SAN JUAN 20:5-24

⁵Dá c'ą't'ä bʉ mbo dá nu hønt'ʉ yʉ 'bø't'e cąx bʉ ngue xí 'bant'i. Pɛ him 'bex dá cʉt'ä mbo.

⁶Nɛ nu'bʉ mí zøm bʉ ra Simón Pedro, 'bex bi uɛ̨ntho bʉ mbo, nɛ'a bi nu cąx bʉ yʉ 'bø't'e.

⁷Nɛ nu'a n'da ra 'bø't'e xí 'banba rá yą ra Jesús n'danni mí cąts'i, ma do'mi a.

⁸Nɛcä dá cʉt'ä mbo bʉya, madague'bʉ m'bɛt'o dá søngä bʉ.

⁹Nɛ nu'bʉ má nu 'bɛ'a di ja bʉ, dá ɛ̨c'yɛigä gue majuąni bi dąmbɛ̨ni a ra Jesús.

¹⁰Dá peng'be bʉ ma ngu'be bʉya.

¹¹Pɛ nu'a ra María bi gotho bʉ ja rá goxthi ra hyądo nɛ i zoni nɛ di c'ąrpʉ mbo.

¹²Nɛ bi nu yoho yʉ́m 'bɛhni Oją mahɛ̨ts'i i he yʉ t'axcahe. I hupʉ n'da bʉ mí ja rá yą ra Jesús nɛ hupʉ man'da bʉ mí ja yʉ́ gua.

¹³Nɛ bi xi a ra María: ―Grá xisu, hanja gná zoni, bi 'yɛ̨mp'a. Nɛ nu ra María bi dąt'ʉ: ―Nguetho bin jʉc'a ma Hmu nɛ hin dí pądi hapʉ bi thuts'i, bi 'yɛ̨na.

¹⁴Nɛ nu'bʉ mín hanni ra María, bi nu ra Jesús i 'bäpʉ. Pɛ him mi pądi gue gue'a.

¹⁵Nu'a ra Jesús bi 'yɛ̨mp'a: ―Grá xisu, hanja gná zoni, to'o guí honi, bi 'yɛ̨mbi. Pɛ nu ra María mím bɛ̨ni gue gue'a ran 'yohʉ di jamansu ra nuąndät'o. Janangue'a bi 'yɛ̨mbi: ―Nu'bʉ gue'e gá jʉga ma Hmu, dami 'yurqui ts'ʉ hapʉ gá pɛgui nɛ ga tuxä, bi 'yɛ̨mbi.

¹⁶Nɛ nu ra Jesús bi ndønba rá thuhu: ―María, bi 'yɛ̨mbi. Nu ra María 'bex bi 'bä't'i xʉn ho bʉya, bi nu nɛ bi 'yɛ̨na: ―Raboni, nde da ma, “Xänbate i,” bi 'yɛ̨mbi.

¹⁷Nɛ nu ra Jesús bi 'yɛ̨mbi: ―Pɛ hingui sä 'bexque gui thäcä ya nguetho di 'bɛh mi ts'ʉ ga mba bʉ bí 'bʉh ma Ta. Janangue'a 'bɛ ní mbahma bá xi ʉ ma cuui ga pengbʉ bí 'bʉh ma Tagä, nɛ ahʉ ni Tahʉ a, nu'a ma Ojągä a, nɛ ahʉ ni Ojąhʉ a, bi 'yɛ̨mbi.

¹⁸Nu'a ra María ra mɛngu bʉ Magdala bi mba bʉya, nɛ bi xije dyʉ xädihe gue bi nu ra Hmu nɛ bi xije 'bɛ'a bi man'a.

¹⁹Nɛ nu'bʉ mín de guet'a ra pa domingo, nthʉ't'i yʉ́ jut'i ra ngu bʉ dám 'bʉhmbe nguetho dá su ma ngʉrpihe, nɛ nu'bʉ má nuhe, 'bä inde bʉ dí 'bʉhmbe ra Jesús. Nɛ bi 'yɛ̨na: ―Daman johyahʉ, bi 'yɛ̨nje.

²⁰Nɛ nubʉya bi 'yurcahe yʉ́ 'yɛ guepʉ xí 'dømbi, nɛ rán zʉ'bøts'e guepʉ xín sʉnba ra ts'ąt'ɛgui. Nɛ nu'bʉ má nuhe, dá pąhmbe majuąni ma Hmuhe a, nɛ ɛ̨mmɛ dán johyahe bʉya.

²¹Nɛ bi ma mahøn'a ra Jesús: ―Daman johyahʉ. Nɛ tengu tho bʉ í 'dac ra 'bɛfi ma Ta dá jap yʉ ją'i ua ja ra ximhäi da bądi, nguthogä dí 'da ahʉ ra 'bɛfi gui jafʉ yʉ ją'i ua ja ra ximhäi da bądi, bi 'yɛ̨nje.

²²Nɛ nu'bʉ mí jua a bi man na, bi huigähe ran dąhi n'da ngu n'dagähe bʉya. ―Dami hyąmhbʉ rá Hogandąhi Oją, bi 'yɛ̨nje.

²³Nu'a to'o di päh yʉ́ mbʉi nangue yʉ́ ts'oqui, i ja nin t'ɛ̨dihʉ gui xihmbʉ ma punbi a. Pɛ nu'a hin di päh yʉ́ mbʉi nangue yʉ́ ts'oqui, i ja nin t'ɛ̨dihʉ gui xihmbʉ him ma punbi a, bi 'yɛ̨nje.

²⁴Pɛ nu ra Tomás gue'a i t'ɛ̨mbi ra Go a, n'da ma mixädihe, njo'o bʉ 'bʉ mí nɛqui ra Jesús.