SAN JUAN 4:3-34

³Huan ihcuac Jesús ijcon omomat, oquixohuac den Judea ic mocuepalos Galilea.

⁴Ipan ohtli tlen ohuilohuac, omopix tlen tlanecuilanalos ic tlali Samaria.

⁵Huan ijcon oahxihuac ipan se altepetl itlatilanal Samaria, itocahyan Sicar, inahuac in tlali tlen oquimacac Jacob in iconeu José.

⁶Ompa ocatca in ameli tlaltoctoc tlen quihtohuahque oquichcuac in Jacob. Quenin Jesús osiahuihuataya ic nehnemohua, oncan omotlaliloc inahuac in ameli. Huan yi cana chicuasin horahtiotlac.

⁷Ic inon se sihuatl den Samaria oahsito ipan in ameli ic quianas in atl, huan Jesús omoluic: ―Xinechmaca chihton moau.

⁸Huan in teltamachticahuan oyahtoyahque ipan in altepetl quicohuahque tlen quicuasque.

⁹Oncan in sihuatl samariahteca otenanquilic: ―Tehhua tijudeahteco, ¿huan quenin tinechtlahtlaniliya atl, huan nehhuatl nisamariahteca? Tleca in judeahtecos ahmo tlen quihtohuahque inca in samariahtecos.

¹⁰Oncan Jesús omonanquilic: ―Tla ticmatini in tlen Dios mitzmacalos, huan tla tinechixmatini aquin nehhua, in aquin mitztlahtlanilihtica atl, ic nele tehhua tinechtlahtlanilini nehhuatl, huan nehhuatl nimitzmacani in atl tlen quitemaca nemilistli.

¹¹In sihuatl oteiluic: ―Tlacatzintli, niyan ahmo mopiya tlen ic moquixtis atl, huan in ameli tequin huehcatla. ¿Quenin cuali nechmacasque in atl tlen quitemaca nemilistli?

¹²In tochichicacoltzin Jacob otechcahuilihteu inin ameli canin yehhua huan ipiluan oatliyayahque, huan canin oquinatliltiyaya iyolcahuan. Tel, ¿ocachi tihueyixtoc quen yehhua?

¹³Jesús omonanquilic: ―Nochten aquin quionihque inin atl, oc sepa amiquisque.

¹⁴Huan in aquin quionis in atl tlen nehhua nicmacas, ayacmo queman amiquis. Huan inon tlen nicmacas mochihua quen se ameli iihtectla in aquin quionis huan quimacas nemilistli nochipa.

¹⁵Oncan in sihuatl oteiluic: ―Tlacatzintli, manechmacalo inon atl, huan ayacmo queman niamiquis, niyan ayacmo nicpiya tlen nihualas niquixtis in atl ihtech inin ameli.

¹⁶Jesús omoluic: ―Xiyau xicnotza motlacau, huan oncan xihualacan nican.

¹⁷In sihuatl otenanquilic: ―Ahmo nicpiya nonamic. Oncan Jesús omoluic: ―Inon melahuac in tlen otiquihto, ahmo ticpiya monamic,

¹⁸tleca yotiquimpapatlac macuili tlacamen, huan in aquin ticpiya axan ahmo monamic. Ic inin oticyequihto in tlen nele.

¹⁹Ic oquicac inin, in sihuatl oteiluic: ―Tlacatzintli, nicnehnehuiliya tehhuatzin se tlayolchicauqui.

²⁰In tochichicacoluan samariahtecos otemahuestilihque in Dios nican ipan inin tepetl, huan namehhuan nanjudeahtecos nanquihtohuahque mach yeh in Jerusalén canin titemahuestilisquiyanihque.

²¹Jesús omonanquilic: ―Sihuatl, tla xinechneltoca, tleca ompahuitz tonali queman nantemahuestilisque in Totecohtzin Dios huan ayacmo tlen nanquipiyasque nanyasque Jerusalén niyan ipan inin tepetl.

²²Namehhuan in samariahtecos ahmo nanteixmatihque in aquin nantemahuestiliyahque, huan tehhuanten tijudeahtecos queme. Tleca in Dios oquitlapehpeniloc seya inca in judeahtecos ic mochihuas in Temaquixticahtzin.

²³Huan hualahsi in tonali huan nele yohualahsic, queman aquin nele temahuestilisque in Tohueyitahtzin nele quipiyasque tlen quichihuasque ipan inyolo. In Tohueyitahtzin monequi ijcon maquichihuacan in aquin temahuestilisque.

²⁴Dios Yehhuatzin nohuiyan ilohuac masque ahhuel teitahque, huan yehhuan aquin quinequihque temahuestilisque nele quipiyahque tlen quichihuasque ipan inyolo melahuac.

²⁵In sihuatl oteiluic: ―Nehhuatl nicmati hualuilohuas in Mesías, aquin quitocahhuiyahque in Cristo, huan ihcuac hualuilohuas Yehhuatzin, techyecnonotzalos quen titemahuestilisquiyanihque.

²⁶Jesús omoluic: ―Inon nehhuatl in Cristo, in aquin ihuan timonohnotztica.

²⁷Ic inon oahsitohque in tetlamachticahuan huan omoistlacohque quen in Jesús monohnotzalotica ihuan se sihuatl. Huan niyan aquin ahmo omoixcohyanui tetlahtlanis tlen oquinequiyaya, noso tlen ica ihuan omonohnotzaloticatca.

²⁸Oncan in sihuatl oquicauteu in itzotzocol huan oya ipan in altepetl, canin oquiniluito in tlacamen:

²⁹―Xihualacan xiquitacan se tlacatl aquin onechiluic nochin tlen nicchiutoc. Cox, ¿ahmo yehhua yes in Cristo?

³⁰Oncan oquisque den altepetl huan oyahque canin ilohuac in Jesús.

³¹Huan in tetlamachticahuan otetlatlautiticatcahque in Jesús, huan oteiluiyayahque: ―Tlamachtiyani, matlacualo.

³²Huan Yehhuatzin omoluihque: ―Nehhuatl nicpiya tlen nicuas, in tlen namehhuan ahmo nanquimatihque.

³³Oncan in tetlamachticahuan opeuque motlahtlaniyahque ic yehhuan: ―Cox, ¿yes aquin cana yotehualiquili tlen ic tlacualos?

³⁴Huan Jesús omoluihque: ―Yeh in quen notlacual ic nicchihuas in tlen monequi in aquin onechualtitlanque, huan ijcon nictlamis in tequitl tlen onechmacaloc.