San Juan 6:19-41

¹⁹Catiꞌ chgulusë́ꞌë bárcodauꞌ naꞌ, gzaꞌ le nac tsca rzaꞌruꞌ tu hora, niꞌr gulaléꞌinëꞌ Jesús rzëꞌi niꞌë lu nis zxön naꞌ, len zëꞌë rbiguëꞌë ga naꞌ zeaj barco naꞌ, atiꞌ gladxi guladzöbnëꞌ.

²⁰Niꞌr Jesús rëꞌ lequëꞌ: ―Nédaꞌczaꞌ. Cutu gádxiliꞌ.

²¹Niꞌr len yöl‑laꞌ rudziji quequëꞌ guluguel‑lëꞌë Lëꞌ lëꞌi bárcodauꞌ naꞌ, atiꞌ laꞌ bdxintë bárcodauꞌ naꞌ lu yu bidx ga niꞌ zjaquëꞌ.

²²Dza buróp niꞌ, gláquibeꞌi bunách zian naꞌ nagaꞌngac yetsláꞌa nis zxön bdxin niꞌ tuz bárcodauꞌ atiꞌ Jesús cutu grénlenëꞌ yuguꞌ bönniꞌ usë́d queëꞌ lëꞌi bárcodauꞌ naꞌ, san légaczëꞌ naꞌ yjaquëꞌ.

²³Niꞌr gularúj yelaꞌgac bárcodauꞌ lu yödz Tiberias, atiꞌ guladxín tu latj dë gal‑laꞌz ga niꞌ glahuëꞌ yöt xtil catiꞌ niꞌ Xanruꞌ Jesús gudxëꞌ Dios: “Xclenuꞌ”, qui.

²⁴Le gulaléꞌinëꞌ cutur zoëꞌ niꞌ Jesús len cutu nacuꞌë niꞌ bönniꞌ usë́d queëꞌ, qui lë ni naꞌ gulabenëꞌ lë́ꞌigac bárcodauꞌ naꞌ, yjaquëꞌ Capernaum, tuꞌguiljëꞌ Jesús.

²⁵Catiꞌ guladxín bunách zian naꞌ yetsláꞌa nis zxön naꞌ, yajxácaꞌquëꞌ Jesús, len tëꞌ Lëꞌ: ―Bönniꞌ Usëdi, ¿batx bdxinuꞌ ni?

²⁶Bubiꞌë didzaꞌ Jesús, rëꞌ lequëꞌ: ―Le nactë rëpaꞌ lbiꞌiliꞌ: Ruguiljliꞌ nedaꞌ, clëg le bléꞌiliꞌ yuguꞌ yöl‑laꞌ huac benaꞌ, san le gdáguliꞌ yöt xtil niꞌ len böljliꞌ.

²⁷Gul‑gún dxin, clëg quië siꞌliꞌ laꞌ huagu rdöd qui, san quië siꞌliꞌ laꞌ huagu naꞌ ugaꞌntecz, len runn yöl‑laꞌ naꞌbán gdu. Lë ni laꞌ huagu gunnaꞌ queëliꞌ nedaꞌ, Bönniꞌ Nuhuöaquëꞌ Gdu Bunách, le buluꞌë lahui Xuzaꞌ Dios nacaꞌ Zxiꞌnëꞌ.

²⁸Niꞌr gulanabnëꞌ Lëꞌ, taꞌnë́ꞌ: ―¿Bizxa run bayúdx guntuꞌ quië guntuꞌ le rdzag ladxëꞌë Dios?

²⁹Bubiꞌë didzaꞌ Jesús, rëꞌ lequëꞌ: ―Lë ni le rdzag ladxëꞌë Dios, quië tséjlëꞌliꞌ nedaꞌ, nacaꞌ nu bsölëꞌë Lëꞌ.

³⁰Niꞌr gulanabnëꞌ Lëꞌ, taꞌnë́ꞌ: ―¿Bizxa le nac bëꞌ runuꞌ, le gléꞌituꞌ quië tséjlëꞌtuꞌ Liꞌ? ¿Bizxa yöl‑laꞌ huac runuꞌ?

³¹Glahuëꞌ xuz xtauꞌruꞌ yöt xtil nazíꞌ lei maná lu latj caꞌz, ca nayúj lu guich laꞌy, rna: “Yöt xtil qui yehuaꞌ yubá bëꞌë quequëꞌ Moisés, glahuëꞌ.”

³²Bubiꞌë didzaꞌ Jesús, rëꞌ lequëꞌ: ―Le nactë rëpaꞌ lbiꞌiliꞌ: Clëg Moisés naꞌ bennëꞌ queëliꞌ yöt xtil qui yehuaꞌ yubá, san Xuzaꞌ Dios runnëꞌ queëliꞌ yöt xtil gdu qui yehuaꞌ yubá.

³³Yöt xtil naꞌ runnëꞌ quegac bunách Dios nacaꞌ nedaꞌ, lë naꞌ bruj yehuaꞌ yubá len runö́dzj quegac bunách yödzlyú ni yöl‑laꞌ naꞌbán.

³⁴Niꞌr tëꞌ Lëꞌ: ―Xan, benntecz queëtuꞌ yöt xtil naꞌ.

³⁵Jesús rëꞌ lequëꞌ: ―Nedaꞌ nacaꞌ yöt xtil nabánigac tsaz bunách. Nu zaꞌlen nedaꞌ, huölj gdzeꞌi tsaz nu naꞌ le nac queëꞌ Dios, atiꞌ nu tsejlëꞌ nedaꞌ, chnëꞌj tsaz le nac queëꞌ Dios.

³⁶Nac ca naꞌ chgudxczaꞌ lbiꞌiliꞌ, zal‑laꞌ rléꞌiliꞌ nedaꞌ, cutu caꞌ réjlëꞌliꞌ nedaꞌ.

³⁷Yúguꞌtë nup naꞌ runnëꞌ quiaꞌ Xuzaꞌ, lid quiaꞌ, atiꞌ nup naꞌ lid quiaꞌ, cutu usáꞌgacaꞌ‑nëꞌ.

³⁸Cni nac, le bötjaꞌ brujaꞌ yehuaꞌ yubá, clëg quië gunaꞌ ca rëꞌndaꞌ nédaꞌczaꞌ, san quië gunaꞌ ca rëꞌnnëꞌ Dios Xuz, nasölëꞌë nedaꞌ.

³⁹Lë ni le rëꞌnnëꞌ Xuzaꞌ nasölëꞌë nedaꞌ, rëꞌnnëꞌ cutu unitiaꞌ nitú nup naꞌ bennëꞌ quiaꞌ, san uspanaꞌ lequëꞌ dza udx.

⁴⁰Lë ni le rëꞌnnëꞌ Dios Xuz nasölëꞌë nedaꞌ, rëꞌnnëꞌ gataꞌ yöl‑laꞌ naꞌbán quequëꞌ, yúguꞌtë nup naꞌ laꞌleꞌi nedaꞌ, Zxiꞌnëꞌ, len laꞌyejlëꞌë nedaꞌ, atiꞌ nedaꞌ uspanaꞌ lequëꞌ dza udx naꞌ.

⁴¹Niꞌr gulanë́ꞌ queëꞌ Jesús bönniꞌ judío uná bëꞌ le gnëꞌ: “Nedaꞌ nacaꞌ yöt xtil naꞌ bötj, bruj yehuaꞌ yubá.”