San Juan 21:9-19

⁹Pulayama pactamusha ricuranchi ninata japichishcata, chi ninaibi shuc yacu aichas chasnallata panhuas tiyashcata ricuranchi.

¹⁰Pactacpi Jesus ñucanchita nira, Canguna japishcamanda ansa aichata apamuichi.

¹¹Nicta uyasha Simon Pedro barcoma sicasha licata aisamura. Chibi ashca jatun yacu aichaguna jundarishca ara, patsac pichca chunga quimsa (153) jatun yacu aichami. Chasna agllaitami chi licaga mana ansallas liquirishcachara.

¹²Chimandahuasha Jesus ñucanchita micucshamuichi nira. Ñáucanchi Señor Jesus acta ña ricsishami mana pihuas tapuranchichu pitangui nisha.

¹³Chihuasha Jesus ñucanchima caillayasha panda yacu aichandi cura micuichi nisha.

¹⁴Jesus causarishcahuasha pai japishca runagunahuacpi ña cunan quimsa (3) cutinmi ricurira.

¹⁵Micushcahuasha Jesus Simon Pedrota tapura, Jonaspa churi Simon, caigunamanda yalitachu llaquihuangui. Pedro nira, Indá señor, ña yachanguimi ñuca canda llaquishcata. Nicpi Jesus paita nira, Ñáuca oveja huahuagunacuinta acta cuirai.

¹⁶Chihuasha Jesus cutillata tapura, Juanba churi Simon, ñucata llaquihuanguichu nicpi Pedro ainira, Indá señor, ña yachanguimi ñuca canda llaquishcataga. Nicpi Jesus randi nira, Ovejagunata carashcacuinta ñuca runagunata cuirai.

¹⁷Quimsa (3) cutin tapusha nira, Juanba churi Simon ñucata llaquihuaunguichu. Ñáa quimsa cutin Jesus llaquihuanguichu nisha tapucpi Pedroga llaquirishca ainira, Canmi tucuita yachangui señor, ña yachanguimi ñuca canda llaquishcataga. Jesus randi nira, Ñáuca ovejagunata micunata carashcacuinta ñuca runagunata cuirai.

¹⁸Sirtupacha canda nini can malta ashcaibi canllata churaric arangui can munashcama ringahua. Randi can rucuyashami camba ishcai maquigunata chutachicpi shuc runaga camba llachapata churachisha apaitucungui can mana munashcama.

¹⁹Jesus casna rimashaga niurami Pedro imasna huañungaraushcata, chasna huañusha Diosta balichingaraushcatas. Chihuasha Jesus paita catihuai nira.