SAN JUAN 20:4-22

⁴A̱ma rano nduh che o ye cuahn ye, ate ihyan che ta̱ma me ne, tahque dito chano ye che co Pedro, ne tahque mena̱n ca nda̱ ye na̱n ya̱yan me.

⁵Ndihchenun ye chete ya̱yan me, ne ndihchero ye tino che chahcotuma ihyan Dihvo vo che cheta̱ve min, ate hua chenda̱ ye.

⁶Numanahn min ne, nda̱ Simón Pedro, ne chenda̱ ye chete ya̱yan me. Namin ndihchero ye tino chahn che cheta̱ve min.

⁷Ava̱ne ne, tino che chacotuma tin Dihvo vo ne, ndechetive, quendite a̱ma la̱do.

⁸Tuhme chenda̱ ihyan apóstol che ta̱ma me chete ya̱yan, ne ndihchero ye nduhca̱ che chi, ne chitahno ye.

⁹Ro min ne, metah conahn ihyan chahn che a ndirun na̱n Ndudo yahn Dendiohs nduhca̱ che va che ntuche Dihvo vo va̱n tena̱hn.

¹⁰Chihno min ne, ndaconan ihyan apóstol chahn na̱n che chenun ye.

¹¹Numanahn min ne, ndaconan María, ne chihnde ye chihto ya̱yan me, raco ye. Ura che raco ye ne, ndihchenun ye chete ya̱yan me,

¹²ne ndihchero ye o ángel chenun ye tino cua, vate ye na̱n che chacondihte ihyan Dihvo vo. A̱ma ye cua̱hn na̱n che chi nihno tin Dihvo vo, ne ta̱ma ye ne, cua̱hn ndiya ca̱h ye.

¹³Tumerune ángel chahn ihyan: ―¿Deh cuande che reque ne? Ndahconan María, ne ra̱hn ye ri ye ángel chahn: ―Racó yahn che quenda ihyan Dihvé, ne hua devanó ti chengu ye ihyan.

¹⁴Cade chihno ra̱hn ye chemin cuahn che ndaconan ye, ne ndihchero ye Dihvo vo che nti ye min, ate hua devano ye che ihyan min.

¹⁵Tuhme tumerune Dihvo vo ihyan, ne ra̱hn ye: ―¿Deh cuande che reque ne? ¿Duh rinohn ne? María ne, ra̱hco ye te co sa̱hn che redin cuda̱do ya̱hn nda̱ta me, ne ra̱hn ye: ―Ndete che ndih quenda ne Dihvé ne, ca̱hma ne co ne u ti chengu ne ihyan, ca̱va che cá̱hn quenguá ihyan.

¹⁶Tuhme ra̱hn Dihvo vo ri ye ihyan: ―¡María! Ndaconan María, ne ra̱hn ye deva̱co yahn ye, hebreo, ri ye Dihvo vo: ―¡Raboni! ―che nahn ca̱hma Ihyan Ricuahn.

¹⁷Ra̱hn Dihvo vo ri ye ihyan: ―Hua nahn tah u, te metah na̱hn na̱n va Chidá. Tahque ndah ne, cuehn ngo ihyan apóstol yáhn che ná̱hn na̱n va Chidá, ihyan min che Chida nchuhn ma̱n, Dendiohs yáhn ma̱n, Dendiohs yahn ne ma̱n.

¹⁸Tuhme chahn María chego ye ihyan apóstol chahn che ndihchero ye Dihvo vo ma̱n, nduhca̱ che ra̱hn ye ri ye ihyan ma̱n.

¹⁹A ro min no cuahn che a chi man ne, ndi da̱ma ihyan apóstol chahn, ne neneca̱hde ye vah na̱n che chenun ye yahn che va̱h ye sa̱hn ndina̱n yahn ihyan nación yahn Israel. Ura min ne, adena̱n chenda̱ Dihvo vo vah, chandi ye menda̱hn, ne ra̱hn ye: ―Dendiohs din yahino ye nchuhn. Hua dehve ra̱hco ne.

²⁰Chihno ra̱hn Dihvo vo chemin ne, na̱hme ye ta̱h ye na̱n che nchuh cla̱vo ma̱n, ticua ye ma̱n, ihyan chahn, ne a̱ma chi yeno ye ndihchero ye ihyan.

²¹Ndaconan ra̱hn Dihvo vo ri ye ihyan chahn: ―Dendiohs din yahino ye nchuhn. Hua dehve ra̱hco ne. Namin ra̱hn ye ri ye ihyan chahn: ―Nduhca̱ che dechuh Chidá u ne, namin dechúh nchuhn.

²²Tuhme tivenan ye ihyan chahn, ne ra̱hn ye ri ye ihyan: ―Conun Vaco Ndah yahn Dendiohs nchuhn.