San Juan 21:11-24

¹¹Orzeꞌ Simo̱o̱ Bed guꞌy nañ barc. Bduꞌ yaay gyish nu yuꞌ de bel zeꞌ. Bgaꞌ yu tuñ lay ñi za nuy ñi par ruꞌ nisyudoo. Dza la nañ ñi yuꞌ du ub bel ily la. Yuꞌ tub gaynal nu̱ zub chon bel zeꞌ nac ma. Mas tonaꞌ la bel zañ yuꞌ nañ gyish zeꞌ, tees wanshaañ.

¹²Orzeꞌ na Jesuuz rab mi de̱: ―Gyeed der gun gyicy ru siily ―nam. Tees ni tub la de̱ wanric de̱ baloor nu ndugyi̱ꞌ de̱ lom ben cyu nac mi, gun gud lagy de̱ nu laab mi, ndeꞌ Shuaan de̱.

¹³Orzeꞌ Jesuuz bechaꞌm lo de̱. Orzeꞌ bduꞌ yaam gyishtily zeꞌ. Briic mi ne̱ de̱. Orzeꞌ niꞌ ziꞌl bicy num de bel zeꞌ.

¹⁴Orzeꞌ ndeꞌ tir chon nu bzaac de̱ Jesuuz despuees ornu bi byabañ mi.

¹⁵Na ornu blazh bicy de̱ siily, Jesuuz nam rab mi Bed: ―Simo̱o̱, iꞌñ Jonás, ¿a rca zir ru ya̱, gazeꞌ gal mod nu rca deꞌ zir de yu ii ya̱? ―nam. Orzeꞌ na Bed: ―Laab Shuaana̱, ru rad lagy ru nu rca̱ ru ―nay. Orzeꞌ na gaꞌ Jesuuz: ―Orzeꞌ mña de mbecy nu nac shily ne̱ ―nam.

¹⁶Orzeꞌ mnii gaꞌm tir cyup la loy. Orzeꞌ nam: ―Simo̱o̱, iꞌñ Jonás, ¿a rca zir ru ya̱, gazeꞌ gal mod nu rca deꞌ zir de yu ii ya̱? ―nam. Orzeꞌ na gaꞌ Bed rab yum: ―Laab Shuaana̱, ru rad lagy ru nu rca̱ ru ―nay. Orzeꞌ na gaꞌ Jesuuz: ―Orzeꞌ mña de mbecy nu nac shily ne̱ ―nam.

¹⁷Orzeꞌ na gaꞌm rab mi yu tir chon la: ―Simo̱o̱, iꞌñ Jonás, ¿a rcar ya̱? ―nam. Orzeꞌ tonaꞌ la bicy shni Bed gyiꞌ nu bdugyiꞌm chon tir loy ornu nam: “¿A rcar ya̱?” nam. Orzeꞌ nay rab yum: ―Shuaana̱, ru rad lagy ru dela coz. Nunu rad lagy ru nu ya̱ rca̱ ru ―nay. Orzeꞌ na gaꞌ Jesuuz. ―Mña de mbecy nu nac shily ne̱.

¹⁸Ya̱ rishli rne̱e̱ lor nu lat nu gufeñ ru, bzur shab ru nunu guar ca ziꞌl lugaar nu rlagy ru char. Tees ornu gyaguush ru, orzeꞌ zaab yaar lo tuubaꞌ mbecy. Orzeꞌ yu zeꞌ gzuuy ru shab ru. Orzeꞌ yu zeꞌ cha nuy ru lugaar zeꞌ nu walagy ru char ―nam.

¹⁹Na ornu mnii Jesuuz de riidz zeꞌ, ndeꞌ par nu gyicy mi nu gabe lac mod gruu zac gyel lily ni Ñgyoozh nu nac nu gat Bed. Orzeꞌ na gaꞌm rab mi Bed: ―¡Da ca icha̱! ―nam.

²⁰Na ornu bish cya Bed bgüiiy par ich yu, orzeꞌ bzaac yu ya̱, yu nu dzi razañ lagy Jesuuz zeꞌ. Laab ya̱ yu nu bzub cuit mi ornu bicy de̱ che du̱m, nunu bdugyi̱ꞌ lom: “Shuaana̱, ¿ca na yu nu cush cya ich ru zeꞌ?”

²¹Na ornu bzaac Bed ya̱, orzeꞌ bdugyiꞌy lo Jesuuz. Orzeꞌ nay: ―Shuaan de̱, se yu re, ¿la zac yu? ―nay.

²²Orzeꞌ na Jesuuz rab mi yu: ―Zeꞌ benu ya̱ rlagya̱, orzeꞌ yu re gabee mbañ yu ornu yapa̱ tuubaꞌ tir. Ru, ¿la nu ricy ñi nir? Nomaas nu da ca ziꞌl icha̱ ―nam.

²³Orzeꞌ bzu riidz lat dela de yu nu rsyaꞌ lom nu ya̱ wata̱. Tees walab nu mnii Jesuuz nu wata̱. Coz nu mniim ndeꞌ: “Zeꞌ benu ya̱ rlagya̱, orzeꞌ yu re gabee mbañ yu ornu yapa̱ tuubaꞌ tir. Ru, ¿la nu ricy ñi nir?”, mniim.

²⁴Nunu laab ya̱, yu nu mnii de riidz ii. De riidz ii pca̱a̱ lo gyicy; nunu rad lagy de̱ nu ndeꞌ coz rishli nu mne̱e̱.