SAN JUAN 4:29-40

²⁹―Mö nttzɛdi, möjö gu má cca̱htijʉ hnar hñøjø xí xijqui göhtjo cʉ xtú øte. ¿Cja jin gui gue car Cristo ca dí tøhmijʉ?―

³⁰Diguebbʉ ya, bi dɛnijʉ car bbɛjña̱ cʉ cja̱hni, bi bønijʉ jar jñini, mír möjmʉ pʉ jabʉ már bbʉh car Jesús.

³¹Jim be mbá coh car bbɛjña̱, nu car Jesús már ña̱hui quí möxte. Guegue‑cʉ mí xijmʉ car Jesús, ya xi mír ntzöhui di zi. Mí i̱na̱jʉ: ―Nuquɛ, Maestro, tziguɛ ya.―

³²Nu car Jesús bi xih‑cʉ: ―I bbʉh ca dí tzigö macja̱ guí i̱na̱jʉ jin te dí pɛhtzi pa gu tzi.―

³³Diguebbʉ ya quí möxte bi hñöntsjɛjʉ, bi ma̱jmʉ: ―Ja̱di, ¿cja huá i bbʉh ca to xpá jña̱mpi te xí nzi‑nʉ?―

³⁴Nu car Jesús pé bi ma̱m bbʉ: ―Nugö, jin tza dí tu̱ntju̱ bbʉ dí pɛh car bbɛfi ca xí ddajqui cam Tzi Ta ji̱tzi. Ncjahmʉ dí ñi̱ña̱tjo bbʉ dí øti car bbɛfi‑ca̱, cja̱ i nesta gu cjuajti.

³⁵Nuquɛjʉ, pe ntoja guí ma̱jmʉ: “I bbɛjti go za̱na̱ pa da cja tsjattɛy.” Dyøjma̱jʉ na̱ dí xihquijʉ. Gui jiantijʉ ya yʉ jua̱ttɛy, ya xí ccaxti yʉ ttɛy. Guejya xta cja tsjattɛy ya.― Bbʉ már ma̱ndi nʉr palabra‑nʉ car Jesús, ya xi mbá cuati cʉ cja̱hni xcuí hñe̱h car jñini Sicar.

³⁶Cja̱ pé bi ma̱n car Jesús: ―Nuquɛjʉ, guí ncjajʉ ncja yʉ xattɛy, cja̱ da ttahqui quer tja̱ja̱jʉ. Gui ma gui cuajtijʉ yʉ cja̱hni yʉ i ne da dɛnguigö, pa jin da bbɛdi. Nubbʉ, gu mpöjmʉ, dí göhtjojʉ, ngu̱ na̱r monttɛy, ngu̱ yʉ xattɛy.

³⁷Ya xí nzʉh car jña̱ ca i jma̱: “Xí ponttɛy ca hnaa, cja̱ ca pe hnaa da xattɛy.”

³⁸Nugö dú cu̱hquijʉ hua pa güi xattɛyjʉ hua jabʉ jí̱ xquí pɛjmʉ. Pé dda cja̱hni xí mon car semilla, xí xij yʉ cja̱hni car tzi ddadyo jña̱. Cja̱ nuquɛjʉ, xí tocaquijʉ gui cuajtijʉ yʉ cja̱hni.―

³⁹Car jñi̱ni Sicar mí bbʉh pʉ jar jöy Samaria. Már ngu̱ cʉ́m Sicar bi hñeme car Jesús. Nucʉ́, mbá yojmʉ car bbɛjña̱ ca xquí xijmʉ, guegue xquí ntjɛhui hnar hñøjø ca mí pa̱di göhtjo cʉ xquí dyøti guegue, göhtjo cár vida.

⁴⁰Eso bú e̱h cʉ cja̱hni‑cʉ, mí mi̱ngu̱ Samaria, bi guatijʉ pʉ jabʉ már bbʉh car Jesús, cja̱ bi dyöjpijʉ favor di hmʉpjʉ tzʉ, tengu̱ mpa. Cja̱ guegue bi døhmi yojpa pʉ, bi ujti cʉ cja̱hni.