SAN JUAN 2:2-19

²Teat Jesús maquiiüb minipilan nej tasoiquiw mambüw quiaj aton.

³Camüm wüx tümb a vin, quiaj tasaj nej mimüm nej Teat Jesús: ―Lango majlüy vin manganeowaran ―aj nej.

⁴Quiaj Teat Jesús tapiüng: ―Müm, ¿neol tesaj xic atquiaja? Cos xique nganaw matüch a nüt narang cuajantanej ―aw.

⁵Quiaj tasoiquiw monbeol, asaj nejiw mimüm Teat Jesús: ―Irangan leaw apmasaj icon ―aj.

⁶Ajlüy quiaj anaíw xor iquial yow narangüch piedra. Ajcüw ayaj atam nejiw a nipilan judío wüx arangüw leawa lambójan marangüw para majlüyiw nerixix alinomb teombas Teat Dios. Ajcüwa xor quiaj ajoy ojpeacüw tengwüy gajpowüw ngan yow.

⁷Condom Teat Jesús tasaj monbeol: ―Ichipichan yow a xor quiaj ―aj nejiw. Quiaj tachipichaw.

⁸Ndoj tasaj nejiw Teat Jesús: ―Nganüy itembiün noic pite, ijoyiün mamb, ijchan aaga najlüy wüx nengoch owix ―aj nejiw. Condom atquiaj tarangüw.

⁹Wüx ndoj manganeow aaga yow narangüch marang vin, aaga najlüy wüx nengoch owix quiaj, nej ngo majaw nguia naw. Pero ajcüwa monbeol lamajawüw cos nejiw monpiow yow. Condom aaga najlüy wüx nengoch owix quiaj, tapaj aaga nench,

¹⁰tasaj: ―Meáwan nipilan ombas mayacüw najneajay vin. Wüx laxeyay anganeowaran, quiaj apmayacüw ngo majneajay vin. Nganüy a ique tepal aaga najneajay vin, ndójwüx tewün ―aj nej.

¹¹Ninguiaj amelich arang ateócan Teat Jesús tiül aaga cambaj Caná tiül Galilea. Tüüch majaraw nguineay nej alndom marang cuajantanej. Quiaj minipilan nej tayariw nej andeac.

¹²Wüx ndoj ayaj, quiaj Teat Jesús tamb andüy tiül cambaj Capernaum, taquiiüb mimüm nej, michiig nej, minipilan nej. Tacüliw quiaj acas nüt.

¹³Laliüc matüch a nüt majlüy aaga nangos nüt pascua ocueajiw nipilan judío. Quiaj tamb Teat Jesús andüy tiül cambaj Jerusalén.

¹⁴Wüx tajmel tiül nadam nangaj iüm, taxom quiaj monüüb boy, monüüb sap, monüüb palom, at mongowüüch tomiün altsotomoj quiaj.

¹⁵Wüx tajaw aag ayaj, quiaj tarang nots newüjchay para mewüjchay. Condom tawün meáwan tiül nadam nangaj iüm maquiüjpüw misapüw nejiw, at miboyiw nejiw. Tawiich ninguiün mitomiünüw mongowüüch tomiün; tatech ninguiün mimesüw nejiw.

¹⁶Tasaj monüüb palom: ―¡Iwüniün ningüy aag ayaj! Nde merangan ombiüm Xeteat marang plas ―aj nejiw.

¹⁷Minipilan nej quiaj leaad omeajtsüw naleaing tarangüch tanomb niüng apiüng: “Xeyay sanajcüy, cos ngo mind najaw marangüw ngo majneaj tiül ombiüm Xeteat”, aw.

¹⁸Condom ajcüwa nipilan judío tatüniw manguiayiw nej: ―¿Neol terang atquiaja, cuane apmejüiquich merang najawan, majüic nguiane iyar minajiüt merang atquiaja? ―ajüw nej.

¹⁹Quiaj tasaj nejiw Teat Jesús: ―Indrojchiün ombas aaga nangaj iüm cam, ndoj xique wüx er nüt sanawitich alinomb ―aj nejiw.