SAN JUAN 6:15-36

¹⁵Pero Jesús conohe ixin cain chojni mé joinao na sarrojicao na Jesús masqui jehe rroc̈hoha para que jehe na rrojincheguinhi na Jesús rey de jehe na. Mexinxin sacjoi Jesús hasta tti con jna para que nchao tavehe jeho.

¹⁶Co are ondaconttie cain tti chojni que vacao Jesús xincanji na para ngain lago,

¹⁷co joixinhi na ngain ná barco co coexinhi na coattoa na lago mé para joiji na ngain Capernaum. Co rato mé ondaconaxin xehe co Jesús ẍa cjanha.

¹⁸Cottimeja coexinhi cjoa ná c̈hintto soji, co jinda anto soji cjamanguitaon chó nda.

¹⁹Co are osacjoi na inchin naho o incjaon kilómetro de ngandehe nda, jehe na vicon na que Jesús jitonchienhe ngain barco mé; conixin rotté jittjixin ngataonhe nda, co cain jehe na vintteẍaon na.

²⁰Pero jehe ndac̈ho ngain na: ―¡Janha joihi, ẍaonha ra!

²¹Cottimeja jehe na iẍaonha na co chonhe na Jesús para que jehe coani barco cai. Co rato mé ojoiji na ngain tti nontte que jehe na tettji na.

²²Ndoexin tti chojni que ndavittohe toenxin ndachaon tti sacjoixin Jesús conixin tti chojni que vacao, vintteguicon na que cain chojni que vacao Jesús savicao na jeho tti nacoa barco que vehe nttiha, co vintteguicon na que Jesús cjoiha ngain chojni mé.

²³Pero de cain yá, icanxin barco joixin de ngain ciudad de Tiberias co cjoi chiaon ngain lugar tti joinenxin na niottja después que Jesús joanjo gracias.

²⁴Mexinxin are vintteguicon cain chojni mé ixin iveha Jesús nttiha ni cain chojni que vacao jehe icoha na nttiha, cain chojni mé vixinhi na barco mé co sacjoi na para rajna Capernaum para joicjé na Jesús.

²⁵Are cain chojni mé vintteguiji na toenxin lago mé, nttiha viconxin na Jesús iná co joanchianguihi na co ndac̈ho na: ―Maestro, ¿quesa joihi nttihi?

²⁶Pero Jesús ndac̈ho ngain na: ―Janha rrindattjo ra ndoa que jaha ra ttjé ni ra ixin jointte ra hasta cojaha ra co jeha ixin jaha ra coinxin ra quehe rroc̈ho tti milagro que janha jointtaha.

²⁷Ncheha ra ẍa para ixin comida que ndattjexin, nchehe ra ẍa para ixin tti comida que ttjexinha co rrochjá ra iná vida naroaxin que ẍonhi tiempo tsjexin. Co janha, tti Xí que joixin de ngajni, rrochjaha ra tti comida mé ixin Dios Ndodana chjana joachaxin mé.

²⁸Cottimeja jehe na joanchiangui na co ndac̈ho na: ―¿Quehe chonda na que sinttaha na para que sinttaha na inchin Dios rinao?

²⁹Co Jesús ndac̈ho: ―Dios rinao que jaha ra ditticaon ra nganji na janha, tti jehe rroanha.

³⁰Cottimeja jehe na joanchianguihi na Jesús co ndac̈ho na ngain: ―¿Quehe señal nchao sinchehe jaha para que janha na sicon na co sitticanho na jaha? ¿Quehe cosa nchehe jaha?

³¹Nindogoelitona na ẍanc̈hjen joine na maná ngagaha jna inchin ndac̈ho tti libro que jitaxin Palabré Dios: “Dios joanjo niottja de ngajni para joine na.”

³²Jesús ndac̈ho: ―Janha rrindattjo ra ndoa que jeha Moisés tti joanjo niottja de ngajni ngain jehe na; Ndodana danjo tti mero nio que ndoa joixin de ngajni.

³³Ixin tti niottja que Dios danjo, mé tti jehe joinchexincanjinxin de ngajni para danjo ngain chojni iná vida naroaxin que ẍonhi tiempo tsjexin.

³⁴Cottimeja vinttendac̈ho jehe na: ―Soixin, chjana ra niottja yá cainxin nchanho.

³⁵Co Jesús ndac̈ho ngain na: ―Janha tti niottja que danjo vida. Tti chojni que tsí nganji co sitticaon nganji na janha, chojni mé ẍonhi tiempo senhe na jintta ni senhe na jinda.

³⁶Pero inchin ondattjo ra, jaha ra ditticaonha ra masqui ovicon ni ra.