San Juan 21:13-25

¹³Jesús jato, bibube watsabe cato, chiquilachi cuwae.

¹⁴(Jesús puyaca joto mansonhitobi yachi tsachilabe palu ne quiraica jominhe. Junto in quiraicabe peman ne quiraie.)

¹⁵Junni ano fitobi, Jesús Simón Pédrobe cuenta quee. Jesuri itsantie: —Simón, Jonachi nao, ¿nuri laca laquirato, inlaca fe laquirayun? tie. Junni Pédrori janhan tie. Miya, nu mirae tie nuca laquiraeque. Junni Jesús itsantie: —Laca laquiratori, lachi opisa na cuwenta junlaca cuidaina! tie.

¹⁶Junsi Jesús jun tsanquenan manan manpanhato, Simón, Jonachi nao, ¿laca laquirayun? tie. Junni Pedro janhan tie. Miya, nu mirae tie nuca laquiraeque. Junni Jesús Pédroca manpato, laca laquiratori, lachi opisa cuwenta junlaca cuidaina! tie.

¹⁷Junsi Jesús jun tsanquenan manpanhato, Simón, Jonachi nao, ¿laca laquirayun? tie. Pedro mantimini laquiie peman ne tsanquesiri panhanan. Junto Miya tie. Nu jera mirae tie. La nuca laquiraeque mirae tie. Tsantinan, Jesús laca laquiratori, lachi opisa cuwenta junlaca cuidaina! tie.

¹⁸Junni Jesús Pédrobe man fiquinan capae. Itsantie: —Nube tsarasica pachinayoe tie: Nu moso jono mate nuchi tenca munateri nenato, nu nenachi tinun minuca nenamin jominue uyanlabe mantaituto. Tsannan unica inunbi, uyan quiraque jochunae. Uyanlari yalachi tenca munateri nuca tedeca tusisa carito tebanalaquichunae. Junsi nu nenatuchi tinun minuca nenasa carilaquichunae tie.

¹⁹Junni Jesús tsantisi, Pédroca labe penenana! tie. Aman Jesús Pédrobe tsantinato, Pedro niyaque puyano jonunca pánaminue. Junni duque wata poletobi, tsachila Pedro niya quiraque totainunca miito, Diosica duque seque palaquinue.

²⁰Junni Jesús Pédrobe cuenta quinasanan, Pedro lecapoleto quirato, manca Jesube penenaminca benele janaminca quirae. Jesús duque laquiranun tsachi jominhe. Nanni matuleri fiesta ano finato, ya tsachi Jesuchi fe quelole chuto, yabe panhaca jominhe mo yaca cuwapono jonunca.

²¹Junni Pédrori jun tsachi benele janaminca quirato, Jesube itsantie: —Miya, ¿ya tsachiri niyanhichunan? tie.

²²Jesús mantimini Pédrobe manpato, itsantie: —Yaca la manpatano fecári casonnasa tenjanari, nuchi yape josa! tie. Nuri labe penenana! tie.

²³Jesús tsantica josa, yachi tsachilari epele tenca cato, cuenta polarilaquinue. Jun tsachi numatotiya puyatuchunaeque cuenta polarilaquinue. Ya fiquica piyanlete meralaquinue Jesuchi tsachila talari. Junni tsan josanan, Jesús ya tsachica numatotiya puyatuchunaeque paca itominue. Jesús manpatano fecári casonnasa tenjanari, Pédrochi yape josaqueri paca jominue.

²⁴Junni tsanque cuenta polarinun tsachi Juan jomanyoe. La Jesucrístoca jera cuenta quito, in pila jera chutenayoe. Junni la in fiqui chuteca jun tsarasi joe. Tsarasi joeque miralarayoe.

²⁵Tsan jotonan, Jesús jera quicaca pila quitiyoe. Weyan weyancari pila quiyoe. Jesús jera quicaca pila jera quica jomanpari, duque animali pila jono jomin jonhoe. Jun pilaquidoca jera dunan, jerale totenan tilenantiya duno itono jomin jonhoe. Tsanqueri joe.