San Juan 4:9-41

⁹Tyicuan ta ñaha Samaria cuan catyí ña chi ra Jesús: ―Yoho cha cuvún noo ra ñuu Israel, ¿yoso caa cha chicón ndutya cohun chi yuhu cha cuví ñaha Samaria? ―catyí ña vatyi ñu Israel ña vaha iyó ñu chihin ñu Samaria.

¹⁰Tyicuan ta ra Jesús nacaha̱n ra ta catyí ra: ―Tyehe ta chitón cha chahá Nyoo, ta chitón yóó cha chicán ndutya chuun, maun cucacon ndutya chii. Ta yuhu cuhve ndutya nyitó chuun ―catyí ra chi ña.

¹¹Tyicuan ta catyí ña chi ra: ―Tata, ni ñahri vihi chihin tavon ndutya ihya. Vatyi yavi ihya cono xaan. ¿Nya cuquehun ndutya nyitó cuhvon cohi?

¹²Vatyi sutu chahnu yo, ra Jacob sandoo̱ ra yavi ihya chi yo. Ta suri ihya chihi̱ tucu maa ra ndutya. Ta suri ihya chihi̱ tucu sehe ra ta quɨtɨ sana ra. ¿Atu cahnu ca ra cuví yoho ican saha ra cuan? ―catyí ña chi ra.

¹³Tyicuan ta nacaha̱n ra Jesús ta catyí ra chi ña: ―Tandɨhɨ ñu chihí ndutya ihya, cu ityi ca ñu ndutya.

¹⁴Soco ñu chihí ndutya cha chahá yuhu, ma cu ityi ca ñu. Vatyi ndutya cha chahí chi ñu cucaña chi tari noo ndohyo chichi añima ñu tacuhva coo ñu ñayɨvɨ̱ cha ma naa ca maa ―catyí ra chi ña.

¹⁵Tyicuan ta quichaha catyí ña chi ra: ―Tata, cu̱hva ndutya cuan cohí, tacuhva cha ma cu ityi que ndutya, ta ni ma quichi que quichi tave ndutya chichi yavi ihya ―catyí ña chi ra.

¹⁶Tyicuan ta ra Jesús catyí ra chi ña: ―Cua̱han cuacana chi yɨun ta qui̱chun ―catyí ra chi ña.

¹⁷Ta nacaha̱n ña ta catyí ña: ―Yori yɨi iyó ―catyí ña. Tyicuan ta catyí ra Jesús chi ña: ―Ndicha cha cahun, vatyi yori yɨun iyó.

¹⁸Vatyi cha ohon tahan yɨun chiyo̱, ta ra nyaá chuhun vityin ñima yɨun cuví chi ra. Ndicha tuhun cha cahún ―catyí ra chi ña.

¹⁹Cha chiñi̱ ña tuhun caha̱n ra, quichaha catyí ña chi ra: ―Tata, tuví iñi vatyi noo profeta cuenda Nyoo cuvún.

²⁰Sutu chahnu ndi, ra Samaria, sacahnu̱ ra chi Nyoo yucu ihya. Soco nyoho ñu Israel catyí ndo vatyi Jerusalén yucuan tahán chi sacahnu yo chi Nyoo ―catyí ña chi ra.

²¹Tyicuan ta ra Jesús nacaha̱n ra ta catyí ra chi ña: ―Chi̱no iñun tuhun cahín chuhun. Vatyi vachi cuhva vatyi cusacahnu ndo chi Sutu yo Nyoo. Soco ña chiñuhú ri cha quichi ndo yucu ihya o cuhun ndo nya Jerusalén.

²²Nyoho ñu Samaria, ña chitó ndo yóó chi sacahnú ndo. Soco nyuhu chitó ndi yóó chi sacahnú ndi. Vatyi chitó ndi vatyi cuenda noo ra Israel cuasacacu Nyoo chi ñáyɨvɨ.

²³Soco chaa chi cuhva ta cuhva cuan nyaa yo vityin vatyi ñáyɨvɨ cha ndicha sacahnú chi Sutu yo Nyoo, cusacahnu ñu chi ra chihin añima ñu ta cha ndicha. Tari cuhva saquehen ityi Tatyi Ii Nyoo chi ñu. Vatyi Sutu yo Nyoo tyicuan caa cuñí ra cha sacuvi ñu cha sacahnú chi ra.

²⁴Vatyi Nyoo Tatyi Ii cuví ra. Ta ñu sacahnú chi ra cuñí chi sacahnú ñu chi ra chihin cha ndicha tari cuhva saquehen ityi Tatyi Ii chi ñu ―catyí ra chi ña.

²⁵Ta nacaha̱n ña ta catyí ña chi ra: ―Yuhu chité vatyi cuquichi ra cuví Mesías, ra Cristo, ra cuvi rey chi yo. Ta quɨvɨ quichi ra, maa ra cunacatyi tandɨhɨ chi yo ―catyí ña chi ra.

²⁶Tyicuan ta nacaha̱n ra Jesús ta catyí ra chi ña: ―Ra cha cahún tuhun cuan, ican ra cahán chuhun ―catyí ra chi ña.

²⁷Tyicuan ta canachaa̱ coyo ra cachicá noo chihin ra ta iyo cacuñí ra cha ndatuhún ra Jesús chihin noo ñaha sɨhɨ. Soco ni noo ra ña cañá iñi ra ndaca tuhun ra ñáá cha cuñí ra o ñáá cuenda ndatuhún ra chihin ñaha cuan.

²⁸Tyicuan ta sandoo̱ ña quɨyɨ ña ta cuanuhu ña chichi ñuu. Ta catyí ña chi ñáyɨvɨ ñuu ña:

²⁹―Ña̱ha ndo cunyehe ndo chi noo ra cha catyi̱ tandɨhɨ cha cai. ¿Atu ñima ra Cristo cuví ra? ―catyí ña chi ñu.

³⁰Tyicuan ta quita̱ coyo ñu ñuu cuan ta cuahan coyo ñu nu nyaá ra Jesús.

³¹Ta cha nɨri ca cha cumañi chaa ñu nu nyaá ra, ra cachicá noo chihin ra, sanɨñɨ́ ra chi ra na cachi ra chiin. Ta cacatyí ra chi ra: ―Maestro, ca̱chi chiin ―catyí ra.

³²Soco catyí ra Jesús chi ra: ―Yuhu iyó noo nyayu cuacachi, ta nyoho ña chitó ndo ―catyí ra chi ra.

³³Tyicuan ta ra cachicá noo chihin ra quichaha candaca tuhun ra chi ra tahan ra, ta catyí ra: ―¿O iyó yóó cha quichi̱ nyaca cha cachi ra, vaha? ―cacatyí ra.

³⁴Soco ra Jesús catyí ra chi ra: ―Cha chachí yuhu ican cuví cha sacuví cuhva cuñí ra cha tachi̱ chii ta sacuví tyiño chaha̱ ra chii.

³⁵Nyoho catyí ndo: “Soco cumañi ca cumi yoo ta naquehen yo cha tachi̱ yo.” Soco yuhu catyí chi ndo vatyi nye̱he ndo ta sa̱ha ndo cuenda cha cuaha ñáyɨvɨ cuñí ñu quichi ñu chihin, cuví ñu tari noo itu cha cuaan ta cuñí chi cha cahnu yo nɨñɨ.

³⁶Ra cha naquehén nɨñɨ cuan ñihi ra yahvi ra. Ta nɨñɨ cha naquehen vaha ra cuví ñu cha ñihi noo ñayɨvɨ̱ cha ma naa ca maa. Ta tyicuan caa cuví tacuhva vatyi ra cha tachí, ta ra cha naquehén nɨñɨ cuan ɨɨn ri cacusɨɨ cuñi ra.

³⁷Ta iyó noo tuhun ñayɨvɨ̱ cha catyí vatyi sɨɨn ñu tachí ta sɨɨn ñu naquehén nɨñɨ. Ta ndicha tuhun cuan.

³⁸Yuhu sacuhi̱n chi ndo vatyi cucahnu ndo nɨñɨ cha iyó nu ña saha̱ tyiño ndo. Vatyi inga ra saha̱ tyiño. Ta nyoho nyari cucahnu ndo ta naquehen vaha ndo nɨñɨ cuan ―catyí ra Jesús chi ra.

³⁹Ta cuaha xaan ñu ñuu Samaria cuan canachino̱ iñi ñu chi ra Jesús cha cuenda cha catyi̱ ñaha cuan, vatyi catyí ña: “Catyi̱ ra tandɨhɨ cha cai chii”, catyí ña.

⁴⁰Ta cuhva cha cachaa̱ coyo ñu Samaria nu nyaá ra Jesús, cha cundahvi̱ ñu nuu ra nandoo ra chihin ñu. Ta ra Jesús ndoo̱ ra yucuan uvi quɨvɨ chihin ñu.

⁴¹Ta cuaha ca ñu cachino̱ iñi ñu cha chiñi̱ ñu tuhun cahán maa ra.