San Juan 2:7-20

⁷Evocoiyase ahe ava ɨgua rese ihañeco vahe upe aipo ehi: —Pemboapɨpopa co cambuchi ɨ pɨpe —ehi. Omboapɨpopa tuprɨ yuvɨreco.

⁸Evocoiyase aipo ehi ava ihañeco vahe upe: —Penosemi chĩhi, peraso pieta rese hañecosar uve —ehi. Ẽgüe ehi eté yuvɨreco.

⁹Ihañeco vahe pieta rese osãha ɨ oyeapo vahe uva rɨcuer. Ndoicuai eté que sui osẽ ahe uva rɨcuer; ɨgua rese ihañeco vahe güeraño tuprɨ oicua yuvɨreco. Evocoiyase pieta rese hañecosar oñehe cuimbahe omenda vahe upe

¹⁰aipo ehi chupe: —Opacatu ava omondo uva rɨcuer avɨye catu vahe yɨpɨndar. Ipare acoi ava hɨ̃taropase yuvɨreco, omondo ndasepɨi vahe. Nde rumo ereyapocatupaño avɨye catu vahe, ahe cũritei ramo erenose —ehi.

¹¹Co yɨpɨndar vahe poromondɨisa Jesús oyapo vahe aheve. Ipɨpe omboyecua güeco pĩratasa. Sese semimbohe vɨroya ité yuvɨreco.

¹²Ipare oso tecua Capernaum ve, ichɨ avei, tɨvrɨ reseve supive, iyavei ore semimbohe eta oroso supi. Aheve oroico movɨro arɨ tẽi.

¹³Ipare judío upendar Pascua pieta yepota senise, Jesús oso Jerusalén ve.

¹⁴Aheve osepia tũparo guasu pɨpe corero ɨvɨpɨ rupi guarepochi rese mbahe mɨmba eta mondosar; guaca, ovesa iyavei apɨcasu. Aheve avei mbɨa guarepochi recuñarosar yuvɨnoi.

¹⁵Co mbahe repiase rumo, Jesús oyapo tucumbo omombopa tuprɨ tũparo sui opacatu ava imbahe reseve-seve, seimba ovesa, seimba guaca avei. Guarepochi recuñarosar sui otɨapɨ-apɨi iguarepochi ɨvɨ rupi, iyavei imesa opa omombo.

¹⁶Apɨcasu mondosareta uve aipo ehi: —¡Penosepa co mbahe cũritei ave sui! —ehi—. ¡Aní che Ru rẽta mbahe mondosa tẽi pereco! —ehi.

¹⁷Aipo hese, ore oroyemomahenduha ñehesa icuachiaprɨ aracahendar aipo ehi vahe rese: “Nde rẽta rese che recatẽhɨsa sui che mocañɨra” ehi vahe.

¹⁸Evocoiyase judío mborerecuar yuvɨrecoi vahe oporandu yuvɨreco chupe: —¿Mbahe vo ereyapora nde mborerecuasa moporẽhɨ ãgua oreu cũritei? —ehi yuvɨreco chupe.

¹⁹Evocoiyase, —Pemondurupa co tũparo, che evocoiyase mbosapɨ arɨ rupive amopuha irira —ehi judío eta upe.

²⁰Aipo hese, mborerecuar aipo ehi yuvɨreco chupe: —Co tũparo rumo imopuhasa cuarenta y seis aravɨter rupi, ¿ereicatura pĩha aipo nde imopuha iri mbosapɨ arɨ rupive? —ehi yuvɨreco chupe.