San Juan 20:4-24

⁴Vanga me catsijo me quiji me, peru cha xingu jan ne, hitsë sa hñu cavanga cha xi cuma rë Pedru, hane tjun cha vëhë cafehe cha xcun tsjun.

⁵Hane xi cafehe cha jan ne, catsiquindi cha yojo rë cha, hane cavëë cha tsjian xi cavitjingui rë nima Jesús, siu jan. Peru cavisiin cha.

⁶Hane xi cafehe Simón Pedru xi camá ngascan ne, cavisehen me cahntsua tsjun jan. Hane cavëë me tsjian jan siu,

⁷hane pañutu xi camahñu rcu nima jan ne, hacuiin tacun tangun cojo tsjian jan ta tjeyu ne, xín tacun.

⁸Ngajan xi cha ladu rë Jesús xi cafehe titjun xcun tsjun jan ne, hacuaha cavisehen cha. Hane cavëë cha hacuaha camacjain rë cha.

⁹Nixtin hya ne, cjëë sa cuijne rcu cha xi chja xujun rë Nina xi nima Jesús ne, meje rë xi cuya me cjuahñu.

¹⁰Hya xi camá ne, xuta ladu rë Jesús jan ne, cavuya cafe me.

¹¹Hane na María ne, hacuaha cavuya quiji nga na xcun tsjun jan, hane ngajan casecun na tingotjo cajihnda na. Hane táha tijihnda na ne, catsiquindi na yojo rë na, cavutsejenya na cahntsua tsjun jan.

¹²Hane cavëë na jo ángel xi tyava tsjian rë, siu hiscan cafaña nima; ngu ne, táha hiscan cafaña rcu nima hane xingu ne, táha hiscan caviyuju ntsacu.

¹³Ngajan xi ángel jan ne, cuitjin cavinenguise rë na: ―‍Ngaye chjuun, ¿mé má chjihnde? ―‍Cuatjin cavinenguise ángel jan na. Hane na vëhë ne, cuitjin cachja na: ―‍Cavaxë me maestru naha ne, hveen jani quiji chani rë. ―‍Cuatjin cachja na.

¹⁴Hane xi cavatju cachja na cjua vëhë ne, sehe cavuya na táha ngaxtun na, hane cavëë na Jesús secun me jan. Peru hvíin na xi hacui Jesús.

¹⁵Ngajan xi Jesús ne, cuitjin cachja me: ―‍Ngaye chjuun, ¿mé má cuatjin chjihnde? ¿Yo xi vinchise? ―‍Cuatjin cachja me. Hane xi má rë na vëhë ne, cha xi sahmi cuidadu yatjë jan xi cachja. Vëhë xi cachja na cuitjin: ―‍Tatá, sa xi ngayun canaxun nima ne, tinújun jani catsangun chanu, sehe cjuë́ jaha. ―‍Cuatjin cachja na.

¹⁶Ngajan xi Jesús ne, cuitjin cachja me cojo rë na: ―‍¡María! ―‍Cuatjin cachja me. Hane xi cavuya na ne, sehe cachja na hne hebreo cuitjin: ―‍¡Rabuni! ―‍Cuatjin cachja na cjua xi meje cuichja Maestro.

¹⁷Ngajan xi Jesús ne, cuitjin cachja me cojo rë na: ―‍Ha quihndë xicachunhñuu sa ná ta cjëë cjuë́neje cjuë́tjënguë Nina Nahmi naja. Peru tánguntjengun xuta ladu naha xi yahnga, hane cuitjin tinújun cojo rë me: “Cjuë́neje, cjuë́tjënguë Nahmi naha, me xi hacuaha Nahmi nuju, me xi Nina naha hacuaha Nina nuju ngayujun ni.” Cuatjin tinújun. ―‍Cuatjin cachja Jesús.

¹⁸Ngajan xi na María na Mágdala jan ne, quiji cachja na cojo xuta ladu rë Jesús cuitjin: ―‍¡Cahvë maestru naja! ―‍Cuatjin cachja na. Hacuaha cachja na cjua xi cachja Jesús cojo rë na.

¹⁹Hane xi camajñu ndaja tsëhë nixtin tjun tjun tsëhë totje jan ne, tjin tangun xuta ladu rë Jesús jan. Hane tichjáhñu tingotjo ndihya siu me, tsëhë xi tsacjun me xutaxa rë yungun jan. Hya xi camá ne, cafehetsejen Jesús casecun me ngajñi rë xuta ladu rë me, hane cuitjin cachja me: ―‍Cjuandaja cjuajeya catejña cojo nuju. ―‍Cuatjin cachja me.

²⁰Hane xi cavatju cachja me cjua vëhë ne, sehe catsingacun me tsja me hacuaha catsingacun me ngu ladu ntsacu ndanisin rë me. Ngajan xi xuta ladu rë me jan ne, jemu ndaja camá rë me hora xi cavëë me maestru naja.

²¹Hane cachja nga Jesús cojo rë me xi cuacun jan cuitjin: ―‍Cjuandaja cjuajeya catejña cojo nuju. Sacuatjin catsingatju ná Nina Nahmi naja ne, hacuaha cuatjin tsingátju nuju ngayun. ―‍Cuatjin cachja Jesús.

²²Hane xi cavatju cachja me cjua vëhë ne, sehe cachimatjo me xuta jan, sehe cachja me cuitjin: ―‍Chjuhunntsun Hasen rë Nina cahntsua xahasen nuju.

²³Xuta xi ninchatuhun jyë́ rë me ne, ha camanchataha. Hane xuta xi ninchatuun jyë́ rë ne, ha camanchataain. ―‍Cuatjin cachja Jesús.

²⁴Tomás, me xi chja me tsëhë Cha Lihma, ngu xuta ladu rë Jesús ngajñi rë me xi tejó jan ne, cuajin me tacun me hya xi cafehe Jesús hiscan xi tjin tangun xuta ladu rë me xi yahnga jan.