Text copied!
CopyCompare
De riidz ni trat cub nu bicy nu Ñgyoozh mbecy: Salmos; Proverbios - San Juan - San Juan 20

San Juan 20:3-21

Help us?
Click on verse(s) to share them!
3Orzeꞌ Bed gal nu ya̱ za de̱ za güi̱i̱ ruꞌ baa zeꞌ.
4Orzeꞌ rup laa de̱ brush de̱ carer za̱, tees ya̱ bded lo̱ lo Bed. Orzeꞌ bruꞌña̱ ruꞌ baa loga la.
5Orzeꞌ bzaab tiilya̱ nu bgüi̱i̱ nañ gyerbaa zeꞌ. Zeꞌ bzaaca̱ se sab ziꞌl nim nguaañ. Tees wanchu̱ꞌ nañ gyerbaa zeꞌ.
6Orzeꞌ par icha̱ bruꞌña Simo̱o̱ Bed. Orzeꞌ lueg la guꞌy nañ gyerbaa zeꞌ. Nunu niꞌ ziꞌl bzaac yu sab zeꞌ nguaañ.
7Nunu bzaacaꞌy negy nu ptiish dey too Jesuuz nguaa reñ ñi nu sab nim nunu nap nach cyup ñi nguaañ.
8Orzeꞌ gazeꞌ nu niꞌ ziꞌl guꞌ ga̱ꞌ ya̱; mas laab ya̱ bruꞌña̱ loga la ruꞌ gyerbaa zeꞌ. Orzeꞌ bzaaca̱ de nu ndeꞌ. Orzeꞌ guña lagya̱ nu byabañ mi.
9Tees de̱ ya̱ gabee nigul gyet lag de̱ cuen lac yaruu de riidz ni Ñgyoozh nu rniiñ nu mi zeꞌ rlagy ñi nu gyabañ mi.
10Orzeꞌ bish cya de̱ ya̱a̱ de̱ par yuꞌ.
11Orzeꞌ Li zeꞌ gusuñ ruun ñi par ich roꞌ ni gyerbaa zeꞌ. Lat nu ruun lañ zeꞌ, orzeꞌ bzaab tiily ñi bgüiiñ nañ gyerbaa zeꞌ.
12Orzeꞌ bzaac ñi cyup anc nañ gyerbaa zeꞌ. Zu dey negy cacy. Zub dey zeꞌ nu gubish cuerp ni Jesuuz. Tub yu zub yu zeꞌ nu gubish toom. Zeꞌ tuubaꞌy zub yu par zeꞌ nu gubish gyiꞌm.
13Orzeꞌ de anc zeꞌ nay rab yu Li: ―Biñ mñaa, ¿la gyiꞌ, lagu ruun ru? ―na dey. Orzeꞌ na Li: ―Gun za nu mbecy Shuaana̱, nunu wagad lagya̱ ca bicy dem mi ―nam.
14Na ornu blazh mniiñ de riidz zeꞌ, orzeꞌ bish cyañ bgüiiñ par ich ñi. Orzeꞌ bzaac ñi nu zu Jesuuz. Tees wangyuꞌ loñ ti laab mi.
15Orzeꞌ na Jesuuz rab mi ñii: ―Biñ mñaa, ¿la gyiꞌ, lagu ruun ru? ¿Cyu ryub ru? ―nam. Orzeꞌ mnii tooñ nu ndeꞌ tub mbecy nu ricy riiñ lat de ya mni nu nash zeꞌ. Orzeꞌ nañ: ―Zeꞌ benu ru gua nur cuerp nim, orzeꞌ mnii lo̱ ca bicy ru ñii, gun orzeꞌ ya̱ cha gyi̱ cuerp zeꞌ ―nañ.
16Orzeꞌ na Jesuuz rab mi ñii: ―¡Li! ―nam. Orzeꞌ bish cyañ bgüiiñ lom. Orzeꞌ mnii nuñ mi nu riidz hebreo: ―¡Rabuni! ―nañ. Riidz zeꞌ, ndeꞌ yaruuñ moscuel.
17Orzeꞌ na Jesuuz rab mi ñii: ―Bzaan yaa ya̱, gun gaal zi nigul gya̱ lo Ñgyoozh uza̱. Tees na yaa niir lo de bicya̱ nu bi gya̱ ga̱ꞌ lo biñ nu nac uza̱, gal nu uz der: lo biñ nu nac Ñgyoozh ne̱, gal nu Ñgyoozh ni de ru ―nam.
18Orzeꞌ Li nu bruu Magadán gush nez ñi yaa tooñ rishlo de yu nu rsyaꞌ lom. Mniiñ lo dey nu bzaac ñi Shuaan den. Nunu mnii gaꞌñ lo dey de coz nu mniim looñ.
19Na ornu bi becheñ ni laab dzi loga ni sman zeꞌ, orzeꞌ byatublaazh de yu nu rsyaꞌ lom nañ tub yuꞌ. Nunu nicy psoow dey roꞌ nu nac nu rdzib dey lo de yu zub lo ni de mbecy Israeel. Orzeꞌ Jesuuz bruꞌñam gusum lat dey. Orzeꞌ nam rab mi dey: ―¡Gyel ri zu briñ lat der! ―nam.
20Ornu blazh mniim riidz zeꞌ, orzeꞌ blyuum yaam lo dey nunu blyuu gaꞌm rit lyush mi lo dey. Orzeꞌ tonaꞌ la bet lagy dey nu bzaac dey Shuaan den.
21Orzeꞌ na gaꞌ Jesuuz rab mi dey tuubaꞌ tir: ―¡Gyel ri zu briñ lat der! Gal nu Ñgyoozh uza̱ bzuu nez mi ya̱ yapa̱ gyishlombecy ii, ndeꞌ nu niꞌ ziꞌl ya̱ gzuu neza̱ der char lat de mbecy nu yuꞌ gyishlombecy ―nam.

Read San Juan 20San Juan 20
Compare San Juan 20:3-21San Juan 20:3-21