San Juan 4:4-19

⁴Ga niꞌ zijëꞌ, run bayúdx tödëꞌ luyú Samaria.

⁵Cni guc, bdxinëꞌ Jesús tu yödzdauꞌ luyú Samaria, nazíꞌ lei Sicar, gal‑laꞌ ga dë yu naꞌ bunödzjëꞌ Jacob queëbiꞌ José queëꞌ dza niꞌtë.

⁶Latj naꞌ zoa tu yeru nis nachöꞌnëꞌ ga rëꞌ Jacobo naꞌ. Catiꞌ bdxinëꞌ niꞌ Jesús, gröꞌë raꞌ yeru nis naꞌ le yajxáquiꞌnëꞌ yuꞌë nöz. Guc gdu huagbídz.

⁷Niꞌr bdxinnu niꞌ ngul Samaria quië siꞌnu nis. Jesús rëꞌ‑nu: ―Benn le guiꞌjaꞌ.

⁸Tuzëꞌ zoëꞌ Jesús le chzjaquëꞌ bönniꞌ usë́d queëꞌ lu yödz zajxiꞌquëꞌ le lahuëꞌ.

⁹Niꞌr rënu Jesús ngul Samaria naꞌ, rnanu: ―¿Rnábtsanuꞌ nedaꞌ le guiꞌjuꞌ, len nacuꞌ bönniꞌ judío? Nedaꞌ ni nacaꞌ ngul Samaria. Cni gnanu le cutu taꞌdzág dxiꞌa bunách Samaria len bunách judío.

¹⁰Bubiꞌë didzaꞌ Jesús, rëꞌ‑nu: ―Laꞌnaruꞌ núnbëꞌu le runödzjëꞌ Dios, len nuzxa naꞌ rë liꞌ: “Benn le guiꞌjaꞌ”, liꞌ gnabuꞌ atiꞌ Lëꞌ gunnëꞌ quiuꞌ nis runn yöl‑laꞌ naꞌbán.

¹¹Niꞌr rënu Lëꞌ ngul naꞌ, rnanu: ―Bönniꞌ, cutu nuꞌu le cuíajnuꞌ nis, atiꞌ yeru nis ni, dxiꞌtër röꞌ. ¿Gazx dë nis naꞌ runn yöl‑laꞌ naꞌbán?

¹²¿Naruꞌ náctërtsuꞌ Liꞌ zxön ca xuzruꞌ gul gdöd Jacob, bönniꞌ niꞌ bennëꞌ queëtuꞌ yeru nis ni, ga ni gzxiꞌë nis guꞌë, len gliꞌjbiꞌ caꞌ zxiꞌnëꞌ, len glëꞌjbaꞌ caꞌ böaꞌ bëdx queëꞌ?

¹³Bubiꞌë didzaꞌ Jesús, rëꞌ‑nu: ―Nútiꞌtëz nu guiꞌj nis ni, leyúbl ubídx nis,

¹⁴san nu guiꞌj nis naꞌ unödzjaꞌ nedaꞌ, cutur gbidx icj ládxiꞌdauꞌhuëꞌ, le unödzjaꞌ queëꞌ nis naꞌ gac lu icj ládxiꞌdauꞌhuëꞌ ca tu ga ralj nis, le güiꞌ queëꞌ yöl‑laꞌ naꞌbán gdu.

¹⁵Niꞌr rënu Lëꞌ ngul naꞌ, rnanu: ―Bönniꞌ, benn quiaꞌ nis naꞌ, quië cutur ubidxaꞌ, len cutur duxiꞌa nis ni.

¹⁶Jesús rëꞌ‑nu: ―Gyeaj, yajlidzëꞌ bönniꞌ quiuꞌ, atiꞌ huöduꞌ ni.

¹⁷Bubiꞌinu didzaꞌ ngul naꞌ, rënu Lëꞌ: ―Cutu nu zoa bönniꞌ quiaꞌ. Niꞌr Jesús rëꞌ‑nu: ―Ca nacz rnauꞌ, “cutu nu zoa bönniꞌ quiaꞌ”,

¹⁸le chgzóalenuꞌ gayuꞌ bönniꞌ, atiꞌ bönniꞌ naꞌ zóalenuꞌ‑nëꞌ naꞌa, cutu naquëꞌ bönniꞌ quiuꞌ. Didzaꞌ ni ruꞌu, ca nacz rnauꞌ.

¹⁹Niꞌr rënu Lëꞌ ngul naꞌ, rnanu: ―Bönniꞌ, runi nedaꞌ nacuꞌ bönniꞌ ruꞌë didzaꞌ uláz queëꞌ Dios.