SAN JUAN 4:4-18

⁴Ja₁tioin'₅₄ juɨ₅ jaun₂, ca₂tɨ́in₂ ŋɨ́i₃ 'uë₃ Samaria.

⁵Jaun₂ në́₃ ca₂dsi₃léin₂ caun₂ juɨg₂ ja₁tén₄ Samaria a₂chei₂ Sicar, ma₂quián₅ ca₂jne₄ 'uë₃ a₂jme₁ca₂cuë₃ Jacob ma₂lɨ́g'₂ ca₂cuë́'₃ ja₁ŋi'₅₄ i₂chen₂ Së́₄.

⁶Ja₁jaun₂ jme₁dsi₅₄ caun₂ tau₂ pozo a₂të́'₂ dsa₂ a₂quió'₅ Jacob. Jaun₂ ca₂guá₂ Jesús cau₅, ia₁ a₂ca₂'ú'₃ 'ein₅₄ juɨ₅. Jme₁ma₂ca₂të́₂ con'₂ dsi₂ŋí'₃ jaun₂.

⁷Të₃ guá₅ jaun₂ ca₂dsióg₃ jan₂ 'io₅₄ i₂chan₂ Samaria a₂i₃dsein₂₃ jmɨg₂ pozo jaun₂. Jaun₂ ca₂juá'₂ Jesús ca₂tsɨ́'₃ 'io₅₄ 'éi₂: ―Cuë₄ ca₂juɨg₄ jmɨg₂ guɨ'₅₄.

⁸Të₁lia'₂ jaun₂, i₁len₅₄ jë₄ juɨg₂ chi'₂ dsɨ₂guia₃-tɨ́n₂, i₁lia₅ má₃ a₂guë́'₃.

⁹Jaun₂ në́₃ ca₂juá'₂ 'io₅₄ chan₂ Samaria 'éi₂ ca₂tsɨ́'₃ Jesús: ―¿'A₂ lia'₂ lë́₅ jaun₂, 'ne₂ jan₂ dsa₂ i₂lɨ́n₅ judío, mɨ'₂ jmɨg₂ ne₃ jniá₂, jan₂ 'io₅₄ chan₂ Samaria? (Ia₁ tsá₃ jág₁ 'ei₅ dsa₂ judíos quian'₅₄ dsa₂ chan₂ Samaria.)

¹⁰Jaun₂ në́₃ ca₂ŋag₃ Jesús: ―Jua'₅₄ mei'₂ guë́₃ ŋi'₅₄ 'ne₂ 'e₂ jaun₂ a₂cuë₅ Diú₄, quian'₅₄ 'ein₂ i₂mɨ₅ jmɨg₂ ne'₅₄, jme₁mɨ́'₂ ne₃ jniá₂, jaun₂ jniá₂ në́₃ cuë₅₄ jmɨg₂ jén'₃.

¹¹Jaun₂ ca₂juá'₂ 'io₅₄ ca₂tsɨ́'₃ Jesús: ―Gui'₅₄, tsá₃ ŋí₁ cubeta cha₂ quiáng'₂ a₂dséng'₄ jmɨg₂, ton'₂ a₂jɨ'₂ bá₄ tau₂ pozo. ¿'A₂ guë'₂ já'₄ cán'₁ jmɨg₂ jén'₃ a₂cuë́'₂ jniá₂?

¹²¿'E₂, 'ne₂ lɨ́ng'₅ i₂juɨn'₂ guë́₄ con'₂ guë́₄ 'lag₄ jmei₂ jniog₄ Jacob, i₂ca₂cuë₃ pozo la₂? Jme₁cán₂ 'éi₂ jmɨg₂ a₂'ɨ́n'₂ 'ŋiog₅ quian'₅₄ chi'₂ quiáin₅, quian'₅₄ já'₂ quiáin₅ në́₃.

¹³Jaun₂ ca₂ŋag₃ Jesús: ―Ca₂le₃jɨ́n₃ juɨ₁lia'₂ dsa₂ i₂'ɨ́n'₂ jmɨg₂ la₂, lé₂ táng₃ dsɨ́₅ i₁'ɨ́n'₂ jmɨg₂;

¹⁴la₁ia₁ juɨ₁lia'₂ i₂'ɨ́n'₂ jmɨg₂ a₂cuë́₄ jniá₂, lia'₂ o₁lɨ́g'₂ jmɨg₄ tsá₃ ma₃lé₂ dsɨ́₅ i₁'ɨ́n'₂ jmɨg₂. Ia₁ juɨ₁lia'₂ jmɨg₂ a₂cuë́₄ jniá₂, lé₂ në₂jag₄ bá₄ caun₂ o₄tu₁ jmɨg₂ të₂le₃ quió'₅, a₂qui₃'iá₃ jmɨg₂ a₂gu₂dsí₂ a₂jmo₃ a₂le₃chain₂ co₂tan₅₄.

¹⁵Jaun₂ në́₃ ca₂juá'₂ 'io₅₄ ca₂tsɨ́'₃ Jesús: ―Gui'₅₄, cuë₄ jmɨg₂ a₂'ë'₂ në₅, ia₁jaun₂ tsá₃ ma₃le₃quein₂ dsɨ₃, on₃ guë'₂ caun₂ guio₅₄ guë́₄ ca₂të₂ la₂ i₁dséng₃ jmɨg₂.

¹⁶Jaun₂ ca₂juá'₂ Jesús: ―Guan'₂ o₂te'₂ dsɨ₂i₂gog'₂, jaun₂ ŋe'₅₄ táng₃ ja₁lá₃.

¹⁷Jaun₂ ca₂ŋag₃ 'io₅₄ 'éi₂: ―Tsá₃ dsɨ₂i₂gu₃ jniá₂ chan₂. Jaun₂ në́₃ ca₂juá'₂ Jesús: ―Tí₅ bá₄ jág₁ quiáng'₂ a₂në₂jua'₅₄, a₂tsá₃ chan₂ dsɨ₂i₂gog'₂;

¹⁸ia₁ 'ŋiá₂ dsɨ₂i₂gog'₂ i₂ma₂ca₂né'₂ quiang'₅₄, jaun₂ i₂ŋéi'₂ quiang'₅₄ rë₂në́₃ ján₃, on₃jua'₅₄ dsɨ₂i₂gog'₂ 'éi₂. Dsón'₂ bá₄ tí₅ jág₁ quiáng'₂ a₂në₂jua'₅₄.