SAN JUAN 20:19-30

¹⁹A ro min no cuahn che a chi man ne, ndi da̱ma ihyan apóstol chahn, ne neneca̱hde ye vah na̱n che chenun ye yahn che va̱h ye sa̱hn ndina̱n yahn ihyan nación yahn Israel. Ura min ne, adena̱n chenda̱ Dihvo vo vah, chandi ye menda̱hn, ne ra̱hn ye: ―Dendiohs din yahino ye nchuhn. Hua dehve ra̱hco ne.

²⁰Chihno ra̱hn Dihvo vo chemin ne, na̱hme ye ta̱h ye na̱n che nchuh cla̱vo ma̱n, ticua ye ma̱n, ihyan chahn, ne a̱ma chi yeno ye ndihchero ye ihyan.

²¹Ndaconan ra̱hn Dihvo vo ri ye ihyan chahn: ―Dendiohs din yahino ye nchuhn. Hua dehve ra̱hco ne. Namin ra̱hn ye ri ye ihyan chahn: ―Nduhca̱ che dechuh Chidá u ne, namin dechúh nchuhn.

²²Tuhme tivenan ye ihyan chahn, ne ra̱hn ye ri ye ihyan: ―Conun Vaco Ndah yahn Dendiohs nchuhn.

²³Ndete che nchahco ne nunde yahn adecoduhno ihyan ne, a nda̱ca ye vederenchahco. Me ndete che hua ne, a hua nda̱ca ye.

²⁴A̱ma ihyan apóstol chahn che duche ye Tomás, ihyan min che nta̱hco ihyan che duche ye “Cua̱hche” ne, metah ye ro che nda̱ Dihvo vo.

²⁵Cuahn che nta̱ ye ne, ra̱hn ihyan chena̱hn chahn ri ye ihyan: ―A ntuche Dihvo vo. A ndihchero nuhn ihyan. Ate ra̱hn Tomás ri ye ihyan chahn: ―Atena̱n che terún ndutitá̱h ya̱hveta̱h ye na̱n che nchuh cla̱vo ma̱n, ticua ye na̱n che nchuh la̱nza ma̱n, tuhme cotahnó che a ntuche ye.

²⁶Chihno nine ro ne, nto da̱ma tun ihyan apóstol chahn chete a̱ma vah, ne ro min ne, nduco Tomás quenun ye min. Andahre ntude chendevah ne, chenda̱ Dihvo vo chandi ye menda̱hn, ne ra̱hn ye: ―Dendiohs din yahino ye nchuhn. Hua dehve ra̱hco ne.

²⁷Tuhme ra̱hn ye ri ye Tomás: ―Condihchero ya̱hvetá̱h, ne cueteron ndutitah. Namin cueteron ndutitah ticuá. Cuitehne, che a ntuché. Hua o ndedecadine.

²⁸Tuhme ra̱hn Tomás ri ye Dihvo vo: ―¡Ndih che Dihvé ma̱n, Dendiohs yáhn ma̱n!

²⁹Ra̱hn Dihvo vo ri ye ihyan: ―Tomás, ma̱n ne, ritehne yahn che ndihchero u. Ndah ro yahn ihyan che andahre hua rendihchero ye u, ate ritahno ye u.

³⁰Dihvo vo Jesucristo ne, a̱ma ndeh na̱n ca vederihno din ye na̱n ihyan apóstol yahn ye che hua ndirun na̱n ca̱ca cuh.