San Juan 2:15-20

¹⁵Na ornu bzaac mi de coz zeꞌ, orzeꞌ bzaam tub chicot nu duu lyaar. Orzeꞌ nu ndeꞌ pcyuu num dey, nu tor niy, gal nu shily niy. Bloom dey ich loꞌ ni yuꞌ zeꞌ. Orzeꞌ ptush las mi tiñ ni de yu nu rchaa tiñ zeꞌ nunu blaagy yaam mez ni dey. Orzeꞌ brush las tiñ ni dey.

¹⁶Zeꞌ de yu nu rut begy zeꞌ nam rab mi dey: ―Bloo der de bañcyug ii lugaar ii. Cueꞌ gyicy der yuꞌ ni Ñgyoozh uza̱ par tub yagyiꞌ ―nam.

¹⁷Orzeꞌ de yu nu rsyaꞌ lom byezaꞌ lagy dey zeꞌ nu rniiñ lat riidz ni Ñgyoozh: “Ya̱ rzu ferta̱ nu nac yuꞌr gashtal wagagye̱e̱ ga̱ꞌ la̱”, rniiñ.

¹⁸Orzeꞌ de yu zub lo ni de mbecy Israeel bdugyiꞌ dey lom: ―¿La ñuu muesht lyuur lo̱ de̱ par nu gabe nu ricy cup ru rishbeey nu ricy ru de coz ii? ―na dey.

¹⁹Orzeꞌ na gaꞌm rab mi dey: ―Ptily der yuꞌ ni Ñgyoozh ii. Orzeꞌ ya̱ zu napa̱ ñii nañ chon dzi tuubaꞌ tir gal nu nañ ―nam.

²⁰Orzeꞌ na de mbecy Israeel rab yum: ―Cyuu zub shuup ñaꞌn guꞌ dey bicy yu riiñ, gazeꞌ nu byaꞌ lo yuꞌ ni Ñgyoozh ii. Zeꞌ ru naꞌr nu nañ chon zi dzi bi gzu nap ru ñii ―na dey.