SAN JUAN 4:8-18

⁸Már ddatjsɛ car Jesús, como ya xquí ma nʉ jár centro car jñi̱ni quí möxte cʉ mbá yojmi. Xquí möjmʉ du töjmʉ te di zijʉ.

⁹Car bbɛjña̱ ʉ́m Samaria bi da̱j ya bbʉ, i̱na̱: ―¿Dyoca̱ guí öjqui deje pa gui tzi, siendo gúr judioguɛ? Nuguigö, dúr mi̱ngu̱ hua Samaria.― Car bbɛjña̱ bi ma̱n nʉr palabra‑nʉ porque cʉ judio jí̱ mí johui cʉ́m Samaria, cja̱ jí̱ mí ntzixihui.

¹⁰Pé bi da̱h car Jesús, bi hñi̱mbi: ―Bbʉ gri pa̱di toguigö hne̱ ja i ncja car nzajqui ca rí hñe̱h ca Ocja̱, nubbʉ, nuquiguɛ güi dyöjqui deje pa güi tzi. Car deje ca gua ddahquigö, i úngui nzajqui cʉ to i tzi.―

¹¹Nubbʉ, pé bi ma̱n car bbɛjña̱: ―Nuquɛ, tada, jin te guá tu̱ pa grí cjʉx car deje, cja̱ rá ndo je̱ nʉr ttöti. ¿Jabʉ güi tu̱ car deje güi ddajqui, car deje guí ma̱nguɛ da ddajqui cam nzajqui?

¹²Casʉ, ¿más guí mandadoguɛ ni ndra ngue ca ndom tajʉ, car Jacobo? Guegue mí tzi nʉr deje‑nʉ́, guejti quí ba̱jtzi cja̱ co quí zu̱we̱ mí tzijʉ, cja̱ bi zoguije na̱r ttöti‑ná̱.―

¹³Pé bi da̱h car Jesús, bi xifi: ―Na̱r deje i po na̱r ttöti, bbʉ to da zi, pé xta yojpi xta du̱tjetjo.

¹⁴Nu car deje dí xihqui, ca to da zi, ya jim pé da yojpi da du̱tje. Como car deje dí un yʉ cja̱hni, da ncja ngu̱ hnar pøtje ca jin gui xö. Segue ba pøh car deje pʉ mbo ʉ́r tzi mʉy car cja̱hni, i un car nzajqui ca jin da tjegue.―

¹⁵Diguebbʉ ya, bi ma̱n car bbɛjña̱: ―Nuquɛ, tada, ddajqui tzʉ car deje ca guí ma̱nguɛ, pa ya jin gu tu̱tje, cja̱ ya jin da nesta gu e̱cua, hne̱ gu cjʉxi deje.―

¹⁶Car Jesús bi xih, bbʉ: ―Ma bú mahti quer da̱me, cja̱ gu e̱jmi hua.―

¹⁷Bi da̱h car bbɛjña̱, bbʉ: ―Jin te dí hñi̱jcö da̱me.― Nu car Jesús bi hñi̱mbi: ―Rá zö nʉ xcú ma̱. Jin te guí pɛhtzi da̱me.

¹⁸Porque xcú yojmi cʉtta quir da̱me, cja̱ nu ca guí bbʉbi ya, guejti‑ca̱ jí̱ ir da̱me. Cierto nʉ xcú xijqui.―