San Juan 4:31-52

³¹Per lalzi ni zé gunaaqui láani guɨdxqui, de xpɨny Jesús raipdeb laany: —Maistrɨ, bquiinbiu.

³²Per laany raipny laadeb: —Nare a ni iquiinia rápa, per quɨt gántit xa náni.

³³Ax guzulo rnabdidxsaa de xpɨnny: —¿Ladxa nuu ni bdeed xi bquiinny?

³⁴Chiyru raipy Jesús laadeb: —Guelrquiiny xtena ná gúna zec ni rcaaz Dios ni bxiaald nare, ne yaloza gúna ni guniiny gúna.

³⁵Laat rniit: “Rieedx stap búiu par sulo gac de cosech.” Per nare rniia laat: Guldiaslo, gulguiaa lo de yáan aguld idopni.

³⁶Ne bniety ni rtopni, rcáab ni riáldbɨ pur dzɨɨny ni runbɨ. Chiy de cosech ni rtopbɨ a ná par rut nuu guelnabány par chazy. Ziy xquel ax zeclɨ ni rzibinni ne zeclɨza ni rtopni tubylote rzaclaazdeb.

³⁷Didxldíquɨy ni rnii bniety: “Irɨny ni run dzɨɨny chiy irɨny ni rtop de guelnazaac.”

³⁸Nare bxiaalda laat par chatoptɨ de guelnazaac rut niclɨ quɨt baantit dzɨɨny. Irɨnquɨ de ni baany dzɨɨny, chiy laat güetop, güetopzit de guelnazaac rut baandeb dzɨɨny.

³⁹Zieny de bniety Samariaqui güeldilaaz Jesús pur xtiidx gunaaqui, chi raipbɨ laadeb: “Aguniiny nare irate ni abaania.”

⁴⁰Pur ningui, chi bdzɨny de bniety Samariaqui rut zuguaa Jesús ax banlasdeb lony par suguanény laadeb. Chiy guzuguanény laadeb tiop dxi.

⁴¹Ne mazru ziendeb güeldilaaz laany chi bindiagdeb ni rniiny.

⁴²Chiyru raipdeb gunaaqui: —Anre agati purzíti ni guniiu dunnɨ roldilaaznɨny sino que pur ni lagac dunnɨ abindiagnɨ ni rniiny. Ne nanldín dec laaniy Crist ni run perdón bniety guɨchliu.

⁴³Chi gudeed tiop dxiqui, Jesús bdiiany nez Samaria ax güelaaru zény nez Galilea.

⁴⁴Masquɨ lagac laany guniiny dec nic tuby profet ni rnii xtiidx Dios quɨt ráptideb didxdoo laab ladxbɨ,

⁴⁵per chi bdzɨnny nez Galilea, de bniety nezqui güenquɨ baandeb recibirny. Te pur güézadeb laní pascu Jerusalén ax gunádeb irate ni baanny lo laníqui.

⁴⁶Chiyru gubíi biecqui Jesús Caná tuby guɨdx xte Galilea, rut baanny guctegac nis vin. Ne guɨdx Capernaum guu tuby xpɨny rey ni racxú tuby lliinni.

⁴⁷Chi gucbee xpɨny reyqui dec abdzɨny Jesús nez Galilea xte ni bzany nez Judea, ax güeb rut bdzɨnny ne banlasbɨ lony par chasiacny llingaanbɨ ni apacmer gaty.

⁴⁸Ax raipy Jesús laab: —Laat axt bel quɨt iniát xi de seny o de milagrɨza, quɨt chaldilaaztɨ.

⁴⁹Per xpɨny reyqui cuaibbɨ: —Dad, gueeldzi quedaabiu anste gaty llingaana.

⁵⁰Chiyru raipy Jesús laab: —Quebiecqui lizu. A llingaanu anuzaac. Bnietqui güeldilaazbɨ xtiidx Jesús ax zíagacbɨ lizbɨ.

⁵¹Chiy lalzi ni zíab ax güechalo de xmosbɨ laab, raipdeb laab: —A llingaanbiu anuzaac.

⁵²Chiy gunabdiidxbɨ laadeb xorti guzulo ruzaac lliinbɨ, ax raipdeb laab: —Nay zecti rca tuby gudxi gubicá xliaaqui.