pedro, akin noiwa imomachti okilito n Jesús:

⁹—Nika kajki se telpotsintli, non kimpixtok mákuili pameh de sebada iwa ome michimeh, pero ¿kan matechajxili?

¹⁰Ijkuakó Jesús okijto: —Xikinmilikah nochteh mamotlajtlalikah. Itech non lojar okatka xiujyo, iwa omotlajtlalijkeh kemi mákuili mil tlakah.

¹¹Ijkuakó Jesús okinmónanki n pameh iwa omotlasojkama inawak Dios, otlanki okinmák itlamachtijkawah, iwa yejwah opé kinxejxeliliah nochteh non ompa oewatokah. Noiwa ijkó okichi iwan michimeh, iwa nochteh omotlamajsewijkeh iwa kuali oijixwikeh.

¹²Ijkuak yoijixwikeh, Jesús okinmili itlamachtijkawah: —Xikoololokah nochi tlan omoka amo san maawilti.

¹³Okoololojkeh tlan ayakmó okikuajkeh ika mákuili paj de sebada, iwa okintemitijkeh májtlaktli iwa ome chikimeh.

¹⁴Ijkuak n tlakah okitakeh n milagro non Jesús okichi, okijtojkeh: —De milajka, Ye ni n profeta non saman walaskia itech nin tlaltíkpaktli.

¹⁵Pero Jesús okinmitak yejwah omochijchikajtokah kiwikaskeh para mayeto Inrey. Yika, oksepa oyá iwa otlejkok ikpak tepetl san Ye iselti.

¹⁶Ijkuak opé tleyua, itlamachtijkawah otemokeh okichiatoh itempa n lago de Galilea.

¹⁷Otlejkokeh itech se barka iwa opé kikojchalwiah n lago para ajsitiweh kan altepetl de Capernaúm. Ijkuakó yotleyuak, Jesús ayamó okwalinmajsia.

¹⁸Ijkuakó se ejekatl chikaktik opé kitlatlamotla n atl.

¹⁹Iwa yoyayah kemi se mákuili noso chikwase kilómetro itech atl. Okitakeh n Jesús nejnentiwits ixko atl iwa yokualinmasia. Ijkuakó yejwah omomojtijkeh,

²⁰pero Ye okinmili: —Amo ximomojtikah, Ne ni Jesús.

²¹Ijkuakó yejwah opakeh iwa okitlejkoltijkeh itech barka. Iwa san nima n barka oajsito itech tlali kan oyayah.

²²Owalmostlatik, nochteh n tlakah non omokajkeh ik nepa lado de n lago, okitakeh okatka san se barka, iwa itlamachtijkawah n Jesús oyajkeh inselti, iwa Jesús amo oya inwah.