SAN JUAN 3:1-11

¹Ní xíndecu ɨɨⁿ tée cùu fariséú ní xínani‑dě Nicòdemú, te ní cuu‑dé ɨɨⁿ tée cùnuu núú ñǎyiu isràél.

²Te tée‑áⁿ nǐ sáháⁿ‑dé niú ní cáháⁿ ndɨhɨ‑dé Jèsús, te ní xáhaⁿ‑dě: —Mèstrú, yúhú ndɨhɨ dava‑gá‑güedé sa nàha‑ndɨ́ sá Yǎ Ndiǒxí ní tendaha ñàha‑gá xii‑n věxi‑n dànehé ñáhá‑n xìi‑ndɨ́, chi núu ñá túú Yǎ Ndiǒxí ndécú ndɨ̀hɨ‑n, te vá ndácú‑n càda‑n nchaa sá vǎ yǒo tnàhí ndàcu cada quide‑n —cachí‑dé xǎhaⁿ‑dě.

³Te ní xáhaⁿ Jèsús: —Na càchí tnúhu ndáá‑í xii‑n sǎ ncháá ñǎyiu vá ná càcu saa tucu, te vá ndɨ̌hu ndaha ñàha Yá Ndiǒxí xií‑yu —càchí‑gá xáhaⁿ‑gǎ xii‑dé.

⁴Te ní xáhaⁿ tě Nicòdemú: —¿Te nása cada ɨɨⁿ ñáyiu sa ní yɨɨ te cacu‑ni tucú‑yu? ¿Náa ndɨ́hu tucú‑yu xɨtɨ́ nǎnǎ‑yu te cacu tucú‑yu xito cùu uú‑ǎⁿ? —càchí‑dé xǎhaⁿ‑dě xii‑gá.

⁵Te ní xáhaⁿ Jèsús: —Na càchí tnúhu ndáá‑í xii‑n sǎ nchàa ñáyiu na ndùu ndoo nduu nine iní‑xi cuú‑yu ñáyiu ní na càcu saa ndɨhɨ ndute ndɨhɨ Espíritú Yǎ Ndiǒxí, ñáyiu‑áⁿ ndɨ̌hu ndaha ñàha‑gá xií‑yu.

⁶Te nchaa ñáyiu càcu ñuyíú‑a, chi déhe ñáyiu ñuyíú‑a cùú‑yu. Te ñáyiu ní nduu ndoo ní nduu nine iní‑xi, ñáyiu‑áⁿ nǐ nduu táhǔ‑yu Espíritú Yǎ Ndiǒxí te tàxi tnuní ñáhá‑nǎ Espíritú‑gá xií‑yu.

⁷Te vá cúñǔhu‑n tnǔhu ní cáháⁿ‑í‑a, chi nchaa ñáyiu ní sándáá iní ñáhá xìi‑í ní nduu ndoo ní nduu nine iní‑yu, te ñáyiu‑áⁿ cúǔ‑yu dàtná ñáyiu ní nacacu saa.

⁸Táchí nděni xíáⁿ tècú dóho‑o xìco‑xi, dico ñá túú xìní‑ó ndèé ichi véxi‑xi, te ni ñà túú xìní‑ó ndèé ichi cuáháⁿ‑xi. Ducaⁿ sǎtnahá‑xi cùu Espíritú‑gá ndécú ndɨ̀hɨ ñáyiu ní nduu ndoo ní nduu nine iní‑xi —càchí‑gá xáhaⁿ‑gǎ xii‑dé.

⁹Te dǎtnùní ní xícáⁿ tnúhú tùcu té Nicòdemú núú‑gǎ, te xǎhaⁿ‑dě xii‑gá: —¿Te nása ndùu tnúhu càháⁿ‑n dùcaⁿ caháⁿ‑n? —càchí‑dé xǎhaⁿ‑dě xii‑gá.

¹⁰Te ní xáhaⁿ Jèsús: —Yòhó cúú‑n ɨ̀ɨⁿ tée cùtnuní iní‑xi, chi dàcuaha‑n ñáyiu isràél, ¿te ñá tècú tnùní‑n tnǔhu càháⁿ‑í‑u?

¹¹Te na càchí tnúhu ndáá‑í xii‑n sǎ nchǔhú càháⁿ‑ndɨ́ ɨɨⁿ sá nǐ tecú tnùní‑ndɨ́, te càháⁿ ndáá‑ndɨ́ cuèndá ɨɨⁿ sá nǐ xiní‑ndɨ́. Dico nchòhó ñá tècú tnùní‑ndó tnǔhu càháⁿ‑ndɨ́.