San Juan 21:2-19

²Simón Pedrokas Tomáskas, Gemelo muntɨtmika, Natanaelkas, Caná pɨpuluras Galilea suras uzatmika, Zebedeowa painkultuzkas, an paas Jesúspa kammuruzkas wanmakkara.

³Simón Pedrone kaiznara: —Nane pishkaru sulna ɨrɨmtus. Uspane ussa sɨnkaara: —Aukas nukasa pishkaru sulna ɨrɨmtumakpas. Uspane katsa kanuara ɨnpa waara. Sun amtane chinkas sularachi.

⁴Kɨnmɨzkane, Jesúsne pimarain izpan kit kunta. Sunkana paiña kammuruzne Jesústa piankamarachi.

⁵Jesúsne mɨmanara: —Izmuruz. ¿Pishkaru sultakiwas? Uspane sɨnkaara: —Chinkas sultachimakpas.

⁶Jesúsne kaiznara: —An ɨmmu kanuawa numal kiaintain, pishkaru sulnapa. Sulmu kiaintawane, uspane sulmu ukkaasachi, akkwan pishkaru wa akwa.

⁷Suasne maza kammumikane, Jesús kwisha pashitmikane, Pedrora kaizta: —An pimamin kunmikane Anpat i. Anpat i mɨrawane, pantalón tukukasain kuh akwa, Simón Pedrone paiña kwaksham kwat kit pira tizainta.

⁸Mamaz kammuruzne cincuenta sa pi ksukis purazi. Sulmu pishkaru punta akwa, uspane tainñat kit kanuawara pi ksurakima pɨlapta.

⁹Pilta kihsharawane, uspane ĩn usaptɨt izara. Sun ĩnkin pishkaru iltɨt tuazi. Pankas sua tuazi.

¹⁰Jesúsne kaiznara: —Mamin sulta pishkaruruz kararain.

¹¹Simón Pedrone kanuara wat kit sulmu puntɨt katsa pishkarukasa pi ksurakima tainta. Ciento cincuenta y tres katsa pishkaru wiantɨtkas, sulmune pihsharachi.

¹²Jesúsne kaiznara: —Aat kit kwanarain. Mɨnminkas kammuruzne “mɨnmaka” mɨmashitchi, us Anpat i pian akwa.

¹³Suasne Jesúsne kasha at kit pan piz kit usparuza nailnara. Usne pishkarukasa kawarain nailnara.

¹⁴Irɨttas kuhstawane, Jesúsne mamasa paiña kammuruza ussa izpannara. Makasa kutña pijikima izpannara.

¹⁵Kuarawane, Jesúsne Simón Pedrora ka mɨmara: —Simón, Juanpa painkul, mɨzha. An kammuruzne nawa pashiamtu. ¿Nune an kammuruzkin nawa anza pashimtukish? Pedrone ussa sɨnkara: —Watcha Anpat. Nune na nua pashimtura pian. Jesúsne kaizta: —Nawa nɨjkulamturuza iznari. Uspane ap pɨrikukana mai.

¹⁶Jesúsne mamasa ussa mɨmara: —Simón, Juanpa painkul, mɨzha. ¿Nawa pashimtukish? Pedrone sɨnkara: —Watcha, Anpat. Nune na nua pashimtura pian. Jesús kaizta: —Nawa nɨjkulamturuza iznari. Uspane ap pɨrikukana mai.

¹⁷Jesúsne kutña pijikima ussa mɨmara: —Simón, Juanpa painkul, mɨzha. ¿Nawa pashimtukish? Pedrone tayalmɨzta, Jesús kutña pijikima “nawa pashimtukish” mɨmara akwa. Suasne sɨnkara: —Anpat, nune wan chiwal pian. Nune na nua pashimtura pian. Jesúsne kaizta: —Nawa nɨjkulamturuza iznari. Uspane ap pɨrikukana mai.

¹⁸Watcha nua kaiztus. Musittu asmin, nune up kwakshammin kwat kit nu ɨshimtura ɨt. Ɨlapa parɨkane, nune up sail tɨs panazi. Suasne mamazne nua pĩn kwanazi. Mamazne nua nu ɨshimtuchira mɨlnazi.

¹⁹Sun pit paramtuasmin, Jesúsne Pedro miza imtu kainara. Pedro irɨmtukas, awane “Dios kwisha wari” kizanazi. Sun kiztawane, Pedrora kaizta: —¡Nawa kanpazha!