San Juan 4:14-48

¹⁴Saniniuujia, cante cua mohuaca ratunutaniyani, majaari socua na jiyamuenu quiniutianiuhua. Cua mohuacaari juhua samo naca pacartanutaniya pueyaracaanu noojiajinia, shuquiriaatia na rishiniuria pueyaracaanu.

¹⁵Cuno maajiiri Jesu sequeree: —¡Pueyanonaa, cuno mohuaca cua niquitiore cua ratusocoriquiano, maja socua cua jiyamuenura, naajuhuaj, maja pueyaracaanu cua taquirioojonura nio cuarijiniji!

¹⁶Jesuuri na sequeree: —Miji quia niyaca quia sequecoo coteenu.

¹⁷Maajiiri na riucuaree: —¿Janiyate niyacaracajaarani, quiaa jaara naa cua sequere? Jesuuri na sequeree: —Quiaacuajaari seetanujuanaa cua sequeree: “Niyacaajunijia”.

¹⁸Seetanujuanaari. Quiaari tari cinco niyacaaraca quiquiaari. Mariyata cuno, quiarijia quiata quiyani, majaari quia niyacajuhuaj.

¹⁹Naa cuno maaji tojishacari Jesu sequesanotej, Jesu sequereeri: —Jiyaniijianaa, ¡quiaaqui Pueyaso sequenu panishano caminiujiunia!

²⁰Canaa supuetanaa pueyari niya nio tuhuananuucua Pueyaso secojonuujua tarijia. Niajaniya saniniuujia, Judiocuacani, niaari sequequiaa Pueyaso cuaara secojosaaria saaja Jerusalén tiacajinia.

²¹Jesuuri na riucuaree: —Seetanujuanaa quia sequereera maajiniaa. Cua sequesanoocua quia tiuurii. Quera quiniutianiyari Pueyaso nia secojosacari puetunu tiquiyocua nia quishacarijianaa. Majaari tari Pueyaso secojosaanu quiniutianiya saaja Jerusalén tiacajinia, nio tuhuananuucuajuhuaj, taa quia sequereecuajani.

²²Niajaniyari maja nia niishiniu cana nia secojoquiaani. Canaa Judiocuacani, canaa cutaraari niishiyani cana canaa secojoquiaani. Pueyasocuajaari canaa Judiocuaca supuetanaa niishitioquiaari pueyacuaji Tacunaari supuenutaniya tama canaa Judiocuacajinijiniojuaaja.

²³Quiarijia cutara, cante seetanujuanaa Pueyaso shuquiritiajacani, nojoriiri na Que Pueyaso secojonutaniya puetunu noojiatajanaa, seetanujuanaa na tojijiaca nojori quishacari. Pueyasoori naa paniya pueya secojonura nojuaja, cante na secojonuujuacacuajani.

²⁴Pueyasoori sohuanu. Naaratej, cante Pueyaso shuquiritiniu panijiacani, nojori cuaara secojoora Pueyaso puetunu noojiatajanaa, Pueyaso Sohuanu tojijiaca nojori quishacari.

²⁵Cuno maajiiri Jesu sequeree: —Janiyacuajaari niishiyani Pueyaso sequesano Cristo mijiria na jiyarosocoriquianoori niniutianiya. Nojuaja jaara tiuquiri, nojuajaari puetunu maninia pa pohuatanutaniyajanaa.

²⁶Jiyacaritij, Jesuuri maatia na sequeree: —Janiyacuajaari cunoni, quiata pocoojiyacuajani.

²⁷Jiyacaritij, canaari Jesuucua tiuquiijiorohuani. Canaari jiuujiatequiaarini canaa niquishacari Jesu pocoojiyano cuno maajitia. Majaari quenaaja canaa nequesotanu quirii Jesu, casaa cuno maaji paniriquiaani, mariyata casaajiniji nojori pocoojoriquiaani.

²⁸Cuno maajiiri cuniquijia na pataco tiujiaquee. Na tiacajinia quiaarohuari. Na tiuquishacari, na tiacajinia quiniaa pueya sequesuhuari:

²⁹—¡Miji pueyanaa, nia niquiquii pueyano! ¡Nojuajaari cua sequeree puetunu cua miishanojuanaa! ¿Majate Cristoni, tariucuacaanu Pueyaso sequesano pocua na jiyarosocoriquianotej?

³⁰Pueyari cuno tiacajiniji Jesuucua nijioquiaari.

³¹Cuno maaji quiasacari na tiacajiniohua, jiyacaritij, canaari Jesu mianuutenu paniriquiaa juucuani. Canaari na sequeriquiaani: —¡Niishitiojonanaa, quia miaquere!

³²Jesuuri saaja canaa sequeree: —Janiyacuaja miaquesanoracani, cuno miaquesanoori nia niishishoo.

³³Canaa, Jesu saquiriojosano pueyani, canaari naa tama nequesoreetooreejaanijia: —Pa niyacari miaquetesaaquee jiyotucuaajaari.

³⁴Jesuuri miriqui canaa sequeree: —Cua miishacari cua Jiyarona panishano, cunoori cua miaquesano, naajuhuaj, cua tucuatasacari na panishano.

³⁵Niaari sequequiaa: “Cuaara shocojoorajaara cuatro raca. Pueyari jiyacari shusha coteenutaniya na nataacuaca carojotanu”. Janiyara, maja naatej. Seetanujuanaa nia sequeya cutaranijia, nia namijia nia riatare maninia nia niquiniuria. Nataacuacacuaja tari noshiquia, carojotasocoriquiano.

³⁶Na carojotanaari na poonijionu sami niquitioshiya. Na carojotasanoori pueyaracaanu quiriquiano. Naacuajitij, cuhuariquia natoonaari jatiqui shuquiriniutianiya nataacuaca carojotanaata.

³⁷Naaratej, seetanujuanaari nio tariucuacaanu sequesano. Naa sequeyari: “Tamonuuri saaja nareja nataja. Na nuhuaji, tamonuuri saniniuujia na carojotaja”.

³⁸Janiyari saniniuujia nia jiyaramiquiquianuni nataacuaca nia carojotanura quenaaja nia poonijiyaquishoo cuhuariquiajinia. Cunoori tamasaca poonijiosano quiquiaari. Niaari juhuajaniya tamasaca poonijiosanojiniji carojotaquiaa shuquiriaatia.

³⁹Queraatia pueya cuno Samaria tiacajinijinioori Jesuucua tiuuquiaari, nojori tojishacari naa cuno maaji sequesanotej: “Cua sequeree puetunu cua miishanojuanaani”.

⁴⁰Naaratej, cuno pueya jaara Jesuucua tiuquiijioquiaari, nojoriiri na masuuquiaari tii na camueenujunura nojori tiacajinia quenaaja. Naaratej, canaari Jesuta tii camueequiaari caapiqui juucani.

⁴¹Socua queraatia cuno pueyajinijinioori Jesuucua tiuuquiaari, nojorijianaa jaara Jesu tojiquiaari Pueyaso rupaa pohuataano.

⁴²Naaratej, nojoriiri cuno maaji sequeturee: —Quiarijiani, majaari canaa tiuuniu Jesuucua, saaja canaa quia pohuatanuucua nojuajiniji. Quiarijia cutara, canaacuajaari tama canaa numaatajaaja tojirii na pohuatasanoni. Naaratej, canaari quiarijia niishiyani, Jesuuri seetanujuanaa Pueyaso jiyanootiriquiano pajaniya, puetunu mijiria quiniaa pueyajanaanio.

⁴³Caapiqui juuca Jesu camueetanu nuhuaji canaa, Samaria pueya tiacajinia, nojuajaari cuniquiji canaa na pueya jiyataaree Galilea jiyajiniara.

⁴⁴Jesuuri tarijia sequequiaari: “Nio tariucuacaanu sequesanoori seetanujuanaa sequesano. Naa sequeyari: ‘Pueyaso sequenu panishano caminiujiuniaari maja tojishano quijia tama na jiyajiniajaaja’”.

⁴⁵Naajaa, Jesu jaara canaa tiuquitiaseequiaari jiyacari Galilea jiyajinia, cuniquijinio pueyari maninia na tiuquitiquiaari saaja. Nojoriiri naa maninia na tiuquitiquiaari tari nojori niquiniuucua Jesu miishano na cumaacata Jerusalén tiacajinia, Pascuara nojori queranacusacari tii.

⁴⁶Galilea jiyajinia canaa quishacari, Jesuuri canaa jiyataaree Caná tiacajinia, tee na jataniquiaari mohuaca vinoracuajani. Jiyacaritij, Capernaum tiacajinia quiquiaariiri tamonu pueyano, Galilea jiya jiyaniijia jiyatesano camarnura. Cuno pueyano niyanuuri jiyanohua cusosu matariquiaa.

⁴⁷Cuno camarnu jaara niishiquiaari Jesu tari tiuquiriohua Judea jiyajiniji, nojuajaari jiyacari niquiaari Capernaum tiacajiniji Jesuucua, Caná tiacajinia. Na tiuquishacari Jesuucua, na sequeseeri: —¡Jiyaniijianaa, cucua quia taraajere! ¡Cua niyanu quia naataniquii, quera cusoyano!

⁴⁸Jesuuri na riucuaree: —Niaa jaara cua cumaacata cua miishano niquiyaquiri, niaari cucua tiuyaquiquiaa.