SAN JUAN 4:5-22

⁵Te ni jinū yā ɨɨn ñuu región Samaria jeē naní Sicar, yajni ñuhun jeē ni jéhe Jacob nuū séhe de José nde jenahán.

⁶Te yūcuan íne pozo jeē naní pozo Jacob. Te ni cucōo Jesús xiin pozo un, chi ni cuīta yá jeē cuahán yā ichi. Te nájnūhun cahuxī uū cúu.

⁷Te ni quee ɨɨn ñahan Samaria, vēji ña vequihin ña ndute. Te ni cahān Jesús jiín ña: Cuāha ní ndute coho ná, áchí yá.

⁸Te tēe cáscuáha jíín yá, chi je cuangoo de nde ñuu, cuacuaan de jeē cáji de jíín yá.

⁹Te ñahan Samaria un ní cahān ña jíín yá: ¿Ndese cúu jeē jicán ni ndute nuū ná coho ní? Chi tēe hebreo cúu ní, te ñahan Samaria cúu ná, áchí ña. Súcuan ni cahān ña, chi ñayuu hebreo tu cácahān i jíín ñáyuu Samaria.

¹⁰Te ni cahān Jesús: Núu jeē jiní ni ndese cúní Yaā Dios sáha ya jeē váha níhín, jíín ndé ɨɨn cúu sāña jéē jicán na ndute nuū ní, yūcuán na te máá ní cacān ni núū ná, te cuāha ná ndute jeē cótecu ni nɨ́ɨ́ cáni sáha, áchí yá.

¹¹Te ni cahān ña jíín yá: Tátā, yōhyo cúnú pozo yáha, te tú na vé ndahá ní jéē táva ní ndute. Núu súcuan ¿te ndé nuū nihín ni ndute jeē cótecu na sáha?

¹²¿Te á cújéhnu ga maá ní vēsú jií yō Jacob, chí naún? Chi máá de ni stóo de pozo yáha nuū yō. Te yāha ní cajihi máá de ndute, jíín táca séhe de, jíín quɨtɨ ndéca de. Achí ña.

¹³Te ni cahān Jesús: Tāca ñáyuu jeē jíhi ndute yáha, chi jichī tucu i.

¹⁴Te ñayuu coho ndute jeē cuáha na núū i, chi ma jichí cuɨtɨ gā i. Chi ndute jeē cuáha ná un, cane ini i nájnūhun ndute jeē cáne ñuhún, te sáha jeē cotecu i nɨ́ɨ́ cáni, áchí yá jiín ña.

¹⁵Te máá ña tu ní jécūhun ni ña, te ni cahān ña jíín yá: Tátā, cuāha ní ndute ún coho ná, návāha ma jichí cuɨtɨ gā ná, ni tuá jíni ñúhun quiquihin ná ndute pozo yáha, áchí ña.

¹⁶Te ni cahān Jesús jiín ña: Cuácana ní yɨɨ ní te quiji ní jíín de, áchí yá.

¹⁷Te ni cahān ña: Tú yɨɨ ná íyó. Te ni cahān Jesús: Ndaā cahán ni jéē tú yɨɨ ní íyó.

¹⁸Chi je ni cuu uhūn yɨɨ ní, te tēe ndéca ní vijna chi nasūú yɨɨ ní cúu de. Yāha cúu jeē ni cáhān ndaā ní, áchí yá.

¹⁹Te jeē súcuan ni cahān yā, te ni cahān ña: Tátā, ɨɨn tēe nácani jnūhun Yaā Dios cúu ní, jéni ni ná.

²⁰Tāca jíí na ñáyuu Samaria, yucu yáha ní cachiñúhún i Yaā Dios. Te máá ní ñayuu hebreo, cácahān ni jéē ñuu Jerusalén cúu nuū cánuú chiñúhún yó yā, achí ña.

²¹Te ni cahān Jesús jiín ña: Nánā, candíje ní jnúhun cáhán na, chi quee quɨvɨ̄ jeē ni nasūú yucu yáha ni nasūú ñuu Jerusalén cúu nuū chiñúhún ní maá Yaā cúu Tátá, chi ndɨhɨ‑ni lugar te cuu chiñúhún ní yá.

²²Máá ní ñáyuu Samaria tu cájini ni ndé ɨɨn cúu jeē cáchiñúhún ní. Te máá ná jijnáhan ná chi cájini na ndé ɨɨn cúu jeē cáchiñúhún ná. Chi nde nuū maá ná jijnáhan ná ñáyuu hebreo cúu nuū véji Yaā jnama ñayuu.