SAN JUAN 20:14-29

¹⁴Jë₂ bá₄ ca₂'ŋiai₂ jág₁ në₅, jme₁ca₂jéin'₃, jaun₂ ca₂jɨ́in₂ Jesús jme₁chéin'₄; la₁ tsá₃ jaun₂ jme₁ŋi₅, Jesús bá₄ 'éi₂.

¹⁵Jaun₂ në́₃ ca₂ŋag₃ Jesús: ―'Io₅₄, ¿'e₂ lë₃ 'au'₂ 'ne₂? ¿I₂'ein₂ 'nag'₂? Jaun₂, ia₁ a₂lɨ́n₂ María a₂lɨ́n₅ 'éi₂ dsa₂ i₂jmo₅ 'í₁ 'uë₃ jaun₂, jaun₂ ca₂juá'₂: ―Gui'₅₄, chi₂jua'₂ 'ne₂ ne₂te'₅₄, jua'₅₄ a₂já'₄ në₂quioin'₂, ia₁jaun₂ të₅₄ jniá₂.

¹⁶Jaun₂ ca₂juá'₂ Jesús: ―¡María! Jaun₂ ca₂jén'₃ María jaun₂ ca₂juá'₂ quian'₅₄ jág₁ jmei₅ hebreo: ―¡Raboni! ―co₂'nió'₄ a₂juá'₂: Të₅ quiáng₃.

¹⁷Jaun₂ ca₂juá'₂ Jesús: ―Tsá₃ lë₁jmá'₂ quió₃, ia₁ tsá₃ ma₂uɨ́g₂ guë́₄ jniá₂ ja₁con₂ Ŋe'₃. La₁ guan'₂ o₂chei'₅₄ rɨ́n'₃ jniá₂, a₂uɨ́g₂ jniá₂ ja₁con₂ Ŋe'₃, ja₁con₂ Ŋéi'₅ 'nia'₂ në́₃, ja₁con₂ Diú₄ quiáng₃, ja₁con₂ Diú₄ quián'₂ 'nia'₂ në́₃.

¹⁸Jaun₂ bá₄ ŋó₃ María chan₂ Magdala 'éi₂ ca₂i₁chi'₄ chi'₂ dsɨ₂guia₃-tɨ́n₂ a₂jme₁ma₂në₂jɨ́in₂ Te₁gui'₅₄, a₂jme₁ma₂në₂juá'₂ 'éi₂ jág₁ jaun₂.

¹⁹Jme₁ca₂nei₂ jë₁le₂'uɨg₅₄ jmɨg₄ semana jaun₂ në́₃, jme₁tion'₅₄ chi'₂ dsɨ₂guia₃-tɨ́n₂ le₁ŋɨi'₂, qui₂le₁jnág₅ 'né₅ ja₁tioin'₅₄, ia₁ a₂gain₃ dsa₂ judíos. Jaun₂ ca₂'í₃ Jesús, jaun₂ ca₂nau₂ dsi₂jo₂ quió'₅ 'éi₂, jaun₂ ca₂juá'₂: ―Juɨ₁'ei₅ tei₄ 'au'₂ 'nia'₂.

²⁰Jme₁ma₂ca₂juá'₂ le₂në₅, ca₂'ë₃ mɨ₂gu₂ quian'₅₄ mɨ₂dsɨ₁coin₂. Jaun₂ ca₂jmo₃ 'io'₂ chi'₂ dsɨ₂guia₃-tɨ́n₂ jme₁ca₂jɨ́in₂ Te₁gui'₅₄.

²¹Jaun₂ ca₂juá'₂ táng₃ Jesús: ―Juɨ₁'ei₅ tei₄ 'au'₂ 'nia'₂. Juɨ₁lia'₂ ca₂chei₃ Ŋe'₃ jniá₂, ján₃ bá₄ le₂jaun₂ tsɨn₅₄ jniá₂ 'nia'₂.

²²Jaun₂ në́₃ ca₂jéi₂ dsí₂ ne₄ quió'₅ dsa₂ 'éi₂, jaun₂ ca₂juá'₂: ―Guen'₅₄ 'nia'₂ Jme₂dsí₂ Jŋió₅.

²³Chi₂jua'₂ 'ein₂ i₂ca₂'én'₃ 'nia'₂ dsáu₁, ma₂qui₂ca₂i₃'én₂ bá₄ dsáu₁ 'éi₂; chi₂jua'₂ 'ein₂ tsá₃ ca₂'én'₃ 'nia'₂ dsáu₁, të₃'ŋiá₄ dsáu₁ ja₁coin₂.

²⁴La₁ To₁má₄ në́₃, jan₂ chi'₂ dsɨ₂guia₃-tɨ́n₂ i₂të́'₂ dsa₂ Dsa₂ Tsɨn'₅₄, tsá₃ jme₁'ein₅₄ jë₄ quió'₅ rɨin'₅₄ lia'₂ con'₂ jme₁dsióg₃ Jesús.

²⁵Jaun₂ lë₃, jme₁ca₂juá'₂ chi'₂ dsɨ₂guia₃-tɨ́n₂ rɨin'₅₄: ―Ma₂në₂jɨn₄ jnia'₅₄ Te₁gui'₅₄. La₁ To₁má₄ në́₃ ca₂juá'₂: ―Në₁jua'₂ tsá₃ ca₂jág₃ jniá₂ léi₄ mɨ₂gu₂ ja₁ca₂i₃ba₅₄ mɨ₂ŋí₁, ca₂lia'₂ ca₂tiá₃ chi₁gu₃ tau₂ a₂ca₂lë₃ quian'₅₄ mɨ₂ŋí₁, ca₂lia'₂ ca₂tiá₃ mɨ₂gu₃ mɨ₂dsɨ₁coin₂, tsá₃ le₃'éng₂.

²⁶Jŋia₃ jmɨg₄ cang₂ guë́₄ jaun₂, jme₁le₁ŋɨ'₂ táng₃ chi'₂ dsɨ₂guia₃-tɨ́n₂ quiáin₅ caun₂ dsi₂néi₂, le₂jaun₂ guë́₄ në́₃ jme₁'en₅₄ To₁má₄ jë₄ quió'₅ 'éi₂. Jaun₂ në́₃, o₁jŋia'₅₄ qui₂le₁jnág₅ 'né₅ ja₁tioin'₅₄, ca₂'í₃ Jesús, ca₂nau₂ dsi₂jo₂ quió'₅ 'éi₂, jaun₂ ca₂juá'₂: ―Juɨ₁'ei₅ tei₄ 'au'₂ 'nia'₂.

²⁷Jaun₂ në́₃ ca₂juá'₂ ca₂tsɨ́'₃ To₁má₄: ―'Ŋia₅ i₂tio'₂ chi₁gog'₂ ja₁lá₃, jag₄ mɨ₂gu₃; i₂tio'₂ gog'₂ mɨ₂dsɨ₁cong₂. Tsá₃ lë₁jmo₂ a₂tsá₃ 'éng'₂, juɨ₁le₂'éng'₂ bá₄.

²⁸Jaun₂ në́₃ ca₂ŋag₃ To₁má₄: ―¡Te₁gui'₅₄ quiáng₃, Diú₄ quiáng₃ në́₃!

²⁹Jaun₂ ca₂juá'₂ Jesús: ―Në₃ guë́₄ 'éng'₂ 'uɨg₅₄ ia₁ a₂në₂jag'₅₄ jniá₂. 'E₂ guë́₄ dsen₃ juɨ₁lia'₂ dsa₂ i₂tsá₃ ca₂jág₂, la₁ 'éin₂ bá₄.