San Juan 3:20-33

²⁰Cutu rdzag ládxiꞌquëꞌ yeníꞌ yúguꞌtë bönniꞌ tuꞌë döꞌ, len cutu djaquëꞌ lu yeníꞌ, cui glaꞌ lahui le tunëꞌ.

²¹Rdxin lu yeníꞌ nu run le nac gdutë li quië gac bëꞌ nungac niꞌa queëꞌ Dios le run nu naꞌ.

²²Gdöd naꞌ, gyéajlenëꞌ bönniꞌ daꞌquëꞌ Lëꞌ Jesús, guladxinëꞌ luyú Judea, atiꞌ niꞌ gzóalenëꞌ lequëꞌ, tuꞌquilëꞌ bunách nis.

²³Lëzcaꞌ ruquilëꞌ bunách nis Juan ga nazíꞌ lei Enón, gal‑laꞌ ga dë yödz Salim, le dë niꞌ nis zil. Latj naꞌ taꞌdxín bunách len taꞌdíl nis.

²⁴Rac cni zíꞌatël catiꞌ ziꞌa gdzunëꞌ lidx guia Juan naꞌ.

²⁵Niꞌr gulazú lauquëꞌ laꞌquëꞌ bönniꞌ daꞌquëꞌ Juan taꞌdíl‑lenëꞌ bönniꞌ judío didzaꞌ ca nac qui yöl‑laꞌ rupáꞌ cuini qui gdauꞌ.

²⁶Guladxinëꞌ ga zoëꞌ Juan len tëꞌ lëꞌ: ―Bönniꞌ usëdi. Byutscaꞌ. Ruquilëꞌ bunách nis bönniꞌ naꞌ gzóalenëꞌ liꞌ yetsláꞌa yegu Jordán, bönniꞌ naꞌ benuꞌ lnaꞌ lau queëꞌ, atiꞌ taꞌdxín ga zoëꞌ yúguꞌtë bunách.

²⁷Niꞌr bubiꞌë didzaꞌ Juan, rëꞌ lequëꞌ: ―Cutu bi dë lu nëꞌë bönniꞌ, chquiꞌ Dios cutu nudödëꞌ lei lu nëꞌë.

²⁸Byö́niczliꞌ lë naꞌ benaꞌ lnaꞌ lau, gniaꞌ: “Cutu nacaꞌ nedaꞌ Cristo”, san Dios nasölëꞌë nedaꞌ quíxjöiꞌdaꞌ bunách ziꞌa zëꞌë Lëꞌ.

²⁹Bönniꞌ naꞌ rziꞌë‑biꞌ biꞌi ngul rutság naꞌbiꞌ naquëꞌ bönniꞌ rutság nëꞌë, san böchiꞌ lzëꞌë bönniꞌ rutság nëꞌë, len dzaguëꞌ lëꞌ, ruzë́ naguëꞌ didzaꞌ ruꞌë, len rudzijnëꞌ le ryönnëꞌ didzaꞌ ruꞌë bönniꞌ rutság nëꞌë. Lëzcaꞌ cni, rudzíjtsquidaꞌ nedaꞌ le rac cni lë ni.

³⁰Run bayúdx gacrëꞌ blau caꞌ Cristo, san nedaꞌ, run bayúdx gacraꞌ cuidiꞌz.

³¹Gnëꞌ caꞌ Juan: ―Bönniꞌ naꞌ zëꞌë zacaꞌ xtsaꞌl náctërëꞌ blau ca yúguꞌtë bunách. Bönniꞌ naquëꞌ bunách yödzlyú ni, qui yödzlyú ni naquëꞌ, len ruꞌë didzaꞌ qui le rac yödzlyú ni, san Bönniꞌ naꞌ zëꞌë zacaꞌ yehuaꞌ yubál náctërëꞌ blau ca yúguꞌtë bunách.

³²Bönniꞌ ni runëꞌ lnaꞌ lau qui le bléꞌinëꞌ len le byönnëꞌ, san nutu nu rziꞌ lu nëꞌi le runëꞌ lnaꞌ lau.

³³Nútiꞌtëz bönniꞌ rziꞌ lu nëꞌë lë naꞌ runëꞌ lnaꞌ lau, bönniꞌ ni ruluꞌë lahui rejlëꞌë nac gdutë li didzaꞌ ruꞌë Dios.