SAN JUAN 5:3-24

³Ajlüyiw quiaj xeyay moniün andeow: altiül nesomb, altiül necoex, altiül ndron ombas ngondom majüy. Teamacüliw ngow, cojores apmendalalüy a yow quiaj.

⁴Cos nguiajnguiaj iün nop ángel ocueaj Teat Dios maól a yow, ndoj jane ombas apmajmel tiül a yow quiaj apmajneaj iün andeow.

⁵Alquiaj nop naxey lamajiür nimiow gajpopeac (38) neat iün andeow.

⁶Teat Jesús tajaw alpiiüm quiaj, lamajaw lamajiür xeyay neat iün andeow a naxey quiaj, quiaj tasaj: ―¿Ngwüy indiüm mejneaja? ―aj.

⁷Quiaj tasaj nej aaga niün andeow: ―Teat, ngo najiür jane mayac xic tiül yow wüx apmendalalüy. Cos wüx lasamb sanajmel, quiaj lajmel alinop ombas nej ―aj nej.

⁸Quiaj tasaj nej Teat Jesús: ―Witiür, ixaing mitec ijüy ―aj.

⁹Andǘüban ajneaj a naxey quiaj, taxaing mitec nej, tajüy. Pero cos aaga nüt quiaj, noic nüt axoodaran,

¹⁰quiaj ajcüwa monajiüt tiül judíos tasajüw aaga naxey lajneaj quiaj: ―Nganüy nüt axoodaran, ngondom mexaing mejoy mitec ―ajüw.

¹¹Quiaj tasaj nejiw aaga naxey: ―Aaga neech xic najneaj, nej nesaj xic: “Ixaing mitec, ijüy” ―aj xic.

¹²Quiaj tatüniw nej manguiayiw: ―¿Jane aaga nesaj ic: “Ixaing mitec, ijüye”? ―ajüw nej.

¹³Naleaing aaga naxey quiaj ngo majaw jane netaag nej majneaj, cos tajlüyiw quiaj xeyay nipilan, nganüy Teat Jesús laáw quiaj.

¹⁴Condom Teat Jesús taxom nej tiül nadam nangaj iüm. Tasaj: ―Ijaw nganüy lerneaj, nde mendüy wüx merang nisoet, ngana maxom ic alinoic xeyay ngo majneaj ―aj nej.

¹⁵Condom tamb a naxey quiaj masaj ajcüwa monajiüt tiül judíos Teat Jesús netaag nej majneaj.

¹⁶Quiaj ajcüwa monajiüt tajcüyiw majawüw Teat Jesús, tayambüw ombas mambiyaw cos arang cuajantanej wüx nüt netam maxoodaran.

¹⁷Condom Teat Jesús tasaj nejiw: ―Xeteat meáwan nüt arang najiüt, ata xique aton ―aj nejiw.

¹⁸Quiájan ajcüwa monajiüt tandiümüw mambiyaw nej cos ngome áagan arang wüx nüt axoodaran, pero cos tayac atnej Dios nej wüx tapiüng miteat nej Teat Dios.

¹⁹Condom quiaj tasaj nejiw Teat Jesús: ―Naleaing naleaing sasaj icon, Micual Teat Dios ngondom marang nicuajind arángan; nej arang leaw ajaw arang miteat nej. Cos meáwan leaw arang miteat nej, átan micual nej alndom marang aton.

²⁰Teat Dios xeyay andiüm Micual Nej, üüch nej majaw meáwan leawa nej teamarang; aliüc miün apmüüch majaw alngün xeyay najneaj leawa icona apmbayameron mejawan.

²¹Cos Teat Dios apacüüch mondeow, atquiaj Micual Nej aton apmapacüüch jane nej andiüm.

²²Ngome nejay Teat Dios apmayac asoeteran, meáwan ayaj lamayac teowix Micual Nej.

²³Atquiaj meáwan nipilan netam marangüw casa Micual Nej atnej arangüw casa Teat Dios. Jane ngo mandiüm Micual Teat Dios, átan ngo mandiüm Teat Dios, cos Teat Dios neech nej miün.

²⁴’Naleaing sasaj icon: Jane apmayac omeaats wüx manguiay sandeac, aton mayar andeac aaga neech xic niün, nej apmapac meáwan nüt, lango majmel asoet. Apmapac meáwan nüt niüng ajlüy Teat Dios.