San Juan 5:11-20

¹¹—‍Yʉhʉre yʉhʉ dohatiyere cohãriquiro pehe ohõ saha nidi yʉhʉre: “Mʉhʉ cuñari cahserore ne cãhña”, nidi tiquiro yʉhʉre, ni yʉhtiahye dohatimediquiro.

¹²—‍¿Tire mʉhʉre sa nidiquiro pehe noa boro ijiari tiquiro? ni sinituahye tiquina.

¹³Topʉ masa peyequina tiquina ijigʉ̃ ihñano Jesu pehe waha tuhasari. Sa yero dohatimediquiro pehe tiquirore yʉhdʉoriquiro wamene masiedahye.

¹⁴Came Cohãcjʉ̃ wʉhʉpʉ Jesu tiquirore piti ca yahuri: —‍Tʉhorĩña mʉhʉ yʉhʉre. Yojopʉre quehnoano pagʉ tire mʉhʉ. Ñañene ye nemoedacãhña. Pari turi ñañene ye nemogʉ mʉhʉ dohatiriro yʉhdʉoro wahagʉta mʉhʉ, nidi Jesu tiquirore.

¹⁵Tiquiro sa nidi bato dohatimediquiro pehe ʉsã judio masa pʉhtoa tiquirore sinituriquina cahapʉ esaro yahuahye tiquinare: —‍Jesu wame tiriquiro yʉhʉre yʉhdʉgʉ̃ yeri, ni yahuahye tiquiro.

¹⁶Sa ye saurú ijigʉ̃ dohatiriquirore tiquiro dohatiyere Jesu cohãgʉ̃ masiñe, judio masa ʉsã pʉhtoa pehe tiquirore ñano ye dʉcari.

¹⁷Sa ñano tiquirore tiquina ye duagʉ̃ masino Jesu pehe yahuri tiquinare: —‍Yʉhʉ Pacʉ yojopʉre dahrarĩno nine. Yʉhʉ gʉ̃hʉ dahrarĩi niaja, ni yahuri tiquirore ñano ye duayequinare.

¹⁸Tiquiro sa nigʉ̃ judio masa ʉsã pʉhtoa pehe tiquiro mehna tutuaro usuaye, to pano tiquina nidiro yʉhdʉoro tiquirore wejẽ duari. Saurú decore tiquina sori decore ihcãquiro dohatiriquirore tiquiro yʉhdʉogʉ̃ ihñañe tiquina usuari. Sa usuaye tiquiro Cohãcjʉ̃re “Yʉhʉ Pacʉ”, nigʉ̃ tʉhoye, tiquina pehe to pano tiquina nidiro yʉhdʉoro usua nemoahye tja. “ ‘Yʉhʉ Pacʉ’, nino Jesu tiquiro basi ‘Cohãcjʉ̃ mehna ihcãno saha ijiaja’, ni wacũaga tiquiro”, ni tʉhoturi judio masa ʉsã pʉhtoa.

¹⁹Sa ye Jesu tiquinare yahuari: —‍Ijirota niita niaja mʉsare. Yʉhʉ Cohãcjʉ̃ macʉ, yʉhʉ esa tuharo yeraja. Yʉhʉ Pacʉ tiquiro yerire ihñagʉ̃, tire yeaja.

²⁰Yʉhʉ Pacʉ yʉhʉre tiquiro macʉre cahĩne. Sa yero tiquiro yerire yʉhʉre ihño pehore. Ahri yojopʉ tiquiro tutuaye mehna yʉhʉ yeri yʉhdʉoro tiquiro apeyere ye dutirota yʉhʉre. Tiquiro sa ye dutigʉ̃ tiquiro tutuaye mehna ye ihñoutja yʉhʉ. Sa yena ihña maria wahanata mʉsa.