SAN JUAN 5:2-22

²Te ini ñuu mà iá iin pila cahnú tècuìí. Te yucán itánduhù stná ùhùn vehe nahi corredor. Te lugar mà, Betesda naniá, te yatni iá mà ndé iá iin yehè ñuu mà nani Yehè Riì.

³Pues divi vehe ma itánduhù cuáhà nècuàchì cuhí, nècuàchì cuaá, nècuàchì xicá cuéhê, nècuàchì yáha ga nì ìchì, xíndiatu nsidaa‑né ndacùchí tècuìí mà.

⁴Vàchi (cachí‑nè) cada yáha iin tiempu, dandu nuú iin ángel xi Dios dandácùchí xì‑té. Dandu nèhivì primeru quìhvi mahì‑té, icúmí‑nê nduvàha‑ne nùù cuèhè quida xi‑né, ndéni cuèhè nì cui ni cúndúá, icúmíâ cuxioa.

⁵Te yucán iá stná iin tiàa indúhu yuhù tècuìí mà, 38 cuìà icúmí‑nê cuèhè quida xi‑né.

⁶Dandu, nì xini Jesús jaàn indúhu‑né, te ináhá stná‑yà ñà‑càní cuìà iá‑nè xì cuèhè mà, ñàyùcàndùá, nì cachi‑yà xì‑né: ―Mii‑ní, ¿a cuní‑nî nduvàha‑ní?

⁷Dandu nì cachi‑nè xì‑yá: ―Señor, còò iin chindee xí na hora ndácùchí tècuìí, te quìhvi stnáì mahì‑té. Vàchi na meru sáì, dihna inga‑nè nì sàà‑nè nùí, te nuú‑né ndé ñuhú tècuìí.

⁸Dandu nì cachi Jesús xì‑né: ―Ndacuiìn‑ní, ndanihi‑ní camilla xi‑ní, te caca‑ní.

⁹Dandu vichi vichi nì nduvàha nècuàchìmà nì ndanihi‑ne camilla xi‑ne, nì nacaca‑ne cuàhàn‑nè. Te quìvì yucán, quìvì descansu nduá.

¹⁰Ñàyùcàndùá, nì cachi dava nècuàchì ñuu mà xì nècuàchì nì nduvàha ma: ―Quìvì descansu nduá vichi. Còò ley xi‑nda cunsida‑ní camilla xi‑ní.

¹¹Dandu nì cachi tiàa ma xi‑né: ―Nècuàchì nì dàndúvàha xí, nì cachi‑nè xìˊ: “Ndanihi‑ní camilla xi‑ní, te caca‑ní”.

¹²Dandu nì ndàcàtnùhù nèhivì mà nùù tiàa ma, cachí‑nè: ―¿Ana divi nì cachi xì‑ní ducán?

¹³Doco nècuàchìmà, có‑ìnáhá‑nê nansa nani ana nì dàndúvàha xi‑né, vàchi sàcuàhàn Jesús, te cuàhà gá nèhivì ndoó lugar yucán.

¹⁴Daaní, después nì ndacùhun tnahá‑yá xì‑né na xicánúú‑né patiu veheñùhu, te nì cachi‑yà xì‑né: ―Vichi sànì nduvàha‑ní. Màsà náxícócuîìn‑ní quida‑ní cuàchi, còtó quixi iin tnùndoho chicá fuerte dìquì‑ní.

¹⁵Dandu tiàa ma, nì sàhàn‑nè nì cachitnùhu‑ne xì nècuàchì raza‑nèmà ñà‑divi Jesús nduú ana nì dàndúvàha xi‑né.

¹⁶Ñàyùcàndùá nì caxini ùhì nècuàchì yucán mii‑yá, te nì quesaha‑né ndatnúhú‑nê nansa cahnì‑néyà ñà‑nì quida‑ya milagru mà iin quìvì descansu.

¹⁷Dandu nì cachi‑yà xì nsidaa nècuàchì yucán: ―Yuamánìˊ, iin‑ni quidáchúûn‑yá nsìquívì, ñàyùcàndùá ducán quidá stná yùhù.

¹⁸Ñàyùcàndùá chicá más nì cuni nècuàchì ladu Judea mà cahnì‑néyà, vàchi màdì cuisì‑ní có‑chîvàha viì‑yá quìvì descansu (cahan‑né), sino que nì cachi stná‑yà Dios nduú Yua‑yá, te ducán ndudává stnahá‑yá xì mii Dios.

¹⁹Dandu nì naxiconihí‑yá nùù nècuàchìmà, cachí‑yà: ―Cunini‑nsia palabra yohó cachíˋ. Mií mà cúí quide ni‑iñàha, cuisì ñà‑ndùá sànì xinì quidá stná Yuamánìˊ Dios, vàchi nacua quidá mii‑yá, divi ducán icúmî quida stnáì.

²⁰Cunaha‑nsiá, cuú ini‑yà sàhí, te nsidaa obra ndiaha quidá mii‑yá, ñà‑jaàn dacuní stná‑yà yùhù quide. Te vichi sànì xini‑nsià iin ùì milagru, doco cuàhà obra chicá ndiaha icúmí‑yâ dacuní‑yà yùhù, dandu más gà icúmí‑nsiâ ndulocó‑nsià.

²¹Vàchi nacua danátiácú‑yà nècuàchì nsìi, te nacuàha‑yanè vida, divi ducán quidá stná yùhù. Ñàyùcàndùá, vàtùni danátiácú stnáì ndéni nèhivì ní cui cudíì inì.

²²Te có‑nsìdándáà‑yà sàhà cuàchi nèhivì, vàchi ndahà yùhù sànì dàyáha‑ya chuun jaàn.