SAN JUAN 2:15-23

¹⁵Chi Jesús yaj'oyɨɨy tüg cochac huojp. E chi ixhuojppɨdzɨmday je ajuuybɨ adoocpɨ ajcxy ma Dios ytɨjc ñihuaj etz ñiborrego. Chi yɨ meeñyhuingogombɨdɨjc ymeeñ cöxijtnajxtayɨ, e chi ymesa tijhuimbijttaayɨ.

¹⁶Chi nɨmay je muuxytoocpɨdɨjc ajcxy: ―Yajpɨdzɨmgɨx jada muuxy ya. Ca' ɨɨch nDeedy ytɨjc yhuaanɨ ajcxy ajuydac adooctac.

¹⁷Je' ajcxy huɨdibɨ anajty Jesús yaj'ixpɨjcpy chi ajɨhuɨygootɨ ajcxy je ayuc, jadu'n nej jaybety ymiñ ma Dios ñecy: “Ooy ndzocy njɨhuɨ̈yɨch Dios ytɨjc, paady ooy nnijottɨgoyɨch Dios ytɨjc.”

¹⁸Chi je judío ixpɨcytɨjc ajcxy y'amɨdooy Jesús: ―¿Ti mɨjhuinma'ñ miich xy'ocyaj'ixambɨch ajcxy nej tüg ijxpejt, pen janch mɨɨdɨty cötujcɨn co m'ixhuojppɨdzɨmdäy yɨ ajuuybɨ adoocpɨ ajcxy?

¹⁹Chi Jesús y'adzooy: ―Yajhuindɨgooygɨx jada Dios ytɨjc, e codugɨɨg xɨɨ ɨɨch yɨ' jadüg'oc nyajpɨdɨ̈gɨpy.

²⁰Chi jada' je judío ixpɨcytɨjc ajcxy y'adzooy: ―Huixchɨguïpx tudujc jɨmɨjt yhuäcxɨjpy co jäy cojy jada Dios ytɨjc. ¿E miich tijy myajpɨdɨ̈gamy codugɨɨgxɨɨjɨ?

²¹Per ca' je' anajty nigapxy je Dios ytɨjc. Hue' je' anajty cɨ'm ñayñigapxyii co anajty y'öga'ñ, etz co yjugypɨgɨpy jadüg'oc codugɨɨg xɨɨ.

²²Chi jada' co Jesús yjugypɨjcy codugɨɨg xɨɨ maabɨ anajty y'ögy, je huɨdibɨ anajty ajcxy tɨ yaj'ixpɨcy, ajɨhuɨygootɨ ajcxy huɨdibɨ Jesús anajty tɨ yajnɨmäyiigɨxy. Chi jada' ajcxy mɨbɨjcy ooy jadu'n nej anajty ycojaayɨty ma Dios ylibro, etz com nañ jadu'n anajty Jesús tɨ ymɨna'ñ.

²³Co anajty Jesús yjɨmɨty Jerusalén pascua xɨɨjoty, mayjäy ooy ymɨbɨjcɨ co ajcxy ijxy je mɨjhuinma'ñ huɨdibɨ anajty ytumyb.