SAN JUAN 21:6-25

⁶Huan yihual quinmilic: —Xiclasacan xictzojuican ca ima cuali in barquito huan anquinquitzquis. Cuaquín quitzojuije huan jan axcan etíac ca míac michimes, amo huil quejuaje pa quilalilosquiaya in xiquipili hué pin barquito pampa quinmanaje niman míac michimes.

⁷Cuaquinon lajtuc in monextilini hual Jesús quinequiaya, yihual quilic Pedro: —¡Unca in Tata! Quicaquic Simón Pedro pampa cataya in Tata, molaquentic pampa quiquixtic ilaquen pa tequipanus. Cuaquín molasac pa al.

⁸In oc sequin monextilinijmes ajsije pa xalipan pin barquito quitilantihualaloaya in xiquipili tentataya ca michimes. Amo cataya huejca in xalipan itenco, jan cien metros san.

⁹Ajsije pin xalipan, quitaje tixuxli ca ticahuandera huan michin lalalili ipan, huan noje cataya pan.

¹⁰Jesús quinmilic: —Xiquinhualicacan sequin michimes hual anlamic anquinquitzquic.

¹¹Huan uyac Simón Pedro, quitilanac pa xalipan in xiquipili hué tentataya ca michimes huejué, cataloaya ciento cincuenta y tres (chicomepuhualimajlaclihuanye). Huan mas que cataloaya innojen míac, ma yoje amo cotonic in xiquipili.

¹²Cuaquín Jesús quinmilic: —Xihualacan xilacuacan. Huan amaqui ca in monextilinijmes laicanac pa quilajlanis: “¿Aqui tehual?”, pampa momajtiloaya, quimatiloaya pampa yihual Jesús.

¹³Huan hualac Jesús, canac in pan huan quinmacac, huan in michin jan yoje quinmacac.

¹⁴Ca in, cataya sejpa huan oc sejpa ca ye lanextilisli hual Jesús monextic yultataya oc sejpa ca imonextilinijmes quiman moquetzac huan quisac capa mictataya ca in mijquimes.

¹⁵Yoje, quiman lamije lacuaje, Jesús quilic Simón Pedro: —Simón, tiꞌixól Juan, ¿tilaicana tichlasojla ca innojen oc sequin quinami nechlasojlalo? Pedro quilic: —Quema, Tata, ticmati nimitznequi. Jesús quilic: —Xiquinmita huan xiquinlacualti noborreguitos.

¹⁶Jesús quilic oc sejpa: —Simón, tiꞌixól Jonás, ¿tichlasojla nehual? Pedro quilic: —Quema, Tata, ticmati nimitznequi. Jesús quilic: —Xiquinlachili huan xiquinlacualti noborregos.

¹⁷Jesús quilic oc sejpa, huan ca in cataya ca ye lajlanilisli, quilic: —Simón, tiꞌixól Jonás, ¿tichnequi nehual? Huan quicocuc Pedro iyolo pampa Jesús quilic ca in ye lajlanilisli: “¿Tichnequi nehual?” Huan quilic: —Tata, ticmati mochi, ticmati nimitznequi. Jesús quilic: —Xiquinlachili huan xiquinlacualti noborreguitos.

¹⁸Neli, nimitzilía inon: Ticatani yancuic, timolalilini molacuejtiloni, timocuejtini tehual huan tinejnemini ca capic catani ticnequini. Huan quiman tiviejojtis, tiquinxilanis momajmajuan huan oc se mitzlalilis molacuejtiloni huan mitzhuicas ca capic amo ticnequis tías.

¹⁹Inon quilic pa quimachiltis Pedro quinami yahuiaya miqui huan pan ipampa imiquilisli quinami yahuiaya quichihuili hué Dios. Huan lamic Jesús quilic inon, cuaquín quilic: —Xichtoca pa tiyes nomonextilini.

²⁰Pedro momalinac, quitac in monextilini hual Jesús quilasojlaya, quintocatataya. Yihual in monextilini hual mohuilaniaya pa ilaixpan ihuajcol Jesús nepa capa lacuajtataloaya, yihual hual quilajlanic: “Tata, ¿aqui yihual hual yahui mitztemaca ca yehuanten hual yalo mitzmictilo?”

²¹Huan quiman Pedro quitac in monextilini, quilajlanic Jesús: —Tata, huan ¿len yahui quichía nepa unca?

²²Jesús quilic: —Sinda nehual nicnequi pa yihual mocahuas nican pan lalticpan pa quiman ajsis in tonali hual nihualas oc sejpa pan lalticpan, cuaquín ¿len ticpías tehual pa tiquitas ca inon? Tehual xichtoca pa timochías nomonextilini.

²³Yoje, ca moxtin tocnían hual quineltocalo in Tata, mosemanac in lajtol, huan pampa inon yehuanten quijtuloaya in se monextilini amo quiman yahuiaya miqui. Ma yoje, Jesús amo quilic pampa amo quiman yahuiaya miqui. San quilic: “Sinda nehual nicnequi pa yihual mocahuas nican pan lalticpan pa quiman ajsis in tonali hual nihualas oc sejpa pan lalticpan, cuaquín ¿len ticpías tehual pa tiquitas ca inon?”

²⁴Huan in monextilini nehual niunca. Huan neli niquilía innojen lajtomes. Noje niunca in monextilini hual niquinmijcuiluc mochi innojen lajtomes. Huan ticmatilo pampa unca melahuac in lajtol hual nehual neli niquijtúa.

²⁵Cate noje míac oc sequin lachihualisli hual Jesús quinchíac. Huan sinda quinmijcuiluloaya (quinmescribiruloaya) mochi sejse, niquijtúa pampa mochi in lalticpan amo huil cajxiltiaya mochi in amames hual quipialoaya pa moijcuilulosquiaya (moescribirulosquiaya). Yoje ma ye.