SAN JUAN 20:19-29

¹⁹Co je huin'it xɨɨmbɨ chuu'ɨɨy seman ixtɨgɨ', aducy anajty tɨjc'aguu y'ity ma anajty je discípulos ajcxy yajpatcɨxy, mɨɨd co anajty ajcxy tzɨgɨ̈y je judíojäy ajcxy huɨdibɨ anajty mɨdzip'ajtp Jesús. Chi Jesús ytɨgɨɨy cujc'amy ma je' ajcxy, e chi jada' capxpocxy ajcxy, nɨmay: ―Jotcugɨ' miich ajcxy.

²⁰Yam jadu'n anajty ymɨna'ñ, chi ajcxy yaj'ijxy je' ycɨ' ma je clavo ytɨgɨɨy, etz ycaachyjɨjp ma anajty jäy tɨ ycumyii. Chi yjotcugɨɨy ajcxy co ajcxy ijxy je yHuindzɨn.

²¹Chi jada' Jesús jadüg'oc capxpoocx, nɨmay ajcxy: ―Jotcugɨ' miich ajcxy. Jadu'n nej ɨɨch nDeedy xyquejxyɨch ya naaxhuiñ, nañ jadu'n ɨɨch miich ajcxy yam nguejxhuäcxy mɨɨd ɨɨch n'ayuc.

²²Co Jesús jadu'n ymɨnañ, chi jada' ajcxy nïbuxujy cöbuxujy nɨmay: ―Huen Dios yjɨhuɨ'ñ ymɨc'ajt xy'adɨgɨ̈y xyjottɨgɨ̈y ajcxy.

²³Huenpɨnjäyɨty huɨdibɨ miich ajcxy mbocyhuinmeecxyp, nañ ypocyhuinmeecxɨpy Dios Teedy. Huenpɨnjäyɨty huɨdibɨ miich ajcxy ca' ypocy mhuinmeecxaanɨ, nañ jadu'n Dios Teedy ca' yɨ' ypocyhuinmeecxa'ñyii.

²⁴Tomás je' huɨdibɨ anajty mɨɨd majmetz yca'pxy Jesús ydiscípulos ajcxy, je huɨdibɨ anajty yajtijp Dídimo, ca' je' anajty jɨm choonɨty co Jesús ymiñ oga'n.

²⁵Chi je jacjadyii ajcxy ymɨgüg ñɨmaayɨ: ―Tɨ ɨɨch ajcxy n'ixy je Huindzɨn Jesús. E chi je' y'adzooy: ―Pen ca' n'ixyɨch ma yɨ' ycɨ' je clavo'au, e pen ca' ngɨ̈huäxɨch ngodijɨ̈yɨch ma clavo'au, e ngɨ' nbɨdägyɨch ma ycaachyjɨjp ma anajty ycumyɨty, ca' nmɨbɨgɨpyɨch co yjanchɨty.

²⁶Chi jacoductujc xɨɨ ajcxy jadüg'oc anajty yajpaady tɨgoty nidüg'ócɨy je discípulos ajcxy. Tzooñ anajty Tomás nañ jadu'n. Chi Jesús ymiñ. Agɨ̈y anajty tɨjc co Jesús ytɨnay'ahuɨɨy cujc'amy ma je' ajcxy. Huin'it ycapxpocxy, chi nɨmay: ―Jotcugɨ' miich ajcxy.

²⁷Chi jada' nɨmay je Tomás: ―Pɨdäg ya mgɨ̈huäx ma clavo'au ma ngɨ̈jɨch. Najtzxajɨ' mgɨ' etz pɨdäg ma ɨɨch ngaach ma jäy xycumyɨch, e mɨbɨc yajxon tɨydudägy.

²⁸Chi Tomás y'adzooy: ―Ɨɨch miich nHuindzɨn'ajtyp etz ɨɨch miich nDios'ajtyp.

²⁹Chi Jesús Tomás nɨmay: ―Mɨɨd co miich tɨ xy'ixyɨch, paady miich tɨ mmɨbɨcy. Jotcujc yɨ' ajcxy huɨdibɨ ca' xy'ixyɨch, e tɨ ymɨbɨcy co tɨ njugypɨcyɨch co n'o'gyɨch.