SAN JUAN 5:6-19

⁶Are Jesús vicon que xí mé tajitsinga xa nttiha, jehe ovenohe ixin anto sé venihi xa. Mexinxin ndac̈ho ngain xa: ―¿Arinao rroxingamaha?

⁷Co jehe tti nihi mé ndac̈ho: ―Soixin, janha chondaha quensen rroẍangui na jinda are tsinguittjen nda. Cada nttiha que janha rinaho sihngui nda, ojé ni dingui nda icha saho.

⁸Jesús ndac̈ho: ―Dingattjen, co tsinhi caniaha co sattjixin de nttihi.

⁹Co rato mé jehe xí mé ndaxingamehe xa co tsín xa caniehe xa co coexinhi xa sacjoixin rotté xa. Pero ixin nchanho mé, mero nchanho para vanchejogaha na,

¹⁰chojni judío que vinttechonda joachaxin ndac̈ho na ngain jehe tti xí que xingamehe: ―Jai nchanho que ncheha ni ẍa, mexinxin jianha para que jaha tsame caniaha.

¹¹Tti xí mé ndac̈ho: ―Tti joinchexingamana ndachjenji na: “Tsinhi caniaha co sattji.”

¹²Cottimeja joanchiangui jehe na co ndac̈ho na: ―¿Quexehe tti ndattjo: “Tsinhi caniaha co sattji”?

¹³Pero tti xí mé venoeha quensen joinchexingamehe ixin Jesús sacjoi ngayehe tti anto tsje chojni que te nttiha.

¹⁴Después Jesús vetanxin tti xí mé ngain nihngo icha importante, co ndac̈ho Jesús ngain xa: ―Tsjenxin, jai jaha oxingamaha, mexinxin cjanha nchehe cosa jianha para que rrocjanha tsonha icha tangui.

¹⁵Cottimeja tti xí mé sacjoi co joindac̈ho ngain chojni judío que vinttechonda joachaxin ixin Jesús tti joinchexingamehe jehe.

¹⁶Mexinxin chojni mé joiningaconhe na Jesús co joinao na narrogoenxon na are maho ixin vanchehe Jesús jañá ngain nchanho que jiquininxinha nchehe ni ẍa.

¹⁷Pero Jesús ndac̈ho ngain na: ―Ndodana cainxin tiempo jinchehe Ndo ẍa, co janha cai rrinttaha ẍajeho ẍa mé.

¹⁸Mexinxin chojni mé icha joinao na narrogoenxon na Jesús, jeoha ixin vancheha Jesús caso ley tti nchanho que jiquininxinha nchehe ni ẍa, cai joinao na narrogoenxon na Jesús ixin jehe vandac̈ho ixin jehe inchin Dios are jehe ndac̈ho ixin Dios tti Ndodé jehe.

¹⁹Cottimeja Jesús ndac̈ho ngain na: ―Ndoa tti rrindattjo ra que janha, tti Xenhe Dios, c̈hoha sinttaha ni ná cosa inchin janho sinaho, jeho nttaha tti dicon nchehe Ndodana. Cainxin tti nchehe Ndodana, cai janha, tti Xenhe Ndo, sinttaha.