San Juan 4:27-51

²⁷Junni Jesús tsantinasale, yabe penenaminla manjalaiyoe. Junni chiquilari wepanalaiyoe sonacanan micarinaeque. Wepananatonan, natiya panhalaquitiyoe. Sonaca ¿tibi jayun? Jesuca ¿niyaito sonaca micarinayun? titulajoyoe.

²⁸Junni ya sonari pi pocanunca purato, puebloca manjie. Junni pueblobi féto, junbi chuminlabe itsantinue:

²⁹—Jalaide! tinue. Chiqueca ti quimin jonuncatiya jera miimin tsachica quirabi jalaide! ¿Yari Cristo jonhoncan? tinue.

³⁰Junni sona tsantinunca meráto, pueblobi nechi Jesúchica jalainue.

³¹Junnasa Jesuchi tsachila yaca Miya, ano finiquede! tilatiyoe.

³²Junni Jesuri nula miratununca ano finun tayoe tie.

³³Tsantinan, ¿uyan tsachila yachi ano finoca tanjaca jonhoncan? latiyoe.

³⁴Junni Jesuri itsantie: —Ano tito, tsa ano finoca tsantitiyoe tie. Diosi laca erenato mantaca joe tie jera ti quino jonunca. Junni tsanquino labe ano finun cuwenta joe tie.

³⁵Nulari ja witaca quirato, junpalu pete cantsan ichunae tenhilaichunae tie. Te, tsantituntsan joe tiyoe. Jana janamin tsachilacari quiralaquede! tie. Yalachi tenca wita waca cuwenta jolajoe. Junni yalaca cachun camérano itoe. Numa cantsan icala joe tie.

³⁶Junni aman ¿witabi caminlachi pacara quintsan jotun? tie. Aman jun tsanquenan tsachilaca labe cayaisa cariminlachinan Diosi senca cuwachunae tie. Cayaiminlari Diosibe numatotiya sonnato polelaichunae tie yape waqueminlabe caminlabe parejo son tilatisa.

³⁷¿Israelítalari itsantiminla jotun? Waquemin manca joe; camin manca joe timinlae.

³⁸Junni nulaca jun tsannan quisa carinayoe tie. Uyanlari yalaca Diosichi fiquica casale micarilaquee. Junni nulanan yalaca labe cayailaisa carilaquichunae tie.

³⁹Junni Jesús chiquilabe tsantinasanan, Samaria to tsachilari jun pueblobi nechi loto chiquilachica jalaie. Jun sona yalabe paca jominue ya titiya jera quimin jonunca miieque. Ya sonachi fiquica meráto, duque tsachila Jesube cayailainue.

⁴⁰Junto Jesúchica jato, yalabe nasi pechusa latie. Junto palu ma fecári Samárialachite chuminlayoe.

⁴¹Junni Jesuchi fiquica meráto, nantanancari duque tsachilari yabe cayailaie.

⁴²Junni yalari cayailaito, jun sonabe itsanlatie: —Nuchi fiquica meráto tsa jonhoe tilatiyoe. Junto Jesuchi fiquicari meráto, tsarasi miralarayoe latie Jesús jeralelaca se larimin joeque. Diosi ereca jun Cristo tinun tsachi joeque miralarayoe.

⁴³Junni palu ma poletobi, Galilea toca jilaiyoe. Ya Jesús uwainun to jominue.

⁴⁴Aman Jesús chiquilabe cuenta quinato, Diosichi mantate paminlaca paca jominhe yalachi tobi chuminlari yalaca merátuminla jochunaeque.

⁴⁵Tsan josanan, Galilea to tsachila Jesuca facaricanilaquee. Yalanan Jerusalenca fiesta quirabi jica jominlanue. Junbi yalanan Jesús jera seque quinaminca quiraca jominlanue. Junto yaca facaricanilaquee yape yalachitenan jun tsannan quisa.

⁴⁶Aman Galilea tobi nenato, Caná puebloca manjilaiyoe. Junbi pica bino suwaca jominhe. Junni Jesuri Canabi chusanan, Capernaum tinun pueblobi na manca quiyainue. Yachi apari miyachi teniente jominue.

⁴⁷Yari Jesús Judéate nechi Galilea fecári jaca jonunca meráto, Jesúchica jae. Na puyachinaminca manse suwabi jade! tie.

⁴⁸Junni Jesuri yaca meráto, itsantie: —Laca duque wepanato quirantsancari seque quinaminca quiratutori, laca quereilaituchunae tie.

⁴⁹Junni miyachi teniente tulanto itsantie: —Jiniisa! tie yape lachi na puyatusa.

⁵⁰Junni Jesuri yaca pato, nuri manjiniide! tie. Nuchi na manseichunae tie. Junto nachi apari Jesuca quereito meráto manjiniie.

⁵¹Junni manjinaminnan yachi peyunlabe tulainue. Junni yalari nuchi na manseinae latinue.