SAN JUAN 3:5-24

⁵Bi da̱j ya car Jesús, bbʉ: ―Cierto na̱ dí xihqui, ca to i ne da guati pʉ jár dyɛ ca Ocja̱ pa da mandadobi, i nesta da tsjitzi cor deje pa da ni̱gui, ya xqui ne da jiɛh ca rá nttzo. Guejtjo i nesta da yojmi car Espíritu Santo pa da mɛhtzi hnar ddadyo hmʉy.

⁶Yʉ bbɛjña̱, i øngui ba̱jtzi. Nu cʉ ba̱jtzi cʉ i bbʉy, rí jña̱xti cár ta ʉ́r me. Mi̱ngu̱tjojʉ hua jar jöy. Nu ca to i yojmi car Tzi Espíritu Santo, ddadyo ga hmʉy, cja̱ rí hñe̱ ji̱tzi car nzajqui ca i pɛhtzi.

⁷Dyo te guí mbe̱ni digue nʉr palabra nʉ xtú xihqui. I nesta da ttahqui hnar ddadyo hmʉy, ncjahmʉ güi yojpi güi hmʉh ca xtrá yo vez.

⁸Guí tzö nʉr nda̱ji̱, i dyo göhtjo pʉ jabʉ i ne. Guí øde i jia, pe jin guí pa̱di jabʉ xcuá hñe̱je̱ cja̱ co jabʉ rí ma. I ncjadipʉ hne̱je̱ car Espíritu Santo. Guegue‑ca̱ i un yʉ cja̱hni car nzajqui ca rí hñe̱ ji̱tzi, masque jin gui pa̱j yʉ cja̱hni ja ncja ga dyøte.―

⁹Diguebbʉ ya, pé bi dyön car Nicodemo: ―¿Ja ncja di jogui di ttajquije car nzajqui ca rí hñe̱ ji̱tzi?―

¹⁰Cja̱ pé bi da̱h car Jesús: ―Nuquiguɛ, gúr ndo maestro, guí u̱jti cár ley ca Ocja̱ yʉ cja̱hni israelita. ¿Cja jin guí pa̱di ja i ncja nʉ xtú xihqui?

¹¹Cierto dí xihqui, gue yʉ cosa dí pa̱di rá zö, dí xihqui, pa gui hñemejʉ. Dí ña̱ ncja hnar testigo, dí xihquijʉ yʉ cosa xtú cca̱hti. Nuquiguɛjʉ, jin guí ne gui hñemejʉ ca dí xihquijʉ.

¹²Xtú xihquijʉ ja i ncja cʉ cosa cʉ rí hñe̱ ji̱tzi, xtú jɛqui yʉ cosa yʉ i ni̱gui hua jar jöy, pa gui ntiendejʉ. Pe nuquɛjʉ, jin guí e̱me̱jʉ yʉ palabra xtú ma̱. Xi bbʉ gua xihquijʉ cʉ dda cosa cʉ bí ncja pʉ jar ji̱tzi, cʉ jí̱ bbe i fa̱jcua jar jöy, meno gri hñemejʉ bbʉ́.

¹³Jin to i bbʉh ca xtrú mbøx pʉ jar ji̱tzi. Jønguitsjɛgö, dúr mi̱ngu̱ pʉ ji̱tzi, xtú ca̱jcö pʉ. Nugö dúr cja̱hni xpá bbɛnqui hua jar jöy.

¹⁴Guí pa̱dijʉ ter bɛh ca̱ bi dyøti car Moisés bbʉ mí hño cʉ cja̱hni israelita pʉ jabʉ jin to mí hña̱ni. Guegue bi dyøti hnar dibujo, ʉr cci̱ña̱ gá ttɛgui, bi hñi̱xi hnar za, bi bböhmi pʉ ña̱ pa di jianti göhtjo cʉ cja̱hni. Guejtigö da ncjaguigö ncja ngu̱ gá ncjajpi car cci̱ña̱. Da tti̱xquigö pʉ ña̱ hne̱je̱.

¹⁵I nesta da ncja‑ca̱ pa jin da bbɛj yʉ cja̱hni yʉ da hñemegui. Da mɛhtzi‑yʉ́ car nzajqui ca jin da tjegue.―

¹⁶Ca Ocja̱ i ndo ne yʉ cja̱hni hua jar jöy, cja̱ jin gui ne pa da bbɛdijʉ. Eso, bú pɛjni cár Tzi Ttʉ, jøña̱‑ca̱ mí hñi̱ji̱. Ca to da guati jár dyɛ, jin da bbɛdi, da mɛhtzi car nzajqui ca jin da tjegue.

¹⁷Ca Ocja̱ jin guá mɛjni cár Ttʉ hua jar jöy pa di xij yʉ cja̱hni da gu̱titsjɛjʉ ca rá nttzo ca xí dyøtijʉ. Guegue bú pɛjni cár Tzi Ttʉ pa da gʉhtzibi ca rá nttzo ca xí dyøtijʉ yʉ cja̱hni.

¹⁸Ca to da guati jár dyɛ cár Ttʉ ca Ocja̱, jin da cju̱h pʉ jabʉ da gu̱ti ca rá nttzo ca xí dyøte. Nu ca jin da guati pʉ, i tu̱u̱di ca rá nttzo ca xí dyøte. Ya xí ma̱n ca Ocja̱, da cju̱h pʉ jabʉ jin gui tzö, du hmʉjti pʉ göhtjo ʉr tiempo, porque jin gá ne gá hñemebi cár Ttʉ ca Ocja̱. Nucá̱, ddatsjɛ‑cá̱.

¹⁹Bú e̱cua jar jöy ca hnaa ca mí jñɛjmi hnar jiahtzi. Nu cʉ cja̱hni hua jar mundo jin tza mí nejʉ car jiahtzi‑ca̱. Mí nejʉ di hmʉjtijʉ pʉ jar bbɛxu̱y pa jin di ni̱gui, ¿cja már nttzo ca mí øtijʉ? Car Tzi Ta ji̱tzi ya xí dyɛmbi cár castigo cʉ cja̱hni cʉ jin gá ne gá nguati car jiahtzi.

²⁰Cʉ cja̱hni cʉ i øti ca rá nttzo, i ʉhui car jiahtzi, cja̱ jin gui ne da guatijʉ, pa jin da ni̱gui, ¿cja rá nttzo ca xí dyøtijʉ?

²¹Nu cʉ cja̱hni cʉ i øti ca rá zö, i cuatijʉ jar jiahtzi pa da cca̱htijʉ, ja i ncja ca xí dyøtijʉ, cja̱ pa da fa̱di gue ca Ocja̱ xí möx‑cʉ́ pa xcá dyøtijʉ ca rá zö.

²²Diguebbʉ ya, car Jesús bi bøm pʉ jar jñini Jerusalén, bi ma gá ma jar estado Judea. Bi mɛhui quí amigo cʉ mí tɛni. Bú hmʉpjʉ pʉ Judea tengu mpa, cja̱ mí xixjʉ cʉ cja̱hni.

²³Guejti car Juan mí xix cʉ cja̱hni pʉ jar lugar ca mí tsjifi Enón, como már cja deje rá ngu̱ pʉ. Car lugar Enón mí nzøtihui car lugar Salim. Mbá e̱h cʉ cja̱hni pʉ jabʉ már bbʉh car Juan, cja̱ guegue mí xitzi.

²⁴Como jí̱ bbe mí cjoti födi car Juan.