San Juan 4:6-52

⁶Ompa okatka n atékochtli non okiliayah poso de Jacob. Jesús omotlali inakastla n atékochtli porke osotlawatoka de onejnentiwalaya. Okatka kemi tlajko tonati.

⁷Ijkuakó se siwatl de Samaria okikixtiko atl, Jesús okili: —Techonmaka siki atl, maniatli.

⁸Itlamachtijkawah yoyajtokah kan altepetl okikuatoh tlan kikuaskeh.

⁹Ijkuakó n siwatl de Samaria okinankili: —¿Tleka techtlajtlanilia atl, amo tikmati ne de Samaria iwa tejwatsi judío? N judíos amo monotsah iwa non de Samaria.

¹⁰Ijkuakó Jesús okinankili: —Tla tikixmatiskia tlan Dios kitetliokolia iwa tikmatiskia akin mitstlajtlanilijtok atl, te monewia tiktlajtlaniliskia atl, iwa Ye mitsmakaskia n atl non ika tiyolitos nochipa.

¹¹N siwatl okili: —Tlakatl, n atékochtli wejkatla iwa amo tikpia tlan ika tikixtis atl. ¿Kan tikixtis nin atl non ika niyolitos nochipa?

¹²Towejkatata Jacob otechkajtewili nin atékochtli. Ye, ipilwah iwa iyolkawah nika oatlikeh. ¿Mach te okachi tiweyixtok ke ye?

¹³Jesús okinankili: —Nochteh akimeh nika atlih, oksepa amikiskeh,

¹⁴pero akin konis n atl non Ne nikmakas, ayik oksepa amikis. Porke n atl non Ne nikmakas, mochiwas itech ye kemi se améyali, kan mextos n atl non ika yolitos nochipa.

¹⁵Ijkuakó n siwatl okili: —Tlakatl, techmaka kiné non atl, ijkó ayakmó niamikis, iwa ayakmó oksepa nikixtiki atl nika.

¹⁶Jesús okili: —Xio xiknotsati mookich iwa oksepa xiwiki.

¹⁷N siwatl okinankili: —Ne mach nikpia nookich. Jesús okili: —Milák tlan tikijtoa, nik amo tikpia mookich,

¹⁸porke yotikimpapatlak mákuilteh tlakah, iwa non axa iwan tika noiwa amo mookich. Milák tlan tikijtoa.

¹⁹N siwatl okili n Jesús: —Tlakatl, nikita tejwatsi tiprofeta.

²⁰Towejkatatawah okiweyiliayah Dios itech nin tepetl. Pero nomejwah non de Judea nonkijtoah moneki matikweyilikah Dios kan Jerusalén.

²¹Jesús okili: —Siwatl, xikneltoka, ajsiki tonati ijkuak nomejwah weletis nonkiweyijkachiwaskeh Dios maya amo nonwitseh itech nin tepetl nion nonyaskeh Jerusalén.

²²Nomejwah mach nonkixmatih akin nonkiweyijkachiwah, pero tejwah tijudíojteh tikixmatih Akin tikweyijkachiwah, porke n temakixtílistli wits por n judíojteh.

²³Pero ajsiki n tonati, iwa ya yoajsiko, ijkuak akimeh de milajka kiweyijkachiwah Dios, kiweyijkachiwah Totajtsi ika inmespíritu iwa ika tlan milák, porke Totajtsi kintemoa akimeh kiweyijkachiwaskeh.

²⁴Dios, Ye Espíritu, iwa akimeh kiweyijkachiwah moneki makiweyijkachiwakah ika nochi inyolo iwa de milajka.

²⁵N siwatl okili: —Ne nikmatok wits n Mesías —non Itoka Cristo—, iwa ijkuak Ye wits, techajsikamatiltis nochi.

²⁶Jesús okinankili: —Ye Ne, Akin axa timotlapowijtok íwa.

²⁷Ijkuakó oajsikoh itlamachtijkawah n Jesús iwa omotlajtlachialtijkeh ijkuak okitakeh n Jesús motlapowijtok iwan se siwatl. Pero amaka omixewi kitlajtlanis tlan okinekia non siwatl, noso tlan okimolijtokah.

²⁸Ijkuakó n siwatl okikakajte iaxoktsi iwa oyá kan ialtépeu, iwa okinmilito n tlakah:

²⁹—Xiwikih, xikitakih se tlakatl non onechili nochi tlan onikchi. ¿Amo Ye n Cristo?

³⁰Ijkuakó n tlakah de non altepetl okiskeh okitatoh n Jesús.

³¹Ijkuakó itlamachtijkawah okitlatlaujtiayah n Jesús: —Tlamachti, ximotlamasewi.

³²Pero Ye okinmili: —Ne nikpia itla tlan nikmomajsewis tlan nomejwah amo nonkixmatih.

³³Ijkuakó itlamachtijkawah opé motlatlajtlaniah: —¿Chamo aka okwalikili tlan kimomajsewis?

³⁴Pero Jesús okinmili: —Notlakual ye manikchiwa tlan kipaktia Akin onechaltítlanki, iwa maniktlami iteki.

³⁵Nomejwah nonkijtoah: “Ok poliwi nawi mestli para mopixkas.” Pero Ne nomechilia: Xiyektlachiakah iwa xikimitakah n tlátookteh, yotlachikawak iwa ya kuali se pixkas.

³⁶Akin tlaoololoa kiselia itlaxtlawil, iwa tlan koololoa, koololoa para ayik tlamis, iwa ijkó akin tlatooka iwa akin pixka, sansikah yolpaktoskeh.

³⁷Milák, ijkó kemi kijtoa n tlájtoli: “Se akin tooka, iwa ok se akin pixka.”

³⁸Ne onomechtítlanki xipixkatih kan amo onontookakeh. Oksikimeh otookakeh, pero axa nomejwah nompixkaskeh kan yejwah otookakeh.

³⁹Miakeh tlakah de Samaria okineltokakeh n Jesús por tlan okinmatilti neká siwatl, ijkuak okinmili: “Ye onechili nochi tlan yonikchi.”

⁴⁰Yika ijkuak n samaritanos owalajkeh inawak Jesús, okitlatlautijkeh mamokawa ínwah. Iwa Ye omoka ompa ome tonati,

⁴¹iwa oksikimeh noiwa okineltokakeh n Cristo Jesús ijkuak okikakeh tlan Ye inewia okimiliaya.

⁴²Iwa okiliayah n siwatl: —Axa tikneltokah pero amo san por tlan otikijto, yej porke tonewiah yotikkakeh, iwa axa kuali tikmatokeh milák Ye n Cristo, non kinmakixtis n tlaltikpaktlakah.

⁴³Ome tonati satepa, Jesús okiski de Samaria iwa oyá Galilea.

⁴⁴Porke inewia n Jesús okijtojka, nion se profeta kitlakitah kan otlakatki.

⁴⁵Ijkuak Jesús okalakito Galilea, n tlakah okiyekselijkeh, porke noiwa oyajkeh Jerusalén itech ilwitl de Paskua, iwa ompa okitakeh nochi tlan Ye okichi itech non ilwitl.

⁴⁶Ijkuakó Jesús oksepa omókopki kan altepetl de Caná de Galilea, kan okikopki vino n atl. Ompa okatka se tekiwa de n rey akin okipiaya se itelpoch non omokokoaya. Ye okatka Capernaúm.

⁴⁷Ijkuak n tekiwa okima Jesús omokopato de Judea iwa okalakiko Galilea, okitato iwa okitlatlaujti mawia icha iwa makipajtiti itelpoch porke yomiktoka.

⁴⁸Ijkuakó Jesús okili: —Nomejwah mach nonnechneltokah, tla amo achto nonkitah se milagro.

⁴⁹Pero itekiwa n rey okili: —Tejwatsi, xiwalmuikatiwetsi, amo kichiwa mikis notelpoch.

⁵⁰Ijkuakó Jesús okinankili: —Ximokopa mocha, motelpoch yolitok. N tlakatl okineltokak tlan Jesús okili, iwa omókopki icha.

⁵¹Ijkuak n tekiwa ya onajsia icha, sikimeh itlakawah okinamikikoh iwa okilijkeh: —Mopiltsi yolitok.

⁵²Ijkuakó ye okintlajtlani kemi tlan oras opé kuali momachilia itelpoch, iwa yejwah okilijkeh: —Yala, la una de tiotlak, okikajka n totonik.