San Juan 2:1-23

¹Ni goc choon dxej guyu tijb guialruxhliaa luguiedx Caná, ni rigaꞌ niz Galilea. Dxel në xniaa Jesús zaꞌ yagaj,

²abiꞌ në Jesús con ree xbejnman gunee reeman persi wej reeman loj lanij guin.

³Chi babidx vin, dxel rëb xniaa Jesús lojman: ―Achetri vin rajp reeman.

⁴Badxiꞌ Jesúsan rëbaman: ―Na, ¿chexquiza zeel nal lon zian? Ad wadxint da horan günan ni rayal günan.

⁵Per xniaaman rëb gajcaman loj ree bén cayüjn mandad yagaj: ―Gol been gra ni naman.

⁶Yagaj zaꞌ xhoꞌp ree guiajs guiaj, ni ru nijs ni rüjnnë ree bén Israel dxiin chi rusia laa reeman ziꞌc na̱j xcostumbr reeman. Abiꞌ lën tijbgaj reen ru cost tibgayuu lijtr.

⁷Abiꞌ rëb Jesús loj ree bén rüjn mandad guin: ―Gol bacha ree guiajs guie nijs. Dxel bachadi reeman laa reen,

⁸abiꞌ rëbaman loj reeman: ―Yan gol gulëë taꞌnan, gol bigdëën loj bén canabee loj lanij guie. Dxel bigdëë reeman laan lojman,

⁹abiꞌ bén canabee loj lanij guin beenman prueb nijs bayajc vin guin, sin guial niagbeeman ban guzan, bén cayüjnz ree mandad guin ragbee, din laa reeman bicaꞌ nijs guin. Dxel gurejdxaman xin cuxhliaa guin,

¹⁰rëbaman lojx: ―Graczi bejn rguiꞌs yaloj vin zagdxe, abiꞌ chi ma guꞌ reeman zilan, dxel rguiꞌsaman vin corrient. Per lüj badxeꞌchaawil vin zagdxe guin persi caguiꞌsilan yan.

¹¹Ni guin na̱j milagr yaloj been Jesús, beenman milagr guin Caná, guiedx rigaꞌ niz Galilea. Zian balüü guialrniabee ni rajpaman abiꞌ bililadx ree xbejnman laaman.

¹²Chi gulox gojc zian dxel zë reeman guiedx Capernaum, con xniaaman, con ree bijchaman con në ree xbejnman. Ni guzu reeman tioꞌp choon dxej.

¹³Chi ma zidyob pascw xlanij ree bén Israel, wej Jesús Jerusalén.

¹⁴Abiꞌ roꞌ yadooroꞌ bidxaaglojman bén cutoꞌ ree goꞌn, con ree xiil con ree palom, në ree bén zojb xan mex ruchaa reeman xmilia ree bén ziaad lood ren.

¹⁵Chi baguiaa Jesús zian, dxel beenchaawaman tijb duu persi babëëman gra reeman, con gra ree xgoꞌn reeman në ree xiil. Gutieꞌchaman xmilia ree bén ruchaa milia guin barexguiat tëëman xmex reeman.

¹⁶Dxel rëbaman loj ree bén cutoꞌ palom: ―¡Gol babëë reeb guie! ¡Ad rüjnnëdi lidx da Dadan ziꞌc luguiaꞌ!

¹⁷Dxel basaaladx ree xbejnman ni ca loj xtiidx Dios lod rëb: “Dád ralenan ruguian ni rüjn reeman lidxil.”

¹⁸Zianz rëb ree bén Israel lojman: ―¿Xhie milagr gulüül du lojn din yayagbeen guial rajpil guialrniabee güünl zian?

¹⁹Badxiꞌ Jesús laan rëbaman: ―Gol baseꞌn yadoo guie, naj yayün laan loj choon dxejzi.

²⁰Dxel rëb ree bén Israel guin lojman: ―Tiuubixhoꞌp ijz goglaa reeman been reeman yadoo guie, ¿guiáad lüj ya yayüjnlan choon dxejzi?

²¹Per Jesús xcuerp gajcaman ruzaꞌtaman chi ruzaꞌtaman yadoo guin.

²²Zeel chi babanman loj ree bengüt, basaaladx ree xbejnman ni rëbaman, abiꞌ bililadx reeman xtiidxaman bililadx tëë reeman ni ca loj xtiidx Dios.

²³Chi guzu Jesús Jerusalén pascw, zien ree bejn bililadx laaman, chi baguiaa reeman milagr ree ni beenman.