SAN JUAN 5:6-18

⁶Joon mo ganíi²in Jesús 'indo 'e raan¹in joon galɨli'³ Jesús 'e lɨ́ɨ¹‑ɨ nitsaa'¹³a 'ido joon nigajin'²in Jesús: ―¿Tɨ 'iin²¹²un 'láa²o?

⁷Joon gañii¹i 'in tsatsaa'¹³ do: ―Tsañʉʉ'¹, jo 'in seein²¹ taan'²i jna tsi pila no mo jøø'²¹ jmɨɨ²¹. La coon²¹ naa'¹³ mo 'iin²¹²na 'úu³uu 'in xee'²¹mo tsa'í² jéei¹gɨ lagɨ jna.

⁸Joon gajin'² Jesús sɨɨ'²¹ɨ 'in tsatsaa'¹³ do: ―Ráan²un no, joon saa'¹³ tyi¹ raan¹un, joon ngɨ² no.

⁹Joon tsifu joon ga'láa²mo 'in tsañʉʉ'¹ do. Joon gasaa'¹³ tyi¹ tya'a joon ga'láa² 'wii²¹² gangɨ¹ɨ. Pe 'e jmɨɨ²¹² joon jmɨɨ²¹² 'e 'ii'²¹ 'woo'²¹ tsá²,

¹⁰joon gajin'² 'in tsá² seein²¹ Israel 'in taan²¹²in do sɨɨ'²¹ɨ 'in tsá² ga'láa²i do: ―Jmɨɨ²¹² 'e 'ii'²¹ 'woo'²¹ tsá² no. Jo cwoo²¹i ngɨ²'ɨ, tyan²'an tyi¹ tyi'i.

¹¹Joon gañii¹i 'in tsañʉʉ'¹ do: ―'In gaun'láa²i jna joon gajin'²in sɨɨ'²¹ɨ jna: “Saa'¹³ tyi¹ raan¹un tsíin²un joon ngɨ² no.”

¹²Joon gaunngɨɨ¹ɨ 'ido jin'²in: ―¿'Iin gasɨɨ'²¹ɨ 'nʉ la joon 'e saa'¹³'a tyi² tyi'i joongɨ ngɨ² no?

¹³Pe 'in tsañʉʉ'¹ do jo ñii¹i 'iin 'in gaun'láa²i 'ii do tsʉ 'áa¹mo fúui¹ tsá² 'in taa²i do, joon Jesús ni'ngaa'¹³mo.

¹⁴Mo ngɨ́ɨ²i joon gajii²in Jesús 'in tsañʉʉ'¹ do co' cwo'¹ fee'¹ do. Joon gajin'² Jesús sɨɨ'²¹ɨ 'ido: ―Ni'láa²mo'o no, jo 'laa²¹²gɨ'ɨ sɨ no‑o gacɨ'² jo¹gɨ 'e mo lɨ́ɨ¹u'u do.

¹⁵Joon ganga'²mo 'in tsañʉʉ'¹ do ganijmaa'¹³a 'in tsá² seein²¹ Israel júu³ 'e Jesús do‑o 'in nigaun'láa²i 'ii.

¹⁶Joon tsʉ 'wii'¹³ gaun'láa²i Jesús 'in tsá² do jmɨɨ²¹² 'e 'ii'²¹ 'woo'²¹ tsá² 'e joon 'áai¹ gauntyíi²in 'in tsá² seein²¹ Israel do Jesús, 'iin²¹²in jnga'²mo 'ido.

¹⁷Pe Jesús‑gɨ gasɨɨ'²¹ɨ 'ido: ―Ñʉ'³ʉʉ gajmaa¹a to² ca jmɨɨ²¹² no la joon jna jon jmóo³oo to².

¹⁸'Wii'¹³ joon 'in tsá² seein²¹ Israel do 'áai¹gɨ gali'iin²¹²in jngaa'¹³i 'ido. 'Iin²¹²in jngaa'¹³i 'ido tsʉ jo gauntiin'¹³in 'e ley tya' jmɨɨ²¹² 'ii'²¹ 'woo'²¹ tsá², joon mo gajin'²in 'e Dios jmii²¹i joon gajmee¹i 'ña'a coon²¹ røø²¹mo coon'¹³ Dios Jmii²¹.