San Juan 4:12-29

¹²¿Naruꞌ náctërtsuꞌ Liꞌ zxön ca xuzruꞌ gul gdöd Jacob, bönniꞌ niꞌ bennëꞌ queëtuꞌ yeru nis ni, ga ni gzxiꞌë nis guꞌë, len gliꞌjbiꞌ caꞌ zxiꞌnëꞌ, len glëꞌjbaꞌ caꞌ böaꞌ bëdx queëꞌ?

¹³Bubiꞌë didzaꞌ Jesús, rëꞌ‑nu: ―Nútiꞌtëz nu guiꞌj nis ni, leyúbl ubídx nis,

¹⁴san nu guiꞌj nis naꞌ unödzjaꞌ nedaꞌ, cutur gbidx icj ládxiꞌdauꞌhuëꞌ, le unödzjaꞌ queëꞌ nis naꞌ gac lu icj ládxiꞌdauꞌhuëꞌ ca tu ga ralj nis, le güiꞌ queëꞌ yöl‑laꞌ naꞌbán gdu.

¹⁵Niꞌr rënu Lëꞌ ngul naꞌ, rnanu: ―Bönniꞌ, benn quiaꞌ nis naꞌ, quië cutur ubidxaꞌ, len cutur duxiꞌa nis ni.

¹⁶Jesús rëꞌ‑nu: ―Gyeaj, yajlidzëꞌ bönniꞌ quiuꞌ, atiꞌ huöduꞌ ni.

¹⁷Bubiꞌinu didzaꞌ ngul naꞌ, rënu Lëꞌ: ―Cutu nu zoa bönniꞌ quiaꞌ. Niꞌr Jesús rëꞌ‑nu: ―Ca nacz rnauꞌ, “cutu nu zoa bönniꞌ quiaꞌ”,

¹⁸le chgzóalenuꞌ gayuꞌ bönniꞌ, atiꞌ bönniꞌ naꞌ zóalenuꞌ‑nëꞌ naꞌa, cutu naquëꞌ bönniꞌ quiuꞌ. Didzaꞌ ni ruꞌu, ca nacz rnauꞌ.

¹⁹Niꞌr rënu Lëꞌ ngul naꞌ, rnanu: ―Bönniꞌ, runi nedaꞌ nacuꞌ bönniꞌ ruꞌë didzaꞌ uláz queëꞌ Dios.

²⁰Gulayíj ládxiꞌquëꞌ Dios xuz xtauꞌruꞌ lu guiꞌa ni, san rnaliꞌ lbiꞌiliꞌ Jerusalén nac ga ral‑laꞌ laꞌyíj ládxiꞌgac Dios bunách.

²¹Jesús rëꞌ‑nu: ―Ngul, gyejlëꞌ nedaꞌ. Zaꞌ dza catiꞌ tsej ládxiꞌliꞌ‑nëꞌ Dios Xuz zal‑laꞌ cutu dusoaliꞌ guíꞌadauꞌ ni, len cutu tsajsoaliꞌ Jerusalén.

²²Lbiꞌiliꞌ rej ládxiꞌliꞌ Nu cu núnbëꞌliꞌ, san netuꞌ núnbëꞌtuꞌ Nu naꞌ rej ládxiꞌtuꞌ, le benëꞌ queëꞌ Dios glaꞌ lahui yöl‑laꞌ ruslá niꞌa quequëꞌ bönniꞌ judío.

²³Naꞌa, zaꞌ dza, len chrdxin dza naꞌ, catiꞌ nup le nactë taꞌyíj ládxiꞌgac Dios, laꞌyíj ládxiꞌquëꞌ Lëꞌ, zóalenëꞌ lequëꞌ Dios Böꞌ Laꞌy len le nac gdutë li, le rëꞌnnëꞌ Dios Xuz lacquëꞌ queëꞌ bönniꞌ laꞌyíj ládxiꞌquëꞌ Lëꞌ cni.

²⁴Dios naquëꞌ Böꞌ, atiꞌ nup taꞌyíj ládxiꞌgac Lëꞌ, run bayúdx laꞌyíj ládxiꞌquëꞌ Lëꞌ, zóalenëꞌ lequëꞌ Dios Böꞌ Laꞌy len le nac gdutë li.

²⁵Niꞌr rënu Lëꞌ ngul naꞌ, rnanu: ―Nözdaꞌ ral‑laꞌ guidëꞌ Mesías, Bönniꞌ naꞌ lëꞌ Cristo. Catiꞌ guidrëꞌ Lëꞌ quíxjöiꞌnëꞌ rëꞌu yúguꞌtë.

²⁶Jesús rëꞌ‑nu: ―Lëczëꞌ, ruíꞌlenëꞌ liꞌ didzaꞌ.

²⁷Ractë cni guludxinëꞌ bönniꞌ usë́d queëꞌ Jesús, atiꞌ gulubannëꞌ le ruíꞌlenëꞌ‑nu ngul didzaꞌ, san cutu burúguinëꞌ gnabnëꞌ Lëꞌ nitúëꞌ, cugnë́ꞌ: “¿Bizxa rnabnuꞌ lënu?” o: “¿Bizxa didzaꞌ ruíꞌlenuꞌ‑nu?”

²⁸Niꞌr bucaꞌnnu niꞌ xchöꞌnu ngul naꞌ, atiꞌ böajnu laꞌ yödz, zjödxnu nup nacuáꞌ niꞌ,

²⁹rnanu: ―Gul‑dá, gléꞌiliꞌ‑nëꞌ bönniꞌ gudxëꞌ nedaꞌ yúguꞌtë le chnunaꞌ. ¿Naruꞌ cunactsëꞌ Lëꞌ Cristo?