San Juan 2:15-24

¹⁵Uxcui'ma lixmi, ihuetsai'mola' lan mot'ƚ jouc'a lan huacax. Iƚniya nopai'ipá tomí eca'ni'i'mola' liƚtomí, ecanait'ƚi'mola' liƚmesá.

¹⁶Timila' nocujpá paloma: ―Tunlipa'antsola'. Jifa'a ejut'ƚ cai'Ailli'. Aimonƚ'e'e'me to laplaza.

¹⁷Ts'ilihuequi licuej'me lines'ma Jesús i'nujuaitsa loya'apa al Paxi Liniƚingiya, tuya'e': Juaiconapa aipic'a lomejut'ƚ, aicaxnet'ƚya latets'icopa lan xanuc'. Juaiconapa acueca' laipixhuejma', tocomma aƚma'a'ma.

¹⁸Lan xanuc' judío icuis'e'me Jesús, timiyi: ―¿Te cof'ecopa toƚiya? Aƚmuc'itsonga' al cueca' lof'eya. Toƚta'a aƚcua'me al ƚinca epi'impo' lomane.

¹⁹Jesús italai'e'e'mola', timila': ―Ne'. Tolateƚaf'le iƚca'a lejut'ƚ ȽanDios. Ti'iƚa' afane' quitine, iya' joupa aitsahue'enamma.

²⁰Lan xanuc' judío italai'e'e'me, timiyi: ―Lilanc'empa jiƚta'a lejut'ƚ ȽanDios icoƚpa oquej nuxans camts'us camats'. Itsiya ima' tocua: “Ti'iƚa' afane' quitine joupa aitsahue'enamma”. Aimi'iya.

²¹Jesús aimipalaijma al cuecaj xoute'. Lines'ma: “… iƚca'a lejut'ƚ ȽanDios”, tinescoyoxi licuerpo.

²²Ts'ilihuequi Jesús lixim'me limaf'inapa, lipanamma pe lomana' limanapola', iƚniya i'nujuaisnatsa iƚiya litaiqui' Jesús. Icuapá: “Al ƚinca liniƚingiya al Paxi Cataiqui'. Al ƚinca linespa Jesús.”

²³Jiƚpe al cuecaj quiƚya' Jerusalén ti'eyi al juic Pascua. Maƚpiya tipa'a Jesús. Ti'ay al cueca'. Imuc'i'mola' lan xanuc' acueca' lipaxi. Lixim'me acueca' lo'epa, axpela' lan xanuc' ticuayi: “Lihuejna'me Jesús”.

²⁴Jesús aimi'huaiyingila' iƚniya. Ixinguf'mola' jahuay lan xanuc'.