SAN JUAN 6:17-39

¹⁷ꞌBa kionga je kuajñure nde, tunga tojo kje faꞌetjenngijín Jesús, jaꞌasꞌen barku, tuxi kjuaꞌaxtiukjani ndachikun nga kuaje Capernaum.

¹⁸ꞌBa tukjuan kuán jngu ntjo ꞌñu xi niki kiskjenitjen ndachikun.

¹⁹Kionga je echu ón asa jon kilómetro, kio tsabe nchjabiu nga Jesús ndibasun ndachikun nga titsitiñatꞌare barku, ꞌba kitsakjun.

²⁰Tunga Jesús kitsure: —An= ña̱. Bi kun.

²¹ꞌBa nchjabiu kuatsjare nga Jesús jaꞌasꞌen barku, ꞌba tukjiaꞌa echu sani nangi ña inyafi.

²²Nga kuanyujun xuta xi tsekꞌendu xingunda ndachikun tsabe nga tu jngu sani barku xi ꞌetju kio ꞌba nga Jesús bi jaꞌasꞌen nga kiko xutare, ngatꞌa tu kiji suba= xutare.

²³ꞌBa ꞌbatsaꞌen jaꞌe jó ján kjaꞌe barku xi ꞌetjuni Tiberias nga jaꞌetiña ña kiskine niñuxtila xuta, kionga Jesús je kitsjare kjuanda Naꞌenchana.

²⁴ꞌBamani, kionga xutankjiun tsabe nga Jesús bi nde kio tijñani ninga xutare, ꞌbatsaꞌen jaꞌasꞌen barkubiu nga kikangisjai kui naxinanda Capernaum.

²⁵ꞌBa kionga je kuasjaire xingunda ndachikun, kitsure: —Maestru, ¿kjiaꞌáñu jaꞌe ngaꞌe?

²⁶ꞌBa Jesús kitsingojore: —Kjuakixi= xi xin_nuu̱. Kjiꞌyañu kjuakun xi kitsaꞌaa̱n, tunga bi kui kjuañu teminyisjaininuu̱. Tu Ngatꞌare= nga nda kitsitsenu niñuxtila xi kichinio, kui kjuañu teminyisjainiñuu̱.

²⁷Bi ñaꞌaxa_ru xichine xi mare fe. Tusa tiꞌaxa_ru xichine xi bi fe, xi sjanu kjuabenichun xi bi fetꞌa. Kui xichinebiu xi sjanu Kiꞌndire Xuta xiꞌiun, ngatꞌa kui= xi ꞌexare Naꞌenchana.

²⁸ꞌBa nchjabiu kitsu: —¿Mé= xi tjinnere nga siꞌee̱n ji̱n, tuxi sikꞌetjusunnii̱ xa xi mejénre Naꞌenchana?

²⁹ꞌBa Jesús kitsingojo nganire: —Kui xa kibi xi mejénre Naꞌenchana nga sikꞌetjusun, nga tjinnere nga ku̱akjainnu ngatꞌare xi kitsikasen.

³⁰ꞌBa nchjabiu kitsu ngani: —¿Mé= kjuakun xi kuakutsejennii̱, tuxi xianii̱ ꞌba ku̱akjainni̱ ngatꞌa tsiji? ¿Mé= xa xi ñeꞌen?

³¹Joni xuta chingana, kui xi kiskine tsajmi xi chine xi mana ꞌmi kionga tsekꞌendu nangi tꞌaxiun. Ngatꞌa ꞌba=tsaꞌen kuaꞌindutꞌa enre Naꞌenchana: “Ngankꞌaa kikaꞌenire niñuxtila xi kiskine.”

³²ꞌBa Jesús kitsu: —Kjuakixi= xi xin_nuu̱. Bi Moisés xi kitsjanu niñuxtila xi jendibajenni ngankꞌaa. Tusa Naꞌenchana̱ tsja_nuu̱ ngandaꞌe niñuxtila xi kjuakixi xi ndibajenni ngankꞌaa.

³³Ngatꞌa niñuxtila xi tsja Naꞌenchana, kui= xi jendibajenni ngankꞌaa ꞌba mare tsikꞌendukun xuta ngasunꞌndebi.

³⁴ꞌBa nchjabiu kitsu: —Naꞌen, taꞌentsjainii̱ niñuxtilabiu.

³⁵ꞌBa Jesús kitsure: —An= ña̱ niñuxtila xi tsikꞌendukun xuta. Xi kjuaꞌe ngatꞌana̱ bi nde ku̱abojonire, ꞌba xi ku̱akjainre ngatꞌana̱ bi nde ku̱axindanire.

³⁶Tunga je kixin_nuu̱, ninga tsa teꞌyanuu̱ tunga bi tjimakjainnu.

³⁷Ngatsiꞌi xuta xi Naꞌenna̱ tsjana̱ kjuaꞌe ngatꞌana̱, ꞌba xi kjuaꞌe ngatꞌana̱ bi kꞌuaxjia̱ ngandetsian.

³⁸Ngatꞌa ngankꞌaa jendibajenña̱, tuxi sikꞌetjusunña̱ jotsaꞌen mejénre Naꞌen xi kitsikasenna̱ ꞌba bi jotsaꞌen an mejénna̱.

³⁹ꞌBa xi kitsikasenna̱ mejénre nga nijnguú sichajaa̱ xi je kitsjana̱. Tusa mejénre nga sikjaꞌaya ngani_ra̱ ngajinre mikꞌen xutabiu nga kjuetꞌa nixtjin.