San Juan 4:23-54

²³Wazrín zra, ne ba dxezrín zra na', gate benne' ca' da li dxulucá'ana szrene̱' Xradxu Dios, xelune̱' na ne̱ chee̱ Be' Lá'azxa, ne ne̱ chee̱ da li, lawe' da dxaca lazre' Xradxu Dios xulucá'ana szren bénneache Le̱' caní.

²⁴Dios naque̱' Be', na' benne' dxulucá'ana szrene̱' Le̱', dxun na ba xen xulucá'ana szrene̱' Le̱' ne̱ chee̱ Be' Lá'azxa, ne ne̱ chee̱ da li.

²⁵Na' nu'ula na' guzre̱' Le̱': ―Neda' nezda' walá' benne' Mesías (da zéaje̱ na Cristo), na' gate la' Le̱', na' guzéajni'ine̱' dxi'u ca naca xúgute̱.

²⁶Jesús guzre̱' le̱': ―Neda' naca' Bénnea', dxuchálajle̱na' lue'.

²⁷Ca gunné̱' ca', na' belexezrín benne' ca' dxuse̱dene̱', na' belexebánene̱' lawe' da dxuchálajle̱ Jesús tu nu'ula Netúe̱' quebe bexázrjene̱' guche̱be̱' Le̱' bi da dxaca lazre̱', u bizra chee̱n dxuchálajle̱ne̱' nu'ula na'.

²⁸Nadxa nu'ula na' bca'ane̱' dxe'e chee̱' dxu'a beaj na', na' bezé̱'e̱ zexíaje̱' xe̱zre na' naga xeaje̱zre̱' benne' ca':

²⁹―Le da lé'ele tu benne' guzre̱' neda' xúgute̱ da ba be̱na'. ¿Quegá benne' nigá Cristo, Bénnea' sel-la Dios?

³⁰Nadxa beledxúaj benne' ca' xe̱zre na', zjaque̱' naga zua Jesús.

³¹Dxácate̱ na', benne' ca' dxuse̱de Jesús gulata' xuene̱' Le̱', gulenné̱': ―Benne' Wese̱de, gudagu late'.

³²Jesús guzre̱' benne' ca': ―De̱ da dxawa', da quebe núnbeale le'e.

³³Nadxa benne' ca' dxuse̱de Jesús gulezú lawe̱' dxuluche̱be ljwezre̱', dxelenné̱': ―¿Núteca bedajgú'e̱ da gudawe̱'?

³⁴Jesús guzre̱' le̱': ―Xela wagu chia' naca na chee̱ guna' da dxaca lazre' Xra', Bénnea' nasel-le̱' neda', ne chee̱ gusexuzra' guna' zrin chee̱'.

³⁵Le'e dxennale: “Xetapa beu' xelápadxu.” Neda' dxapa' le'e, le nna' bénneache zaj naque̱' ca tu lina, da bache naca na xelápadxu.

³⁶Benne' dxelape̱' dxezi'e̱ lazruj chee̱', na' da dxelape̱' naca na chee̱ xelapa bénneache xel-la' nabán da zeajlí canna, chee̱ sua xel-la' dxebé benne' dxaza tu zren nen benne' ca' dxelelape̱'.

³⁷Da li naca ca da dxelenná bénneache: Tu benne' dxaze̱', na' xetúe̱' dxelape̱'.

³⁸Neda' gusel-la' le'e xelápale naga quebe gúzale. Ca' naca na, benne' xula belune̱' zrin gulaze̱', na' le'e dxezile ba neza zrin da belún benne' ca'.

³⁹Benne' zan, benne' xe̱zre na' naga nababa Samaria, guléajle̱'e̱ chee̱ Jesús ne̱ chee̱ xrtizra' nu'ula na', gunné̱': “Guzre̱' neda' xúgute̱ da ba be̱na'.”

⁴⁰Gate belelá' benne' Samaria ca' naga zua Jesús, na' gulata' xuene̱' Le̱' xegá'ane̱' nen le̱', na' begá'ane̱' na' chupa zra.

⁴¹Benne' zandxa guléajle̱'e̱ chee̱ Jesús gate belenne̱' ca da dxenná Le̱'.

⁴²Nadxa gulé̱'e̱ nu'ula na': ―Na'a dxéajle̱ntu' chee̱' quegá tuze ne̱ chee̱ da guzru' lue' netu', na' cá'anqueze lawe' da bénquezentu' netu' chee̱', na' nézentu' da li naque̱' Cristo, Bénnea' guselé̱' ca naca bénneache.

⁴³Gudé chupa zra bezá' Jesús xe̱zre ca' zaj nababa Samaria, na' guzé̱'e̱ zéaje̱' naga nababa Galilea.

⁴⁴Guxíaje̱' na' lawe' da gunnáqueze Jesús, gunné̱': “Tu benne' dxuchalaje̱' waláz chee̱ Dios, quebe dxelapa benne' lazrie̱' le̱' ba lá'ana.”

⁴⁵Gate bezrine̱' naga nababa Galilea, benne' zaj zre̱'e̱ na' belezí' lu ne̱'e̱ Le̱' du lazre̱', lawe' da xjácaqueze le̱' Laní Pascua da guca na Jerusalén, na' belelé'ene̱' xúgute̱ da be̱n Jesús lu laní na'.

⁴⁶Nadxa bezrín Jesús xe̱zre Caná naga nababa Galilea naga be̱ne̱' bexaca nisa xrise uva wal-la. Zua lu xe̱zre Capernaum tu benne' we̱n zrin blau chee̱ xu'u lawe', zua tu zrí'ine̱' bi biu quebe chawe' zúabe'.

⁴⁷Gate ben benne' we̱n zrin blau nigá ba bezá' Jesús naga nababa Judea, ne ba bezrine̱' naga nababa Galilea, na' guxíaje̱' xeajnné̱'e̱ Jesús, na' gutá' xuene̱' Le̱' chéaje̱' lizre̱' xexune̱' bi biu chee̱', bi na' ba zua gátebe'.

⁴⁸Nadxa Jesús guzre̱' le̱': ―Le'e quebe chéajle̱le chia' che quebe lé'ele xel-la' waca chee̱ xabáa da dxulé'eda'.

⁴⁹Benne' we̱n zrin blau na' gunné̱': ―Xran, gudázega na'a quebe ne gate zri'ina'.

⁵⁰Nadxa guzre Jesús le̱': ―Bexíaj lizru'. Naca ban bi chiu'. Benne' we̱n zrin blau na' guxéajle̱'e̱ chee̱ da guzre Jesús lé̱', na' bezé̱'e̱ zexíaje̱'.

⁵¹Gate ba zua xezrine̱' lizre̱', na' benne' we̱n zrin chee̱' xeajlexezrígale̱' le̱', na' gulé̱'e̱ le̱': ―Naca ban zri'inu'.

⁵²Nadxa bche̱be̱' benne' ca' bátala guzú lau bexácabe', na' gulé̱'e̱ le̱': ―Ná'aqueze dxedé wagubizra bedxúaj da la da xu'ube'.

⁵³Nadxa benne' we̱n zrin blau na' bexúnene̱' guca na la' ná'queze gate guzre Jesús le̱': “Naca ban zri'inu'.” Ca'an guca, le̱', ne xúgute̱ benne' zaj zra' lizre̱' guléajle̱'e̱ chee̱ Jesús.

⁵⁴Da nigá naca na xel-la' waca zren da gudxupe' da be̱n Jesús gate bezrine̱' naga nababa Galilea.